Le Ménage ès Feuvres,
St. Ouën.
Lé preunmyi d'novembre, 1969.
Moussieu l'Rédacteu,
J'né s'sait pus d'chu côté 'chîn d'l'Atlantique quand ou vèrrez chutte lettre ichîn dans la gâzette. J'éthai crouaîsi la mé - mais à trente-trais mille pids en l'air, et j'n'en éthai mème pon veu fort. À chutte hauteur-là nou n'vait qu'des nuages en d'ssous d'sé. I' sont bliancs comme la né, et quand nou vait eune taque tch'est mannièthement bliue ch'est la mé tchi s'montre viyant tch'i' y'a un creux dans les nuages.
La dreine sémaine en Jèrri fut bein trop courte. Ch'est tréjous d'mème. Nou veurt dithe À la préchaine à touos l's anmîns et pathents, et nou finnit par en mantchi tchiques-uns, mème des pathents. Ch'est seux qué quand j'éthai des nouvelles à Noué d'mes couôsîns Briard dé St. Brélade, i' m'dithont: Tu n'vîns pon nouos dithe 'À la préchaine' dévant t'en aller en Améthique! Et ma couôsinne Elizabeth (la femme à man couôsîn 'Dâlpheusse George), tch'est seurvillante dans l'office du B.U.A., m'êcritha probabliément la mème chose étout - et auve toute justification. Et y'en étha bein d'autres. Mais tch'est qu'ou voulez, bouannes gens, les jours né sont pon longs assez pour faithe tout qu'nou voudrait faithe. J'fais d'man mus - comme les vieaux tchi lus êtrangl'yent! Nou n'peut pon faithe pus. À touos les cheins qu'j'ai mantchi d'aller les vaie, j'lus d'mande dé m'estchûser - ch'n'est pon qué jé n'pense pon en ieux - et j'êprouvethai à aller les vaie deux fais à la pliaiche dé ieune l'année tchi veint!
Ès cheins tchi m'ont êcrit des lettres et qué j'n'ai pon ieu l'temps d'les rêpondre, j'lus d'mande dé m'estchûser étout. J'èrmèrcie sustout Madamme B. Langliais, dé Rockvale, à Millbrook, pour sa charmante lettre. Ch'est auve grand pliaisi qu'j'ai liu d'dans qué Mad'mouaîselle Cornille, dé Villedieu-les-Poëles, en Nouormandie, est d'charme et qu'oulle est contente d'aver veu mention d'La Fond'die des Clioches, dé tchi qu'oulle est la propriêtaithe, dans ma lettre du 26 d'juilet.
J'èrgrette, étout, d'n'aver pon ieu l'temps d'aller vaie l'Sieur G. E. Carré, d' Santa Maria, à St. Sauveux, un Gris-Ventre comme mé, pour lî dithe combein qu'sa lettre du mais d'juîn m'fît pliaîsi. Dans des temps j'mé dis à mé-mème tch'il est temps qué j'tchitte à êcrithe ches lettres ichîn, pensant qu'les gens sont p't êt' enn'yés d'liéthe man griffouoillîn s'maine auprès s'maine, et pis j'èrché eune lettre comme la cheinne au Sieur Carré et ch'la m'encouothage à continnuer. Eune chose tchi m'fît pliaîsi étout l'aut' jour 'tait quand l'Sieur Sydney d'Aubert dé Dgèrnésy m'dît tch'i' y'avait deux-s'trais Dgèrnésiais tch'étaient bein întérêssis à l'liéthe, man griffouoillîn! Et j'sis bein èrconnaîssant à Moussieu Harrison pour aver continnué si longtemps à m'pèrmettre d'otchuper eune colonne dans sa fanmeuse gâzette!
Les gens m'dîsent tchiquesfais: Pourtchi qu'ou n'restez pon en Jèrri pour bouan, don? Eh bein, i' n' ya rein qu'jaimethais mus, mais j'éthais à mé s'pather d'toute ma fanmile - ma fille et s'n homme et mes p'tits êfants, et mes chîn fréthes et deux soeurs, tchi sont tous dans l'Améthique du Nord. Mais quand j'sis là-bas j'ai la jouaie touos l's ans d'attendre fête au mais d'mai pour m'en r'vénîn en Jèrri! Et j'm'en vais continnuer à r'vénîn lé r'vaie, nouot' pétit Jèrri, aussi longtemps comme lé Bouan Dgieu m'en don'na la forche. J'allais quâsi dithe nouot' vièr Jèrri, mais ch'n'est pus l'vièr Jèrri du temps passé. J'y pensais l'aut' jour quand j'tais en ville et qué, pour la preunmié fais dépis l'êté, j'pouvais marchi dans les rues sans êt' bostchulé par eune foule dé touristes tchi marchent à bein près aussi vite comme des lînmaches et tchi s'arrêtent toutes les deux marches à r'garder l'galînmatchias d'm'luques et d'mannes à fou qu'nou vait dans les boutiques ches jours, et tch'il' acatent viyant tch'i' craient tchi sont miyeu marchi qu'en Angliétèrre!
I' change touos l's ans, Jèrri. Et y'a mains d'Jèrriais à m'suthe qué l'temps va. J'ai 'té à huit entèrrements d's anciens ch't êté. J'espèthe quand mème qué les cheins tchi restent s'en vont voter pour les bouans candidats pour Sénateu. J'viyais dans la gâzette l'aut' sé qué l's unions r'quémandent à lus membres dé n'voter pon pour les candidats tchi n'adoptent pon les huit points tch'il' ont décidé êt' nécessaithe pour sauver l'Île. Tch'il affront! Comme si les Jèrriais avaient à lus soumettre à des drôles d'idées tchi n'sont pon Jèrriaises! Si ches huit points-là 'taient adoptés, les taxes erdoubliéthaient touos l's ans! Heutheusement qu'j'avons acouo des campangnards dans L's Êtats tchi n'ont pon oublyiyé comment dithe Contre!
Enfin, espéthons qué l's êlecteurs éthont l'avis d'êlithe les cheins tchi sont prêts à r'présenter tout l'monde dans les dêlibéthâtions dans la Chambre. Dans l'entrétemps, i' faut qué j'm'arrête en vouos souhaitant, bouanne santé, bouanne chance et bouan appétit - et bouan amendement ès anmîns tchi n'sont pon robustes. Et en m'en allant, j'vouos dis mèrcie pour vouot' hospitalité châque fais qu'j'èrveins en Jèrri, et À la préchaine èrveue!
George d'La Forge
Viyiz étout: