Et y'avait dans l'même pays des bèrgers qui vivaient dans les clios, et qui r'gardaient sus lus troupieaux la niet.

Et soudainement un Ange du Seigneur lus appathut, et la glouaithe du seigneur s'êcliatit tout à l'entou d'ieux, et i' fûtent bein êffrités.

Et l'Ange lus dit, "N'ayiz pon d'peux, êcoutez, car j'vos apporte la bouanne nouvelle d'eune jouaie suprême qui s'sa pour toutes les nâtions.

Ch'est aniet, dans la ville dé Dâvi, qu'lé Sauveur tch'est lé Christ, lé Seigneur vos est né.

Et ou lé r'connaîtrez et né v'chîn lé sîngne, ou trouv'thez chu p'tit Êfant bein embonn'té et couochi dans eune crèche."

Et tout d'un coup i' y'avait avec l'Ange eune multitude dé l'armée céleste louant l'Bouan Dgieu et disant -

"Glouaithe à Dgieu, dans l'pus haut des cieux, la paix sus la tèrre et bouanne volanté envèrs les gens.

Et après qu'les anges èrdispathûtent dans les cieux, les bèrgers s'entredîtent "Allons jusqu'à Bethléem pour vaie chein qui s'est arrivé, chein qu'lé Bouan Dgieu nos a fait saver."

Et i' s'en fûtent don en grand' prêsse, et i' trouvîtent Marie et Joseph et lé p'tit êfant qui 'tait couochi dans eune crèche.

Et quand i' l'eûtent veu i' publyîtent partout ch'la qui lus avait 'té dit concèrnant chu p'tit êfant.

Et touos les siens qui les ouîtent 'taient êtonnés dé chein qu'les bèrgers lus disaient.

Mais Marie considéthait toutes ches choses et les gardit dans san tchoeu.

Et les bèrgers s'en fûtent, louant et glorifiant l'Bouan Dgieu pour tout ch'qu'il' avaient ouï et veu, justément comme i' lus avait 'té dit.