Je m'sîs-ti lamentè!
Nièt et jeu che n'tait qu'piaîntes. -
Mais je m'sîs r'contentè.
Ch'est passè! - n'y-a pûs d'craînte.
Tu m'as bein jouè,
Ma Lîzabèt!

J'nos z-tion' hântès treîs ans.
J'li-avais baîlli la bague
Et un tas d'biaoûx présents. -
Autant baîli des hagues :
Car ou' m'a jouè,
La Lîzabèt!

Ou m'a tout, tout r'touânnè:
Ou n'veur rein d'mes gaufèches.
- D'vant mé ch'est parfannè. -
Tch'est qu'ou' voulèz qu'j'en faîche?
Ou m'a r'buttè,
La Lîzabèt!

Ou m'app'lait sân pouochin;
Mé, j'l'app'lais ma poulètte!
- Et jammais d'grommâchin -
Tout allait sûs rouôllèttes!
Et tu m'as jouè,
Oh! Lîzabèt!

Oul' a trouvè miyeu :
Un grand peûle à moustaches!
Ch'est vrai - j'n'ai jammais ieu
Pé, n'fau-pé, sûs la fache!
Et ch'là y fait,
Pour Lîzabèt!

Là-là : j'n'en mouôrrai pas!
Djeu-mèrci! - des hardelles -
N'ou z-en trouve à touôs pas
D'aussi bouanne'! - et d'si belles! -
En quantitè,
Ma Lîzabèt!

Ah! si tân moustachi,
Un biaou jour, t'abandonne;
Tu n'paieras pas trop chi
La painne que tu m'donnes! -
Tu-en éras r'grèt,
Ma Lîzabèt!!!

Bèrnabè.
Sept. 1904.