Un Buon Vier Jerriais

Vos en souv'nous du buon homme Ph'lip Roumri du Mont Canté? ma fingre! tout vi qu'y tait (il avait septante ans bain sounnées) y prenant s'narme quand v'nait la saison d'la chasse, et nou l'viyait mâté près des fossais ov son vier chen “Black.”

Ch'tait pliaisi de le vais, un vier Jerriais d'la vielle race ch'ty là, et un villais par d'sus l'marchi. Il en'tait tout fi. Y a bétôt quarante and j'entry l'vais un Dimanche au sé. Y dounnait un coup d'bringe à ses neuves brais, et y paraissait tout raijoui.

“Chêque y a d'nouvé, Mes Roumri?” – J'sis r'venu d'Paris, hier matin, valet, v'la ch'qu'y a d'nouvé, et j' n'm'y pliais pas du tout. Les gens d'par ichin m'estybochais tréjous et m'racontaient un tas d'gnolet de chu Paris, et m'disaient que j'serais êsgalué qand j'comtemplerais les miracles que nou s'y viyait, ch'y betises! quant à mé j'm'sis mins coum' nou m'avait dit tout pres du gardin des Tuileries, et jé r'gardis du bord d'l'arche de Triomphe. Ch'est de ché bé, sans doute, mais ch'la n'avaut pas la veue qu'nous a quand nous s'met près d'la statue L'Sueue dans Broad Street, avec Sherring Cross à l'aurizon! En v'là eunne belle veue!

J'm'en sis bain vite ervenu, Nou n'a rain à mangi dans chu Paris. J'fus dans un reste au Rand qu'nou m'avait indichi, et j'massievi sus un banc quand un biau moussieu en cravate bianche eten câsaque a coue d'pie, habilly coum l'prédicateur chi nos arrive d'France chiq' fais, vint m'offri un brevieze ch'avait l'air d'eunne p'tite gazette, chiq'chose coum' la voie d's'Iles d'aut-fais. Tu sais bain valet qu'papa ne depensent poun fort d'sous sus m'n'èscolage, et je n'comprins rain de ch'qu'y avait d'sus. Enfin j'mins man de sur la premièze ligne, et y m'apporti eunne assiette avec deux liards de soupe dedans que j'avalis bétôt.

Pis l'biau moussieu me r'presenti la p'tite gazette, et je r'mins man dé sus la s'conde ligne. Man buon houmme! ch'tait ocquo d'la soupe. Enfin j'en sis dit j'vaindrons bétôt a la viande et r'mangi ch'qu'y avait dans l'assiette, ch'tait d'la soupe rouoge et espaisse avec du paivre, man buon houmme, j'en èsternue ocquo quand j'y pense. Et n'er vechin la gazette. Tu n'elcrérais pas, ch'tait que d'la soupe de pais. J'n'osais rain dire au biau moussieu, ch'avait ocquo l'ait de s'moqui d'mé. Enfin je m'dis je n'peux pas mangi tout che qu'y a sus la p'tite gazette, et quand y m'la rapporti j'en sauty eunne vingtaine d'lignes et je pointy sus chique chose à la fin. Jamais tu ne d'vinerais che qu'y m'dounni: “un p'tit verre ou êque y y'avait eunne preune verte dedans avec eunne goutte d'iau d'vie.”

Man pouo garçon, j'payi bain vite; j'er saute jusqu'a l'hostel, j'er'prins eunne cab, pis le k'min d'fé, et m'er véchin. Escoutemé, man vi, n'va jamais à chu Paris!

Ch'la n'fait d'rain, Philip Roumri n'avait pon té au Collaige ais ch'tait tout d'même un bain brave houmme. La drenne fais que j'lis pâli ch'tait à l'eslection dans l'marchi et y'm dit, lesJerriais s'en vont man buon houmme, n'y en erra bétôt pus.

Les jeunes garçons voudraient touos d'venin des messieux angiais, et pis dans nos campannes je n'ouions que du Breton. Oué qu'i sont les Jerriais d'man janne temps.

Eh! pis l's'èlections achteu n'valent rain du tout. Nous s'crérait à un enterrement! Je m'souvains quand j'tais mousse avé veu les Mont au Prêtriais s'naller à l'èslection de Moussieu Perrot et d'Moussieu Frank Godfray, bannière en tête, et la rose à la boutounnière, et si rencontraient chiq' eslecteu ov un mio d'louori espilé à sa casaque, y sautaient d'sus coum un cat sus eunne suoris. Et quand y r'venaient le sé tout près d'miniet, ils avaient lus casaques toute minchis, chitchin avait un black eye et l'autre cliopinait, mais chequ'il en tait, nous avait gagni la victoithe. Achteu tout l'monde vote coum y veurt, et noun be pas même eunne goutte de vin a la santé d'son candidat. Oue qu'est le bouon vier temps?