Quand il entrit dans Jéricho, i' crouaîsit la ville.

et né v'là un cèrtain houmme, tch'avait nom Zachée, iun des grands mouaissonneurs dé taxes tch'avait un magl'ye dé bein;

et ch'tî-chîn êprouvit d'aver eune bouonne veue d'Jésû, mais i' n'pouvait pon l'vaie car y'avait un amas d'monde et i' 'tait, li, haut coumme eune jûte.

I' couothit don en avant et grîmpit amont un sycomore à seule fîn d'lé vaie, car il avait à pâsser par chu bord-là.

Quand Jésû arrivit là, i' r'gardit en haut et lî dit, “Zacchée, dêpêche-té et vé-t-en car j'm'en vais t'vîsiter siez té aniet.”

D'un ambron, i' d'cendit et, jouaiyeusement, lé m'nit à sa maîson.

Ayant veu chennechîn, les gens fûtent mârris et dîtent, “Il est allé vîsiter un pécheux.”

Zacchée s'èrtouônnit et dit au Seigneu, “Êv'chîn, Seigneu, j'donn'nai la maîntchi d'man bein ès pauvres, et si j'ai prîns autcheune chose înjustément à autcheune pèrsonne, j'm'en vais lyi r'payi quat' fais chein qué j'lyi dais.”

Et Jésû lî dit, “Aniet l'salut est v'nu à chutte maîson car, li étout, il est un fis d'Abréhan.

Ch'est qu'lé Fis d'l'houmme est v'nu chèrchi pouor les cheins tchi sont êdgéthés, à seule fîn d'les saûver.”