San Antonio, Texas
U.S.A
Lé 26 d'févri, 1966.

Moussieu l'Redacteu,

A ch't heu qué l'gouvèrnément à Washington est en trains d'appeler les jannes hommes pour êt' soudards et aller à la dgèrre au Vietnam, v'la tchi m'fait penser à man janne temps dans la Milice Rouoyale dé Jèrri. Quand j'avais seize ans, mé v'la en c'mîn pour l'arsenal dé St. Pièrre pour quémanchi mes deux ans d'sèrvice dé r'crues. Y'avait d's années qu'j'avais envie d'aver seize ans pour pouver soudarder dans la Milice! J'avais veu man p'pèe et m's oncl'yes atout lus rouoges câsaques et lus Scatch comme il' app'laient l'chapé d'soudard dé touos les jours et l'du chapé auve un pitchet en tchuivre sus l'haut pour mett' à la Grand' R'veue. V'la tchi m'faîsait vouler êt' grand assez pour mett' des bieaux habits d'mème! Et pis, l's histouaithes d'aventuthes à la dgèrre des Boërs m'avaient tellement împressionné comme mousse qué j'avais mème démandé à Papa si j'pouvais jouaindre l'armée Angliaiche comme Drummer Boy. Comme j'n'avais qu'huit ou neuv ans, i' n'est pon difficile d'înmaginner sa rêponse! Moussieu A. J. B. Arthur y'était, à la dgèrre des Boërs, et quand jé l'vis dans s'n uniforme en khâki un Dînmanche à St. George j'avais l's ièrs grands comme des êcalles! Tchi bel homme! Mème acouo à ch't heu dans sa vieillèche!

Dans ma preunmié année comme mousse à l'arsenal dé St. Pièrre, j'eus la chance de gangni la tchulyi en argent comme milyeu sîgnaleux, et comme il' 'taient a court dé sîgnaleurs dans la compangnie d'St. Brélade j'fus accoutré sus l'coup. Ou' n'avez qu'à d'mander si j'tais ordgilyeux! I' n'y avait pon un homme au monde tch'était pus ordgilyeux qu'mé la preunmié matinnée que j'mîns l's habits d'soudard pour m'en aller au camp ès Tchennevais tout près des Rouoges Maîsons, m'n arme à l'épaule et la baïonnette au côté. I' m'sembliait que j'tais au mains aussi bé comme autcheun soudard des rédgulièrs. J'marchais drait comme un pitchet, et j'éthais donné autcheunne chose pour rencontrer ieune dé mes jannes filles chutte matinnée-là!

J'avais r'gret d'n'êt' pon dans la compangnie d'St. Ouën, mais jé d'meuthais à La Mouaie d'St. Brélade siez mes parrain et marraine d'Aubert dans chu temps-là, et fallait aller dans la compangnie d'St. Brélade. Enfin, j'tais bien heutheux auve les St. Bréladais, et ch'tait p't êt' eune bouanne chose qué j'tais auve ieux car les St. Ouënnais lus trouvaient tchiquefais, en embarras! Et pis, dans touos les cas j'tais dans l'bataillon du Ouest - lé preunmyi en tête es Grand' R'veues!

Sans doute, je n'tais pon l'preunmyi d'ma fanmile à sèrvi dans l'bataillon du Ouest, et j'ai tréjous pensé qu'mes anchêtres dans la compangnie d'St. Ou avaient aîdgi à gangni la Batâlle dé Jèrri en dgiex-sept chent huiptante-ieune! Ch'est assez r'mèrquabl'ye qué man neunmétho d'soudard dans la Milice 'tait 1781, et qu'pus tard quand j'tais artilyeur dans les rédgulièrs pour aller à la dgèrre dé 1914-1918 man neunmétho fut 91781. Noum'éthait quâsi tchulbuté auve eune plieunme dé poule quand j'm'en appèrchus, et j'mé d'mandais s'i' y'avait tchique sîngne dé mystèthe là d'dans, car quand jé r'gardais l'portrait d'La Batâlle dé Jèrri i' m'sembliait qu'un soudard à côté du pouorre Majeur Peirson mé r'sembliait! N'mé dites pon quand-même qué ch'tait l'nièr soudard tch'est à mither s'n arme, tchi mé r'sembl'ye - ouaithe qué j'ai 'té hardi dans les chaleurs, j'sis acouo du rang des bliancs!

Enfin, pour èrvénin au camp és Tchennevais, j'mé trouvis tout à fait à m'n aise dans ma tente. J'avais les milyeurs compangnons qu'nou piésse aver - Walter Chapman, du Somerville Hotel, et Harold Dart, de Foligny House, à St. Aubin, Arnold Mauger tchi fèrmait pas liain d'là, et nouot' sèrgeant 'tait Ouoyamme Thelland, fis William John, tchi travaillait dans eune banque. Ch'tait tchiquechose, dé travailli dans eune banque dans chu temps-là! Nou n'y viyait pon d'jannes hardelles atout lus lèvres et ongl'yes peintes, lus j'veux en pèrruques dé mouques-à-m'yi et lus robes en d'ssus de g'nou! Nou peut dithe qué j'tais parmi des mêssieux. J'crai - et j'espèthe - qué, l'Sieur Thelland est acouo du rang des vivants, et j'sai bien qu'Harold Dart, y'est car j'viyais dans la gàzette l'année passée tch'il avait joué l'orgue, à la Chapelle à St. Aubin pour eune chînquantaine d'années ou pus. Arnold Mauger 'tait la bête au dgiabl'ye et nouos faîsait tréjous rithe.

Quand man fréthe Fraînque, tch'est pus janne qué mé, d'vînt milicien etout, i' vînt d'meuther dans nouot' tente et j'avions deux bêtes au dgiabl'ye - li et Arnold Maugi - dans la tente! Tchique années pus tard, John G. Malzard, bieau-fis du Chent'nyi Carrel dé St. Pièrre, arrivit en Jèrri d'Cardiff pour prendre chèrge dé la fèrme du Chent'nyi. Et i' fut appelé pour sèrvi dans la Milice. J'lé rencontris siez l'Connêtabl'ye (pus tard juge) F. V. Le Feuvre, et i' m'dit tch'il 'tait un mio gêné viyant tch'i' n'avait janmais 'tait soudard. J'li dis de sé gêner pon, et qué s'i' voulait en prendre la peine, j'îthais lî apprendre à sîngnaler au sé et eune fais accoutré i' pouorrait v'nîn dans nouot' tente.

Lé Sieur Malzard 'tait întelligent et apprint à sîngnaler dans bien p'tit d'temps, et comme i' y'avait tréjours bésoin d'sîgnaleurs dans l'bataillon i' fut tout d'suite mînt auve nous eune fais enrôlé dans la Milice!


George d'La Forge

Fort Lauderdale. Florida,
U.S.A.

Auve John Malzard dans nouot' tente j'tions chînq dé nous. J'avions tout pliein d'run. L's armes 'taient mâtées l'long du pôle dans l'mitan d'la tente, la tchulasse èrposée sus l'aithe dé bouais tch'était en deux d'mié-rondasses qué nou-s appelait des “galettes”. J'pensais au confort dé nouot' tente bien souvent pus tard à la dgèrre en France et en Belgique. Là, si nou-s avait la chance dé couochi dans eune tente en r'pos drièthe lé front, nou y'était seize - iun à châque triangl'ye dé taile lé tou d'la tente - les pids au pôle à garder les tchulasses d'armes caudes, et patchis comme des sardinnes en bouaîtes dé blianc-fé!

J'allions mangi dans eune grand' tente à côté des Rouoges Maisons. Ouaithe qué l's heinitcheurs (i' n'mangeaient p't êt' pon si bien siez ieux!) trouvaient à r'dithe, la nouorrituthe 'tait bouanne. J'mé r'souveins qu'y'avait des dgichons plieins d'oeufs, et qu'y'avait des gourmands tch'en mangeaient chînq ou six pour dêjeuner! Sans doute, les r'pas 'taient sèrvis un mio à la frouque, et n'y'avait pon d'doublyiyèrs sus la tabl'ye, mais y'avait du bel et du bouan à mangi!

La vie d'soudard 'tait pliaîsante dans la Milice. La grand' partie d's officièrs, à l'exception d'l'Agîtant, 'taient des Jèrriais comme les sîmpl'yes soudards sénon tch'i' y'avait des sou dans lus fanmiles. Lé Cap'taine dé ma compangnie d'St. Brélade 'tait Moussieu H.J.D. Tennant (j'crai qu'ses noms d'baptème 'taient Hugh Johnston Dalrymple!), et l'Mâjeur 'tait Moussieu Robert F.J. de Vismes, deux charmants mêssieux. Lé Lieut'nant-Coronel du Bataillon du Ouest 'tait l'Avocat Maurice Alavoine. Il 'tait bien aimé. J'mé r'souviens qu'eune fais, quand y'avait ieu du troubl'ye à cause dé la révolte d'eune demié-douzaine dé St. Ouënnais, contre un Sergeant-Mâjeur, i' vînt à j'va bailli eune saquétinne bouanne savonnée au sujet du comport d'un soudard, la maintchi en Anglais et l'aut' maintchi en Jèrriais, et j'vouos asseûthe tch'i' pouvait juther comme un viér Jèrriais! Jé n'mé r'souveins pon du nom d'nouot' Coronel. Né vl'a chein qu'chest d'êt' en Améthique à la pliaiche d'êt' en Jèrri. Si j'y ètais, j'n'éthais qu'à r'garder dans iun des vièrs almonnas dans la biblyiothèque à Fraînque Le Maistre et j'trouvethais san nom tout d'suite!

Nouot' Agîtant 'tait l'Cap'taine Albert George L'Estrange Le Gallais (pus tard Coronel), de l'armée rédgulièthe. Si j'm'en r'souveins, il 'tait offici dans les Northumberland Fusiliers et il avait un supèrbe uniforme. San p'pée, acouo en vie dans chu temps-là, 'tait Moussieu Albert Le Gallais d'La Maison d'La Mouaie, un p'tit homme charmant et un vraie type dé moussieu du temps-passé. Lé Cap'taine 'tait charmant étout. I' savait bien qu'la grand' partie des miliciens 'taient pus accouoteunmés à t'nîn la tchéthue qu'à manier eune arme d'soudard!

I' y'avait tou d'mème d'la disciplinne, ouaithe qué nou n'en souffrait pon fort. Nou sé l'vait d'bouan matîn au son d'la trompette et faillait faithe des exèrcices, sans armes, pour raptichi les gros ventres! En 1914, quand j'tions en bèrrecks à La Grève dé Lé, nou-s allait s'bangnier à la mé. Auprès déjeuner, ch'tait l'exèrcise atout l'arme à l'êpaule, et en marche - eune fais au mains dans les dgiex jours auve la musique en tête et l' “sac au dos”, comme disent les Français. Chutte fais-là nou marchait tchiques milles dans la route. Ch'tait chein que l's Angliais appellent “route march”.

Touos les matîns i' fallait êtchuther ses boutons d'câsaque et biouques dé beltes et les faithe èrlithe comme des mitheurs, et bliatchinner ses bottes, et l'sanmedi fallait êtchuther les boutons d'la rouoge câsaque et l'êtchusson, la chaîne dé moton et l'pitchet du chapé d'Grand' R'veue pour la parade à l'Eglyise dé St. Brélade lé Dînmanche matîn. Ch'tait eune grande et ordgilyeuse occasion. Nou y'allait musique en tête et tout l'monde dêhalaient pour nouos vaie passer. Y'en avait mème eune dgaingue lé long du chinm'tchièthe pour nouos vaie arriver, et nouos vaie former en colonne dé marche pour lé r'tou au camp. L'arlévée 'tait un festîn d'pliaîsi pour touos nous. La Musique dé La Milice Rouoyale (si j'm'en r'souviens, ch'tait l'bouanhomme Sieur McKee tch'en n'tait l'conducteur dans man temps) jouait dans l'camp pour deux-s'trais heuthes, et touos les pathents, anmîns et jannes filles des milliciens v'naient l'êcouter, et vaie les tentes. Nou-s avait gardé la rouoge câsaque pour l'occasion, auve la “Scatch” à la pliaiche du chapé à pitchet, ou un “Haldane Cap” tch'était eune castchette à saluette comme les Cap'taines dé l'Armée du Salut mettent, et auve toutes les filyes et femmes à vouos admither en habit d'soudard, nou 'tait ordgilyeurs comme des poux sus du v'lous. V'la tchi m'ramèmouaithe qué man vièr anmin Edwin John (“Jock”) Luce, tch'êcrivait rînme et poësie sus tout ch'tchi lî v'nait à l'idée, êcrivit eune fais quand j'tais en habit du Dînmanche dans la Milice, et tch'i' vînt m'vaie :-

George Le Feuvre est en ornement
Qui s'habille correctement:
Il est toujours content de soi
Et plus royaliste que le Roi!


George d'La Forge

Fort Lauderdale, Florida, U.S.A.

Lé 19 dé mar, 1966.

J'avions d'nouos sèrgeants et des sèrgeants des rédguliers pour nouos drilyi. Nouos sèrgeants n'lus y connaissaient pon fort pus qu'nous, mais les sèrgeants-instructeurs rédguliers 'taient à la hauteu d'lus chèrges et nou-s appranait bein souos ieux.

Lé Quartchi-Maitre 'tait l'Sieur T. Louis de Faye, l'bouochi. J'crai tch'il avait l'titre honothaithe dé Lieut'nant - p't êt' Cap'taine pus tard - et i' m'ttait un uniforme dé parade tchi 'tait mangnifique mais tchi né r'sembitait pon à l'uniforme des aut' officiers!

Autrément qu'd'apprandre à marchi en rang, à manœuvrer comme i' faut et à manier l'arme et la baïonnette, nou-s appranait l'escarmouche dans les Blianches Banques. Les banques dé sablion et les p'tites vallées 'taient supèrbes pour l'escarmouche et la manœuvre, et nou s'divisait en deux “armées” - ieune d'attaque et l'aut' dé d'fense. Sans doute, i' y'avait trèjous l'côté gangnant et l'côté pèrdant, et l'Coronel rassembliait les deux armees eune fais l'escamouche finnie pour lus explyitchi pour tch'est qu'les perdants avaient pèrdu. L'avant-drein jour au camp, lé Gouverneux v'nait pour observer l'escarmouche. J'avions un poste d'signaleurs sus l'haut' dé Spion Kop et l'aut' poste restait au camp pour signaler l'arrivée du Gouvèrneux à Spion Kop pour averti l's officièrs enchèrgis d'l'escarmouche d'êt' sus lus garde pour sén arrivée dans les Blianches Banques, et d'faithe dé lus mus pour li faithe à craithe qué j'nous y r'connaissions!

Dans nouos tentes j'avions eune pailyoche bouorrée atout d'l'êtrain, et un ouothilyi en forme d'sausiche bouorré d'êtrain étout, et deux ou trais draps d'laine. Touos les matîns i' fallait patchi liet et ouothilyi d'eune certaine manièthe, auve les draps sus l'haut, et netti l'aithe dé bouais d'la tente pour l'inspection d'l'offici du jour, chu moussieu-là étant iun des jannes officièrs, nommés touos les jours, tou à tou, pour seurvilyi l'ordre et la proprété du camp.

À dgiex heuthes au sé, la trompette annonçait tch'i' fallait dêteindre toutes les veues, et i' fallait qu'touos les soudards tchi n'avaient pon pèrmission d'miniet fûssent dans lus tentes. Nou s'couochait, viyant qu'nou n'pouvait pon jouer ès cartes ou ès danminos à tâtons. Ch'tait ieune des régl'yes tch 'tait stricte et qu'fallait obeï. A mains qu'nou fusse dé garde à la hèche pour la niet, nou pouvait rester hors du camp jusqu'a dgiex heuthes. Nou pouvait quand-mème aver pérmission dé rentrer à miniet à la pliaiche dé dgieux heuthes, mais i' n'fallait pon alleunmer d'veue en entrant dans la tente, et i' fallait sé d's'habilyi et s'couochi à tâtons! V'la tchi donnait eune chance ès cheins tchi lus couochaient d'bouanne heuthe de jouer des farces ès cheins tchi v'naient tard. La cheinne qué nou faisait l'pus 'tait dé r'doublier les draps d'laine en deux pour faithe lé liet en env'loppe.

Eune aut' bouanne farce 'tait d'mett' eune bouqu'tée dg'ieau à l'entrée et en dans d'la tente. Comme lé chien tchi rentrait auprès dgiex heuthes né pouvait pon mème satchi eune alleunmette pour vaie, i' m'ttait san pid dans l'boutchet en entrant! Auve botte, pid et braies mouoillis quâsi jus'au g'nou, il en faisait, des teurbleudes! Y'avait eune aut' farce tch'était bouanne étout. Ch'tait d'amather un but d'ficelle d'un côté d'la tente á l'autre endrait l'entrée, et d'pendre des boutelles vièdes (les b'veurs dé bièthe en laissaient tréjous par les c'mins) dessus. En entrant, lé tardi avait à d's'amather la taille tchi faisait sèrvi d'porte et la plier d'côté, et pis i' l'vait l'pid par dessus lé p'tit ridgieau d'à bein près 18 pouces dé hauteu tchi faisait l'tou d'la tente, et baissait la tête pour entrer, et s'tapait l'nez contre les bouteiles pendues! Man frèthe Prainque pouvait înventer un tas d'ches farces-lá!

En août, 1914, quand la Milice fut mobilisée, j'tions en bèrrécks à la Grève dé Lé, tchinze ou seize dans chaque chambre. A siez heuthes au matin fallait s'bangnier à la mé dans la grève. Eune séthee, lé Y.M.C.A. 'tait v'nu d'la ville pour nouos donner un concèrt. Tout l'monde allîdrent au concèrt sénon l'Fraînque et mé. J'dîsinmes ès autres qué j'nouos en allions à la pratique du chant à l'églyise dé St. Brélade, et i' nouos vîdrent sorti. J'n'allînmes pon bein liain, et quand j'tions seux qu'touos l's aut' 'taient au concèrt j'rentrînmes trantchil'ment et nouos v'la à meler les bottes et habits d'touos les cheins dans la préchaine chambre dé nouos, et pis j'fichînmes lé camp jusqu'à dgiex heuthes pour qué l's aut' nouos vîssent èrvénîn. I' iut un tîntamârre abominabl'ye lé lendemain au matîn quand les garçons êprouvîdrent à lus habilyi. I' restaient au liet - naturellement - jusqu'à la dreine minute auprès qu'la trompette sonnait l'rêvilyon, et fallait s'habilyi dêliêment pour prendre sa pliaiche dans les rangs à l'heuthe. Les hauts êprouvaient à mett' des braies tch'étaient trop courtes, et les p'tits des braies tch'étaient trop longues. Les gros ventres (y'en a parmi des miliciens!) êprouvaient à boutonner des braies tch'avaient la cheintuthe trop p'tite, et les maigres des braies tch'allaient deux fais l'tou d'lus tâlle, et pèrsonne né pouvait enduther des bottes tch'étaient trop p'tites ou trop grandes pour lus pids!

(A sièthe)

George d'La Forge.

Fort Lauderdale, Florida, U.S.A.
Lé 26 d'mar, 1966

Comme ou'pouvez bein l'inmaginner, la bangniole n'eut pon lieu chutte matinnée-là. Pus d'la maintchi d's hommes dan la chambre où-est qu'j'avions mêlé l's habits,  l'Fraînque et mé, lus mîndrent en rang tard et à la maintchi habilyis. Y'en avait iun tchi n'pouvait pon trouver ses braies, et il arrivit en drâses. Un aut' n'avait pon trouvé eune pathe dé bottes tchi 'tait d'la grandeu tch'i' fallait, et i' s'mînt en cauches dans l'rang. Un aut' vînt auve rein qu'eune botte, et un aut' arrivit atout eune câsaque tch'éthait 'té deux fais l'tou d'li, et les manches 'taient si longues qué nou n'li viyait pon d'mains. Un aut' vînt atout eune câsaque sus san bras tch'tait bein trop p'tite pour li, mais i' l'avait apportée pour prouver à l'offici qu'tchitchun d'aut' avait la sienne  ! S'i' y'avaient pensé, il' éthaient peut mett' les bouans habits tch'il' avaient au concèrt la séthée dé d'vant, mais dans l'tîntamârre et la peux d'êt' tard à rêpondre à lus noms en rang, i'n'y pensîdrent pon, sustout comme i' n'avaient qu'tchiques munutes à lus habilyi, ayant, comme d'habitude, resté au liet jusqu'à la dreine munute  !

Lé sèrgeant 'tait au m's'espé, et trop mârri dans l'temps pour vaie l'hunmour dé la scène dévant li. Dé la carre dé m'en yi j'viyais l'offici s'touanner d'bord auve lé souorit sus sa fache, mais i' n'ôsait pon montrer tch'il en n'tait amusé  !
 
Naturellement, la preunmié tchestchion 'tait  : Tch'est tch'avait mêlé touos l's habits  ? Sans doute, pèrsonne né l'savait - et pèrsonne né l'avait dêcouvert jusqu'à y'a deux ans ! En 1964 j'tais à pâler à Ted Dart à Foligny House à St. Aubîn. En pâlement des vièr temps, i' m'dit tch'il 'tait iun des cheins tch'avait ieu ses habits mêlés chutte séthée-là à La Grève dé Lé. Quand j'lî dis qué ch'tait l'Fraînque et mé tch'avaient fait l'mînchet, i' faillit à s'êvanni d'surprînse ! J'avions gardé l'ségret si bein qu'la grand' partie des miliciens d'chu temps-là tchi n'sont pus à ch't heu n'l'ont janmais seu, et des survivants pèrsonne né l'avait seu pour 50 ans quand jé l'dis à Ted Dart!

Hélas! Un tas d'ches braves garçons-là fûdrent tués à la dgèrre un p'tit pus tard. Y'en avait parmi ieux tch'étaient dueurs et batilyeurs dé natuthe. Iun d'ieux 'tait Winter Garde (san mênom 'tait Ouinn'to). I' fut tué dans les tranchies en France ou en Belgique dévant qu'la dgèrre eusse duthé longtemps, et i' s'était si bein comporté en fache dé l'enn'mîn qué s'n offici êcrivit à ses pathents pour lus dithe tch'il 'tait iun d'ses milyeurs soudards et tch'i' n'avait peux d'rein et tch'i' s'était battu comme un tigre contre l's Allemands.

V'là tch'i' m'ramémouaithe tch'il 'tait iun des cheins tch'avait fait du troubl'ye au camp dans l'temps qué lé Lieut'nant-Coronel Alavoine 'tait v'nu nouos bailli eune savonnée au sujet du comport d'un soudard. I' s'adonnait qué l'bouan vièr sèrgeant-mâjeur Horwood avait finni ses vîngt-iun ans ou pus dans l'armée et s'décidit d'prandre sa pension et d'tchitter l'armée. Un sèrgeant-mâjeur avait des privilèges qué l'bouanhomme Horwood n'avait janmais exèrcé ni exigi. Il avait l'drouait d'faithe lé soudard sé mâter drait au Garde à vous (Attention en Angliais) quand i' vouos pâlait, et d'êt' appelé Moussieu comme nou l'faisait à un offici, mais i' n'avait pon l'privilège d'êt' salué. Il avait l'drouait, étout, d's'habilyi en offici (sans doute sans l's êtelles ou însîngnes d'offici sus l's êpaulettes). En général, les miliciens n'lé savaient pon, car lé bouanhomme Horwood, sachant tch'il avait affaithe à des fèrmièrs pûtôt qu'à des rèdgulièrs, n'avait janmais mînt ses privilèges en pratique.

J'fus eune aut' histouaithe quand i' fut rempliaichi par lé sèrgeant instructeur dé mousquetterie Aldridge. Ch't'îla 'tait ordgilyeux et c'menchit à puni les cheins tchi n'lî donnaient pon touos l's honneurs dé san nouvieau rang d'sèrgeant-majeur. Eune demi-douzaine dans la compagnie d'St Ouën lus mârrîdrent. Ouinn'to Garde en n'tait iun. Dans la niet, i' mîndrent la baïonnette au canon et pèrchîdrent la tente du nouvieau sérgeant-mâjeur. I' copîdrent les cordes tchi la t'nait d'but et l'abatîdrent sus li. Il eut eune fichue peux et hapit la pathe pour lé sanctuaithe des tentes des officièrs, l's autres souotre li ! Arrivé-là i' s'trouvit en seutheté, et dans l'entretemps i' n'avait pon ieu d'ma. I' faut penser tch'i' n'avaient pon idée d'faithe sèrvi la baïonnette sus li, car ch'est seux tch'il'éthaient peut l'attraper s'il' avaient rêéllement voulu. Enfin, janmais i' né r'fut veu dans l'bataillon du Ouest. I' fut env'yé d'tchiquebord d'autre, et j'eunmes un nouvieau sèrgeant-mâjeur tchi n'êprouvit pon a nouos embêter d'trop !

Jé n'mé r'souveins pon trop bein tchi punition tchi fut donnée ès St. Ouënnais tch'avaient m'nichit l'Sieur Aldridge. J'pense tch'i' fûdrent mînts à l'amende par lé Juge Vaudin à La P'tite Cour, mais pour lus camarades dans tout l'bataillon il' 'taient des héros, ayant fait touos seurs chein qu'touos l's autres n'avaient pon ieu l'couothage dé faithe !