Le temps passé, guai comm' pinchon,
J'aimais à être en compagnie,
Ach't'eu je ne m'en soucie pon,
Le pus grand pliaisi de ma vie
Ch'est d'être tranquille à man tout-seu',
Et d'songi d'mêm' le long du jeu' -
Dis mai Nancy,
Dis-mai, comment chla se fait-i' (bis)

Aussin pour qu'est qu'oulle à la vouaix
Si captivante et d'si doux yeux?
Pour qu'est que tout san p'tit minouais
Est si gentil et si gracieux?
Ou que n'ai-je, en partage, un coeu',
Mains tendre et prompt à prendre feu?
Car chest, je l'sens,
Ch'est-tout ch'la qui m'a coulé d'dans! (bis)

Quand ou' n'est pas présente, i' m' semble
Que tout est trist', je n'cherch' que lyi,
Pourtant quand j'la vai v'nin je tremble,
Et n'ose à pein' l'envisagi,
Et si je touch' sa rob', sa main,
Le coeu' me bat, un frisson m'vent,
Je perds la tête,
Nou dirait que j' s'rais dev'nu bête. (bis)

I' faut qu'ou m'ait enchorchélé,
Car ben ou pas, i n'y a pon d'soin,
Tout chen qu'ou dit, tout chen qu'ou fait,
Me contente, et me paraît ben.
L'aut' jour ou m'pili drait sus l'pi',
Eh ben! j'en étais tout réjoui!
Ouij'en sis là,
Qu'ou m' ravit même' quand ou m'fait ma. (bis)

Je n'gagn' ren d'aller à l'église,
Dans l'état d'minsère ou'est que j'sis,
Car s'oulle est là, faut que je l'dise,
Je n'lis pon fort ma liturgie.
Ou si j'y r'garde quiqu's instants,
Je n'sai pon comme-est que j'my prends,
Tréjous la page,
Comm' par exprès, s'ouvre au mariage! (bis)

V'la déjà trop longtemps qu'chla dure,
I' faut que j'sache enfin man sort,
J'irai ly dir' tout ch'que j'endure;
Je pri'rai et pliaid'rai si fort,
Qu'ou finira par m'écouter.
Ah! mais - s'oulle allait me r'fuser!
Hélah! Hélah!
Je crai-mai que je n'irai pas! (bis)

LAELIUS.