Et Jésû faîthait c'mîn pouor Jérusalem, ensîngnant par les villes et par les bourgs.

Et tchitch' uns lî d'mandîdrent: Seigneur, n' y' a-t-i' qué p'tit d'gens tchi piêssent êt' sauvés?

Et i' lus rêponnit: Faites dé vouot' mus pouor entrer par lé p'tit us; car dévrai jé vouos dis qué gentiment d'gens chèrchéthont à y'entrer, et né pouôrront nullement.

Et quand l'maître, siez li, étha freunmé l'us, et qué vous, étant d'houors, ou vouos m'ttez à capuchi en d'mandant: Seigneur, ouvre-nous!, i' vouos r'poqu'tha: jé n'sai pon d'où'est qu' ou-th-êtes!

Et pis ou-th-éthez bieau lî dithe: J'avons mangi et bu à canté té, et tu'as ensîngni à l'ouvèrt dans nouos rues siez nous, et i' vouos rêpondra dèrché: Jé n'sai dgéthe dé où'est qu' ou-th-êtes; dêcârr'-ous d'ma vaie, achocres, touos vous tchi n'chèrchiz qu'à faithe ma.

Ch'est là don tch' il y'étha des plieurs et d'la grînch'chie d' dents, quand ou vèrrez Abréhan, Isaac et Jâcob et touos les prophètes dans l'rouoyaune du Bouôn Dgieu, et qué vous ou s' sez fliantchis d'houors.

Ch'est là tch' il en veindra dé l'Est et du Vouêt, du Nord et du Sud, pouor lus assiéthe à tabl'ye dans l'Rouoyaume des Cieux.

Véthe, hardi des cheins tchi sont les dreins es'sont les preunmièrs, et bein d'aut's tchi sont les preunmièrs es'sont les dreins.