Paris

Ottawa, Ontario.
Canada.
Lé 23 d'octobre, 1965.

Moussieu l'Rédacteu,

Quand j'tais à Paris dans l'mais d'août, j'pensais à nouot' vièr anmîn Bram Bilo, et j'èrgrettais tch'i' n'taient pon là auve mé, li et sa bouannefemme. I' m'thaient p't êt' învité à aller auve ieux vaie l'Président d'la République. J'éthais quand-même ieu à r'fûser l'învitation, viyant qu'j'avais laissi ma câsaque à pannieaux et man bil tappeur en Améthique! J'éthais ieu d'la peine à empreunter d's habits d'même pour l'occasion, sustout comme jé n'sis pon aîsi à habilyi, n'étant qu'haut comme un pot d'cidre et trop gros l'tou d'la tâlle!

Ch'est seux que l'Président s'èrsouveint d'la vîsite dé Bram, tch'était Chent'nyi d'St. Ou dans l'temps tch'il allit à Paris. Sans doute, lé Président l'trouvit charmant. J'rencontris san fis Ernest à Auckland dans la Nouvelle Zélande y'a deux ans. Un charmant corps étout - i' tcheint d'san p'pée!

L'Chent'nyi Bram, foncé dans la diplomatie et accouoteunmé à garder la paix parmi les fanmiles dé sa pâraisse, es'sait justément l'homme tchi faudrait pour faithe à saver au président qu'Jèrri n'est pon mârri tch'i' n'veurt pon laîssi l'Angliétèrre faithe partie du Marchi commun, car j'avons assez du Vièr Marchi en Jèrri, et i' n'est pon commun, ch't ilà! J'avons dêjà pèrdu l'marchi à patates, étout, et abandonné l'marchi ès bêtes, "La Faithe", où-est qu'man papa acatait un p'tit couochon touos l's ans quand j'tais mousse. Et j'avons laîssi couorre lé marchi d'St. Aubîn. Dé nouos jours i' pathaît qué l'marchi n'vaut pon la chandelle, et Bram pouorrait explyitchi tout ch'la au Président d'la République! J'voudrais tout d'mème lé vaie, l'Bram, dévant sa préchaine visite au Quai d'Orsay, car j'voudrais li dithe dé d'mander au Président s'il est prêt à accepter la provînce dé Tcheubec au Canada si les Français-Canadgiens ménagent à lus s'pather du reste du Canada, car ch'est probabl'ye tch'i' n'pouorront pon navidgi touos seurs! Et pis li d'mander, étout, si ch'est vrait tch'i' veurt sé dêfaithe d'un Améthitchain tch'a nom NATO. Si ch'est vrai, i' faudra lî trouver eune aut' démeuthe dé tchique bord et i' s'sa temps d's'en entchêter!

En fîn d'compte, j'mîns toutes ches tchestchions-là dans l'driéthe dé ma tête et j'mé décidis d'vaie un mio d'Paris acouo eune fais. J'rencontris ma p'tite-fil'ye Carole tch'a dgiêx-sept ans et tch'était là pour la preunmié fais, et nouos v'là dans la chapelle dé l'Hôtel des Învalides à admither la tombe du fanmeux Napoléon Bonaparte. J'pensais à bein des choses comme j'èrgardais chu bieau tombé-là - à la glouaithe dé ses contchêtes en dgèrre, dé sa grand' capacité comme gouvèrneux, auteur du Code Napoléon et général d'armées - et au fait qu'la mort veint à tout l'monde, mème ès rouais et empéreurs!

Dans eune pétite chapelle à côté du tombé d'san p'pèe, nou vait l'côffre dé l'Aiglon, lé Duc dé Reichstadt (1811-1832), fis d'Napoléon et d'sa deuxième femme, Marie Louise, Prîncêsse d'Autriche. I' mouothit d'la conseumption à l'âge dé vîngt-iun ans en âutriche. San corps avait r'pôsé dans la crypte d'eune cathédrale là-bas jusqu'en 1942, quand Adolf Hitler l'fît r'vénîn en France pour êt' mîns auprès d'san p'pèe. L'înscription sus l'côffre est "Napoléon II, Rouai d'Rome". I' n'eut pon d'chance, chu pouorre janne homme-là tchi n'avait pon fait d'ma à pèrsonne. I' né jouit pon d'eune santé robuste et passit sa courte vie dans l'Châté d'Schoënbrunn auve san grand-péthe l'Empereur Françouais II d'Autriche. I' pathaît qu'sa m'mèe n'l'aimait pon fort, et i' n'pouvait pon vaie san p'pèe tch'était prîsonyi d's Angliais à Ste. Hélène où-est tch'i' mouothit en 1821. Sa vie n'fut pon bein pliaîsante. Il éthait sans doute 'té pus heutheux s'il avait 'té l'garçon d'un bouan fèrmyi en Jèrri. Il éthait au mains ieu la chance d'aller ès pihangnes et ès ormèrs en saison et s'pronm'ner au rotchi d'temps en temps!

I' n'y a pon d'doute que y'a des chose întérêssantes à Paris. Eune fais j'passis une heuthe ou deux dans l'vièr chînm'tchièthe dé Montmartre. Jé n'criyais pon d'y vaie un tombé en mémouaithe d'autcheune pèrsonne que j'avais connue, mais v'la tch'i' montre qué nou peut s'tromper! Jé n'tais pon bein miain d'la grand' porte quand j'appèrchus l'tombé d'Alphonsine Plessis, la janne fille d'Alexandre Dumas fis, et la Marguerite Gauthier dé san livre "La Dame aux Camélias" Chutte pouorre janne fille-là mouothit d'la conseunmption en 1847 à l'âge dé 23 ans. Ch'est vrai qué jé n'l'ai janmais veue, mais s'n histouaithe est bein connue par un tas d'monde dans bein des pays.

En r'fliéchissant d'vant chu tombé-là, j'pensis qu'les distances dé la tèrre lus rappréchent quand nou viage un mio. J'ai 'té dans l'île dé St. Domingue où-est qué l'grand-pèthe (lé général Alexandre Dumas) du fanmeux Dumas tch'êcrivit l'histouaithe dé chutte janne fille-là fut né en 1762. L'histouaithe nouos rappréchent du temps passé étout. J'm'èrsouveins qu'un jour j'tais à r'garder, dans l'île dé Martinique (Dans l's Îndes Occidentales du Ouest), la maîson où-est qu'Joséphine Tascher de la Pagerie, femme du Vicomte de Beauharnais et pus tard dé Napoléon, fut née en 1763. Ch'est tout d'mème întérêssant d'viagi!

George d'La Forge