Quand j'tais mousse, j'ouiyais pâler d'Napoléon, et les péthes d's'anciens d'chu temps-là avaient vêtchu dans san temps, car i' n'y'avait pas chent ans dépis la dgèrre dé Waterloo.
Ch't'arlévée j'tais à r'garder sa tombe, à Napoléon, dans l'Hôtel des Invalides à Paris. Sans doute, j'l'avais veue d'vant, et j'pensais à bein des choses comme j'èrgardais chu bieau tombé-là. L'y'à eune chose tch'est bein cèrtaine, ch'est qu'la mort veint à tout l'monde – ès Rouais comme ès pauvres.
L'y'à des tombieaux ès Invalides que j'n'avais pas veus d'vant dgia, - l'chein du Maréchal Foch en est iun. Et pis, étou, l'y'a l'chein de l'Aiglon, lé fis d'Napoléon et d'sa deuxième femme, Marie Louise Prîncêsse d'Autriche. I' mouothit d'la comseum'tion à l'âge de vingt-iun an en Autriche, et san corps avait r'posé dans la crypte d'eune cathédrale là-bas jusqu'en mil neu- chent quarante-deux, quand Hitler l'fit ervenîn en France, pour êt'mîns oprés d'san p'pée. En attendant d'aver eune tombe prête à l'met' dédans, l'coffre est dans eune simplye înscription dîsant qu'ch'est l'coffre de Napoléon II, Rouai d'Rome.
I' n'eut pas grand' chance, chu pouore janne homme-là, - tchi n'avait pon fait d'ma à pèrsonne. I' n'tait pas bein fort, et i' passit sa courte vie dans l'châté d'Schoenbrunn auve s'n'onclye, le Rouai Françouais II d'Autriche. I' pathaît qu'sa m'mée n'l'aimait pas fort, et ch'tait p't' êt' eune bouanne chose pour li que l'Bouan Dgieu l'prînt si janne. Il éthait sans doute 'té pus heutheux s'il avait 'té l'garçon d'un bouan vièr fermyi en Jèrri!
Les Français, comme ch'est bein aisi à comprendre, sont ordgilleux des victouaithes gagnies par Napoléon. En dînant “en famille” l'aut' sé siez d's'anmîns, i' m'dîsaient tch'i' 'tait d'hardi bouan tchoeu, et bein èrconnaîssant ès vièrs soudards et au monde tchi l'y'avaient aidgi à êt' Empereur. Iun d'ches soudards-là avait nom Lefebvre, et d'vînt Maréchal de France. Il avait mathyié la femme tchi faithait san lavage quand i'l'tait Sèrgeant, et ou' faithait l'lavage dé Napoléon, étou, quand il 'tait Lieut'nant dans l'Artil'lie. Dans chu temps-là, i' n'avait pas grand' sou, et il n'pouvait pas tréjous la payi. I' li d'vait acouo des sou quand i' s'n'allit en dgèrre, et v'là tchi fut oublyié dans l'couothant d's'années. Oulle 'tait eune femme de bouan tchoeu et d'caractéthe, et ou' né m'tait pas ses comptes entre les mains d'un homme d'affaithes pour erchéver. Ch'est seux qu'ou' n'éthait pas env'yié bille à personne, et oulle aimait bein prendre souain du lînge ès jannes officièrs tchi n'taient pas riche, car ou' savait bein qu'lus m'mées n'taient pas-là à les souogni.
Oprés que s'n'homme fut fait Maréchal, sans doute, Missis Lefebvre 'tait auve li dans l'Palais quand Napoléon avait des fêtes et des danses, et oulle 'tait si franche dans san d'vis qu'ou' faithait ombrage ès belles dames et d'mouaiselles tchi 'taient-là, prîncipal'ment ès cheinnes tchi 'taient ordgilleuses et tchi faithaient d'lus tchian, et comme i' n'y'en n'tait pas d'rein tch'est qu'ou dîsait, i' lî donnîtent le mênom de Madame Sans-Gêne! Les soeurs de Napoléon n'l'aimaient pas fort, car ou n'lus faithait pas d'bieaux bieaux, et un jour, en lus dîsant tch'est qu'ou' pensait, ou' l's'offensit, et i' lus pliaingnîtent à l'Empereur!
Napoléon, tch'avait 'té hors en dgèrre bein d's'années n'avait pas r'connu Madame Sans-Gêne comme étant la hardelle tch'avait lavé san lînge quand il 'tait janne. Enfîn, il env'yit pour lyi et ou' l'trouvit assis dans d'n'office.
“Bon! ch'est vous, Madame Lefebvre!” i' lî dit: “J'ai env'yié pour vous viyant tch'i' pathaît qu'ou-s êtes affrontée, et qu'ou' n'vouos comportez pas bein vis à vis des Prîncêsses!”
“Eh bein, m'n'Empereur,” ou lî reponnit: “Tch'est qu'il' ont fait pour la France, ches filles-là? I' n'ont pas l'drouait d'faithe des teurs quand j'sis-là, et m'ergarder comme si j'tais eune rein-tchi-vâlle, - mé qu'à té en dgèrre avec vos armées et qu'à té bliessée pour la France! Là! ergardez man bras tch'à'té travèrsé par eune balle! Et pis, quand m'n'homme 'tait Sèrgeant, l's'officièrs 'taient bein contents d'm'aver à laver lus lînge! L'y'en a même iun tchi n'a pas acouo fini dé m'payi!”
“Oh! nan?” lî dit Napoléon: “J'voudrais bein saver tch'est qu'ch'est, mé, ch'tî' là! J'lé connais-t-i'?”
“Ah man doux oui, ou' l'connaissiz bein!” lî rêponnit Madame Lefebvre: Ou' l'viyiz touos les jours. J'm'en vais vouos montrer san nom dans mon p'tit livre, ioù qu'j'ai mîns bas tch'est qu'i' m'dait. Là, - lé v'là – au haut d'chutte page-là, - Lieut'nant Napoléon Bonaparte!”
Napoléon sé l'vit d'un embront! “Eh bein mafîngre!” i' lî dit: “Ch'tait vous tchi d'meuthait à telle et telle adresse, et tchi soulait laver man lînge, et tchi m'était si bouanne quand j'n'avais pas un sou dans ma paute? Et penser que je n'vouos avais pas r'connue, - à ma honte de l'dithe! J'vouos asseuthe que j'm'en vais payi ieune de mes dettes! V'nez auve mé!”
I' prînt la bouannefemme par le bras en ouvrant la porte de l'appartainement ioù qu'les Messieux du Palais et lus dames 'taient à attendre pour lî.
“Mesdames et Messieux,” i' lus dît: “J'ai l'honneu d'vouos présenter Madame Sans-Gêne, eune héroïne dé France! Démain, j'allons baithe du thée dans l'gardîn du Palais, et ou' s'en va m'accorder l'honneu d'sa compagnie toute l'arlévée, et quand j'nouos mettrons à tablye, ou' m'à promîns d's'assiéthe la preunmiéthe à ma drouaite! Madame Sans-Gêne: J'vouos salue!”
George d'la Forge
Les Chroniques de Jersey 8/5/1948
Viyiz étout: