N'ou dit:
Que la canne va tant d'faies au pîts
Qu'ou finit, par en r'venein cratchie.
Chen fut d'même dans chu cas ichein, l'Anmein Phlip avait jouai tant d'tours, qu'un buouan jour san tou veint. Yavait l'Anmein Gaudin qui gardait unne boutique à grocer, à la carre de "Burrard Street," drait coin sus carre à la Brach'chie à Mousieu Randall (ouest tchi font de si buouanne bièthe) ils 'taient bein grands anmeins l'y et l'Anmein Phlip, et quand y v'nait de la Rocque à la ville, y criait presque tréjous en passant à l'y dithe le bonjour, et à bagnaudé ov li.
L'Anmein Gaudin s'était apperchu, que toutes les faies qui venait, y prenait de tchi de d'sus l'conteux: unne orange, unne poignie de chucreins, ou auqunne chose à manghi, et si n'pouvait pon la manghi sans être veu, zut! et la chose trouvait s'en quémein dans sa pouchette pour pus tard.
L'Anmein Gaudin s'était décidai de mettre un stop, a chounna, il avait preins ses plans et un jour coumme il 'tait à la porte de sa boutique, à contemplié les astres, il avîsit l'Anmein Phlip qui tuounnait "Bath Street," s'en venant par devers l'y, il 'tait dêja endrait la boutique à Podger, quand y rentri et s'en fut au conteux, ramassit unne boîtaie d'figues, et en d'êhalit yieunne, et meins figue, boîete et boîetaie sus l'conteux, et s'en fut bûzothi dans l'drièthe de la boutique.
Quand l'Anmein Phlip entrit, il avîsit la figue, car il avait l'yi fein coumme le sien d'un torselai, et y pouvait vais aussi lien à travers d'une mutheaille coumme autchun, y preint unne tchaize et s'assiévit avec la figue à san coude. Après avé badinet pour deus-traies minutes, l'Anmein Gaudin s'en fut d'laut' but d'la boutique, et pis après quique pétit d'temps, y s'en r'veint; arrivait au counteux, y s'meins, d'un divers embront, à cherchi sus l'conteux, suous l'conteux, autou et tout alentou, y fit l'Anmein Phlip se levé, y buoughi sa tchaize, y r'gardit et r'gardit oquo! y châtchit même les pannaies de la casaque à s'n'anmein!
Qu'est qu'tu cherches? se fît l'Anmein Phlip.
Qu'est qu'j'cherche rêpondit l'Anmein Gaudin, et continuit à cherchi de pus belle! (il avait dans l'entretemps passai sa main sus un sac d'fieu, et pis sus sa fache, et il 'tait palle et bian coumme unne chique).
Mais tchest qu'tu cherches? serfit l'Anmein Phlip, pour la deuzième faies!
Qu'est qu'j'cherche? Et pis y s'meins à dithe, d'un ton tout gênai: Je soummes empoiezonnaies de rats (chose assaies seinghulièthe, mais dites qué chest mé qui vos l'dit, y yien avait un tout gros entre deus sacs d'fieu, il 'tait à les escouté, car il avait les ouothelles coumme des trompettes, et ma fé y sembiet comprendre chein qu'était dit, l'Anmein Gaudin au même instant l'y pitchi unne tinnaie de houmards qui venait justement de buoughi en cherchant pour la figue, mais y l'mantchit) y continuit à dithe, je soummes remplyies de rats, et y m'sacagent les sacs en y faîsant des tas d'creux, j'avais meins d'la poiêzon dans unne figue, je l'avais meinze sus l'conteux et j'en peux pus la r'trouvé. A chounna l'Anmein Phlip tuounnit palle et bian coumme unne chieque, et y s'meint à dithe:
J'lai manghie!!
Tu l'as manghie! Tu l'as manghie!! se fît l'Anmein Gaudin, et se tordant les mains et patheaissant au m'zespé, se meins à dithe: Est y paussible et permeins, que j'ai empoiêzonnai le pus grand anmein que j'ai au monde!
Dans l'entretemps, l'Anmein Phlip était coumme un mort, car y l'y semblait que l'poiêzon qu' manchait à faithe sen êffet!!
Dans mains d'temps, qui n'faut à l'dithe, l'Anmein Gaudin preint un tumbler et unne tchullyt, y meins d'la moutarde, du paîvre, du chucre, du sai, de l'huile douoche, et jusqu'à d'la sauce d'anchoies dans l'verre, et avec la tchullyt, y s'meins à ribotté tout ensemble, coumme si j'avait 'tai d'la cremme, et qu'il étheait voulu en faithe du beurre, et pis offrant la verraie à l'Anmein Phlip, lis dît: Prend! Prend!! Prend!! Et chest qui l'preint bein vite, il étheait preint, verre, tchullyt and all, s'il av-ait peu! La dose 'tait tellement forte, que la moutarde ne tardit pon à faithe sen êffet, et tout erveint jusqu'à la figue.
Quand l'Anmein Gaudin vit l'êffet que sa tumbleraie avait yieu, y l'en tchit dans sa tchaize, les bras avaut li, coumme si n'en pouvait pus, et y s'meint a barbélueuté: Te v'la sauvait! te v'la sauvait, est'y paussible que j'ai quasi empoiêzonnai man pus grand anmein!! Je'n'm'en s'ceais janmais erpardounnai! Est-y paussible et permeins; se fît y, une deuzieme faies.
L'Anmein Phlip 'tait tout l'temps assis dans sa tchaîze bian coumme un leincheu à l'êtente, et y n'étheait pas peu buoughi un fi pour se sauvé la vie, ses gambes l'y trembliaient suous li m'nu coumme la fieille. L'Anmein Gaudin fut oblighi d'envié à cherchi un cab pour le renvié siez li.
Ah che fut unne rude leçon pour l'Anmein Phlip, et j'vos promets bein qui n'cherchit pon, après chutte bordaie là, à manghi figues ni chucreins de sus l'conteux à s'n'anmein, et l'anmein Gaudin ne s'vantit pon d'sa farce, sinon longtemps oprès. Ch'tait le cas de dithe: once bit twice shy, ou "cat êcaudai a peux de l'ieau fraide."
Viyiz étout: