Et bein, j'ein peux pas l'comprendre, j'ein sis pas pièthe qu'eunne aoutre,
Chn'est pas manque que j'nai fait les doux yieux; vraiment chn'est pas d'ma faoute.
Quand y sont v'nus siez nous, ils ont yieu de bouans fricots,
De bouannes beurreais de bian, et de pain d'biet et des v'licots.

Tchique fais t'chet d'lândguille sec où d'la mouethue,
Pour les atriotchi, j'faîsais tréjous d'mans mus, .
Et quand j'avaîsmes du poulet et du podein,
J'dîsais tréjous à mêmée, d'mande à tchiqu'uns de v'nein.

Je voulais lus môtré tout chein que j'pouvais faithe,
En enn mot: j'faisais tout en man pouvé pour lus pièthe;
Ni doux yieux, ni doux mots, ni caresses, ni fricots;
N'ont yieu aoutcheun êfet, chest des eingrats, des sots.

N'yia pas rein d'surprenant que j'en sis êtonneaie,
Qu'après tout m'enbarras, je sis ouquo resteaie,
J'ai ouquo espérance; yian a qui sont d'mandeais,
A l'âge de septante ans, et qui sont bein mathiées.

Faut y donc que j'reste au coin de m'nâtre,
A hôté, a soupithé, a geindre, (du d'giartre),
Si j'reste vieille fille, j'ein sça pas ma foaute:
J'men vais faithe la carre a yieun où à l'aoutre.

Il est vrai: J'sis engniée d'être tréjous toute seule;
Avec le t'chian, et la catte, dans ma p'tite démeuthe,
Je kaouffe mes pouors pids tréjous devant m'couochit,
Avec la catte arronnée d'vant l'feu, et l'tchian auprès yi.

Je s'çait bein mus pour mé d'avé d'la compagnie,
Les séthaies sont si longues: hélas!! qui m'engnie.
Je rôtis des châtaignes, des fèves, t'chique fais des pommes,
En les mangennt, je pense que j'sais bouanne à eun homme.

Si seulement ils sçavaient, j'sis seuthe quo y tâchaient
D'avé eunne introduction pour pouvé v'nein m'vais,
Et pis j'ai eun p'tit ervenu, chest eun encouoragement,
Du bieau meubïye, d'largentie, pot-à-theais en argent.

Combein d'lermes que j'ai verset,
Quand j'ein dormais pas la gniet,
J'étais si engrouteais, que j'en avais l'hitchet,
Et mes yieux touos rouoge, et man pouor nez enfiet.

Oh! mais je meurs d'envie,
D'avé d'la compagnie;
Venaies, je vos en prie,
Qui m'engnie!!! Qui m'engnie!!!!

Georgie