|
Chière Demoiselle Caton, D'pichis vot bâton, Et seyiz Démoiselle raisonnable, Ne vos mârissis pas, Je vos offrons un bras. La! la! assa siyiz aimable. Châtelaine douoche et chérie, Prennais notra avis, Et marious et siyiz en paix; Le vier Procureux, Compatis l'zamuoreux, Et pour rain, y graira nos papiers. Ah oun mentissaies pon, Chacun d'nous vaire, est bon, Et si ou zêtes gréjie - Et mais Ouez qués, dites nous, l'Apôtre, Que quique gemme ou aoutre, Nai drillyi, faire play, bain des fais? Ché s'rai un bonheur Et un terrible honneur, Que dé dompter vot coeur si rustique, Là prennais iun d'nous, Le chain a vot gout, Enfin, l'chain qui vos pliais d'not clique. Noble douoche Demoiselle, Assa faite don la belle, Et pustôt qué d'nos grimmachi tous, D'pis qué j'vos faisons tous bé, Et vos fliattons la pé, Et ronnais, et faites patte de vlous. J'vos priions noble chière, Ecoutais not prière Si unne femme change d'idaie, là quez rain. Assa faites don pas d'bri, Mais dites tranquillement oui, Et d'main, j'en pâlelons au Doyen. Aiyiz pityi d'Zermites, Et rêpondais vite A la consortie qu'ichin vos prie Qué l'riche Q, le noble B Le bouan N, le biau C Et tuos les viers garçons et Cie.
Couvent des Capucins, St. Hélier, |
Viyiz étout: