Pour faire bouilli lus chaodières,
Que de peinnes et de misère,
Les pouores gens ont ichin bas!
Misère ben grande, hélas! hélas!
Faut travailli tout' la semaine,
Pour ben rempli la bédaine,
De sa femme et d' ses avers,
Et acouore, tout va d'travers.

Quand du dimanche au sam'di,
Un pouores homme s'est écouochi,
A gagni deux s'trais herpins,
Offuche a r'habilli les qu'mins,
I s'en r'vint siez li content,
Fier et riche comme un médiant,
Tout au pus i hape unne dramme.
Apporte le reste à sa femme.

Si veurt aller à l'église,
Le pouor homme d'mande sa q'mise,
Sa femme li dit man garçon
Hier j'navais pon de savon;
Tu sais ben qu'à not'hardelle,
Que' les garçons trouvent si belle,
I fallait quiques ribans,
Pour sortir ov les zefans.

A chu d'vis, notre pouore hêtre,
Baffoué, lassé comme un bête,
Teurt la goule, et d'se gni gaôche,
Demande une nette pâre de caôche,
Car les siennes i sont perchies,
Au talon et but des pis.
Des caôches!... Et mon pouor éfant
Tu mins les drains en t'n'allant.

Ni c'minse, ni caôche, - de viers saôliers,
Une femme faignanne et sept avers,
Une grande hardelle remplie d'orgui,
Et pas de hard's pour se changi;
I' faudrait mus êtr' forbanni
Qu'd'être dans un té guépi.
Pour faire bouilli lus chaodières
Que de peines! - que de minsères!