Quand j'fis man chouais, mé, j'fis unn' lêt bêtize....
J'criyais qu'quand j'sais mariet je s'sais a m'n aize;
Mais ch'na pas tet d'même!.... O Elîze! Elîze!!
Est-i' pôsibl' qu'tuais touânnet si maoûvaîze?
Ah! bain soeux, j'fis un infortunet chouaix;
J'vos l'did, mes garçons, j'em brûli les dais.

...Un jour je r'gardais dans un magâzin -
Unn' boutique à drapi, comme nou l'z'appelle -
Qu'était rempyi du grôsi comme du fin,
Et j'viyais en d'dans d'belles petites hardelles....
Je n'criyais guèr', quand ches filles je vivais,
Qu'jé d'vais en prendr' iunn', et m'brûler les dais!

La veue d'toutes ches jannes filles me fit piaîzi;
J'pensi don qu'j'entrerais à prendr' quiqu'chôze.
J'entre dans la boutique, et qu'mande un suit.
J'nen avais pas bézoin pour unn fierr' pôze:
Malgret chounna, un tas d'sous j'dêpensais,
Et, pour vais ches filles, j'em brûlais les dais!

Ch'entait pas iunn' des jannes filles qui m'servi,
J'pensi don: j'dêpense touos mes sous pour rain.
Pourtant, d'vant que d'chu magâzin sorti
J'en vis iunn de yoeux que j'crus qu'jaimrais bain.
Dommage que j'la vîsse! j'ai penset quiques fais,
Car je n'mé s'sais p'têtr' pas brûlet les dais.

Je r'vîziti la boutique bain des fais -
J'y dêpensi unn' tapêt d'mes herpins -
Pour vée chutt' chièr' janne fille ès doux attraits;
Car, j'lavoue, j'en' tait tout-à-fait êprînt.
Chutt' douoche pétite créyatur', comme j'laimais!
J'l'aimais trop, et j'em sis brûlet les dais.

J'parvins à fair' akouaintance ovec yi,
Et, ou pouets pensé, j'en fus bain content.
J'lî fis LA quesquion, ou m'rêponni "OUI."
Et alors j'fus au haoût d'man content'ment....
Quand ovec Elize l'amour je faîzais,
J'nairaîs jammais creu d'em brûler les dais.

J'tîmmes don acheteu "engagis," comme nou dit,
Et d'mêm j'continuemmes pour devier un an...
Ch'tait la tan bouân temps, pouorr Flip De Gruchy,
Quand tu' allais vé la belle Elîze Bertram!
Tu fus l'pus hoeuroeux d's hommes pour bain douze mais:
Tu n'créyaïs guèr' d'aller t'brûler les dais.

Les biaoûx habits d'Elîze me charmeaient l'ziers:
Ch'tait les belles piummes qui m'mindr' en train d'louêzé.
Faoût i qu'nou s'sait bêtes quand nou z'est avers,
Pour se laissi par unn' belle robe méné!
Si j'avais seu, Elize, chain qu'tu m'couôt'tais,
Je n'cré pas que j'mé s'sais brûlet les dais.

Faoût que j'dich' quiqu'chôze du vêt'ment d'ma Lîze.
Rassouv'nous, djia, qu'j'en sis pas couôturi,
Et pardonnets mé si j'fais quique bêtize,
Car dans l's habits d'femm j'connais bain pti.
J'ai yeu la chance, djia, d'en connaîtr' les frais
D'pis qu'jus l'malheur d'em brûler les dais.

Lîze mettait d' jolies robes en souaie,
D'si belles couleurs comme yûsse à vaie;
Bonnet et chapiaoûx oul avait,
Et, j'vos asseur', tout du pus bé,
Et du miyieu, et du pus chi -
On n'viyait rain trop bon pour yi.
Pour les belles fieurs et les belles piummes,
Oul tait tréjous Numéro Iunn.
Comme de raîson, ou portait vouel,
Et cotiyons bordets d'dentelle.
Ov' chla de rouoges oul' n'avait;
Et pis chut' drinette possédait
Des kioques de premié qualitet,
Et des pus belles châles souos l'solet.
Ses pis taient tréjous bain bottets,
Ses gvoeux taient tréjous bain trimmets.
Et d'même', des pis jusqu'à la tête,
Tout était, nou peu dir', fust-rate.
L's habits taient biaoûx, d'mêm la hardelle,
Ver' djia, la Lîze Bertram tait belle!
Oul avoit unn' jolie p'tite tête -
J'l'admirais tant qu' j'en' tais tout bête.
J'aimais ettout sa belle pare d'yiers -
Ils taient sis brilliants et si niers;
Et les p'tites bianches mains qu'oul avait -
Ch'tait là unn' aoûtr chôze qui m'piaîzait.
J'aimois Lîze, et j'aimais s'n habit:
Je n'viyais pas d'aoûtr' fille comme yi.
...J'ajouot'tai ichin, en pâsant.
Qu'mamzelle tait bain versêt dans l'chant:
Cantiques et chansons ou savait,
Angiais comme Français ou chantait.
Dans la dance n'iavait pas s'nêgal -
Oul tait tréjous r'merquie ès bals.
Quadrille, gallop, châtîze, polka, -
Comme ou jigottait tout chonna!

En mil huit chent chinquant-six j'em maryi, -
Vèr' djia, j'en pari l'premié jour de l'an;
Et partout i fut seu qu'Flip De Gruchy,
V'nait d'prendr' pour sa femme la fille Jean Bertram.
Yen a qui dîr'nt, à ch'qué j'ai oui quiqu'fais,
"Ne vla un cor qui s'est brûlet les dais!"

J'criyais pâsé ov Lize unn' hoeûroeûze vie;
Mais j'n'avais pas tet mariet pus d'trais mais
D'vant trouvé qu'tout n'allait pas à m'n avis,
Et qu'ma Missis voulait porter les brés.
J'em dî don, "Man pouorr Flip, te v'la bain grée:
"En prenant femme tu t'es brûlet les dais!"

Lîze Bertram - acheteu Missis De Gruchy -
N'tait pas la hardelle à mettre à mênnage.
Oul est faîgnianne et pienne de maoûvêqui;
Oul est gronnarde, et vain dans dîtelles rages
Qu'je n'sé qui lî fair' pour avé la paix,
Ah! quand j'la prins j'em brûli ti les dais

J'sis ach'teu fâyi, et pal comme un mort,
Parce que Missis veur porté d'biaoûx habits,
Et qu'pour les paiyi j'mêcouoche le pouôr cor
Le long des jours et unn' partie des gnies.
Quand j'em maryi - je l'dis ocouor unn' fais -
J'fis unn grand mêprinze, et m'brûli les dais.

Garçons! n'hantets pas d'filles pour lus biaoûtet.
Sus tout, n'appréchis pons des belles attouettes.
Prenets quique fille rempyie d'activitet,
Et qu'iait un mio d'sens-commun dans la huette.
Ou vaindrets à tard ov touos vos regrets
Quand, comme mé, ou vos s'sets brûlet les dais.

Les jolies p'tites mains n'font pas grand travas.
Cherchis des femmes qui piessent vos pânnais foui.
Pour des filles de boutique n'en prenets pas,
Car à mio d'travas i n'veulent se touôyi.
Ah! si j'tais garçon j'sé bain qu'iest qu'jé frais;
J'nîzais pardingue pas me r'brûler les dais.

J'prendrais unn hardelle sans orgyi -
Iunn' qui porterait simpl' habit -
Qui ne r'fûz'zait pon d'travâyi
D'poeux d'ses belles petites mains sali.
J'voudrais lî vée un fro tout dret
Comme les filles mettaient l'temps pâset;
Et pis d'bouans cotiyons d'fiannet,
D'doeûse-trais couleurs en variétet.
Des souyiés comme ès temps d'jadis
S'sait ch'qué voudrais l'î vée és pis.
Les saoûlers en quui, bain graissis,
Valaient mus qu'toutes les bottes fieuries.
Yia des filles qui craient êtr' bain belles
Quand il ont parasol et vouel,
Et sont bringyis comme des d'mouêzelles -
Je n'voudrais pas unn' telle hardelle.
J'dân'nais les jacket à p'tite tâle;
I n'sont mins qu'par des rain-qui-vâles -
Nou vé ditet à toute la knâle;
Pour de mé, j'aim' mus vée unn' châle.
Jé n'prendrais sé m'nâge pas d'danceresse;
Mais j'aimrais assêt bain, j'confesse,
Unn' fiyette qui s'sait bouann' chant'resse -
Pas iunn', gyi, qui piâl'lait sans cesse.
Pour trouvé quiqu'chôze de parfait,
J'irais dans l'Nord de la Trin'tet.
J'sérais mus qu'fair' que l'temps pâset:
L'êzpreuves m'ont fait v'nin espritet.
Je n'macosterais pas d'vilaîzes;
I sont faingniannes et maoûvaîzes -
I n'font RAIN - i n'sont pas si niaîzes! -
Ch'qui lus piaît, ch'est d'être à lus aîze
Tranquill'ment assîzes à rain n'fair',
A r'passé quique livre d'istouèr'.
Garçons! - j'vos ai contet ma brévièr':
QU'OU VOS RENDES SAGES! - ch'est ma prièr'.

SIAT'NIRT NU
1864