Les Pages Jèrriaises

Eune Lettre dé Bram Bilo


Saint-Ouen, Sept. 2, 1889.
Bram Bilo

Mousieu, - Jn'os n'allons à Paris, ma femme et mé.

V'la que'j cmochons a avé d'l'âge, et j'n'avons, ni l'un ni l'autre, oquo té hors l'île, si ch'n'es, y'a set ou huit ans qué j'fûmes en Ser dans l'Wonder, - et achteu j'nos n'allons à Paris, vès l'insposision et la tour F.L....

D'pis l'mais d'Mai, ma femme né m'a pon laissé d'eerpos, ni jour ni niet, que j'en lis prominse d'y allé. Dé jour j'pouvais oquo m'grais, j'tais presque tou'l' 'tems dans les terres ou à la pèque, et chen' tai quès r'pas quou'm tormentai; mais la niet!!!

Je'n pouvais y stanné.

J'nai pon yieu unne bouanne niet ed'pis qué je cmonchimes à dèsfoui. Ou quémenchi à m'pâlé de Paris sitôt la chandelle soufflyiée et ou continuai sus l'même chapitre jusqu'à des heuthes horribles; je'm sis veu oblyiji, pus d'eune fais, d'lie fliantchi un uothilli sus la teste pour la faithe porté r'pos.

Chès pour t'chi pour avé un mio de r'pos, j'ai décidé que j'nos n'ithions la s'maine t'chi vin par Granvile.

J'n'ai pon fai gran' sous sus mes patates, et, ma fé, j'tais un mio acour dé cash, mais, j'rencontri Moussieu l'Bro l'ôtre jour à la fèthe et j'lis dis d'passé par siez nous. Y vint, et j'y'ai vendu not' millieu g'niche, qu'avé tai "Highly" l'ôte jour au "Heur Book," pour ven-très louis - et vive la joée, j'os 'n'allons fliambé chès sous là su' l'continen, ma Nancé et mé.

J'nos soummes arrangis pour qué ma bel'-methe soinne les aviers tandi qu'e j sons hors, et j'lis laissons la clié du salleux et un sa d'flieu pour quou n'anhanne pon.

Sus l'avis d'Mès Malsar, tchi r'vin d'là, j'os n'allons emporté nos buons habits avec nous, car y pathais qu'les eswtrangiers sont tout à fait ben r'chus, et qué j'pourraimes être invités à allé siez tchique messieurs d'par là. J'emporte man topper qué j'acati pour l'entèrman dé m'n'oncle Clem en '63, et eunne pathe dé gans d'entèrman qu'Nancy a trouvai dans l'titheu du ouache-stan.

Vos pliétha-ti continué à envié la gazette siez-nous (j'vos paithai la ptite soum' qué j'vos dé quand j'er vaindron) - et si je'n tai pon tro vos gêné, j'vos d'mandais de'm presté vot paraplyie pour le viage, - le main q'manche à être failli - j'ithai l'prandre à l'office en passant.

Vot' vièr amin,
Bram Bilo
de Saint-Ou.

J'vos éscrithai tchqique lettres dé là-bas, si l'bon-djieu m'prézerve.

Nouvelle Chronique de Jersey 4/9/1889
 

 

Viyiz étout:

 

 

Les Pages Jèrriaises