Auprès des neuches aut'fais, comme en bein d'autres occâsions sans doute, nou-s-avait un grand festîn. A la r'vénue d'l'églyise, lé mathié et la mathiée et lus fanmil'yes, et ofûche des anmîns, 'taient conviés à un repas à méjeu, atout rouelle dé boeu, jambon, podîn et gâche à corînthe et, comme bouaisson, du cidre et du vîn caud êpici. Lé rêvillon s'faîthait auprès ch'la et nou dansait et chantait toute la niet. Mais à la tchête dé la niet les vaithîns et autres tchi n'taient pas des neuches v'naient à l'entou d'la maiethon pouor tither en l'air à traits d'arme, lus rêcompense étant eune fais à béthe (ou pus!) dé d'dans la jougue, à la santé des mathiés.
Lé dînmanche en r'vénant, les nouvieaux mathiés allaient à l'églyise à l'exprès pouor "payi lus r'gards". Et nou trouve même qué les "registres ecclésiastiques" en faîthaient note.
La couôteunme du péthe à donner sa fil'ye en mathiage, sans doute, en Jèrri comme par ailleurs est d'originne païenne. Mais ch'la ch'est eune autre histouaithe. Comme étout les vielles couôteunmes du garçon à pliaichi la bague sus l'dé d'la fil'ye, et dé tchitch'un a env'yer un soulier ou eune chavette souotre la vouaituthe des mathiés en sortant pouor lus leune dé myi.
J'avons veu nous-même acouo cèrtaines dé ches vielles couôteunmes n'y'a pon tant d'années, comme la tith'thie d'armes et la flianqu'thie d'chavette.
La vielle couôteunme d'env'yer d'la gâche dé neuches étout sé fait acouo, et les nouvieaux mathiés s'attendent d'aver eune mâsse dé présents d'partout !
Y'avait même dé pus vielles couôteunmes qué ch'la aut'fais, y'a tchiques chents ans, et nou-s-en trouve mention dans cèrtains vièrs dotchuments.
Quant à la noblièche dé l'Île, la cérémonie d'neuches sé faîthait l'temps pâssé auve un grand êcliat et, du tèrme, nou-s-en trouve des accomptes dans cèrtains vièrs èrgistres, et cétéra.
Viyiz étout: