Les Pages Jèrriaises

Marchi coumme un Êgyptien



Y'a l'Êgypte en Afrique et y'a l'Êgypte en Jèrri étout. J'sommes un mio à court dé pithamides par compathaîson, mais j'avons au mains un obélisque dans la Grand' Rue. Pouortchi qu'nou-s'app'lait au mains eune partie d'la Grand' Rue - la Rue d'Êgypte? L'explyicâtion n'est pon cliaithe. Ch'tait-i' pouor l'amas d'sablion venté d'sus les mielles par chu but-là d'la Ville? Ou ofûche pouor des boutiques couothues par des Juis, qu'nou mênommait d's "Êgyptiens"? Y'a des théories et des suppositions. L'Êgypte, la cheinne à La Trinn'té, prînt san nom ofûche d'eune camp'thie d'gitans au temps pâssé. Mais tout chenna sembl'ye coumme lé mystéthe du Sphînx, mié-muchi souos l'sablion.

Y'avait d'l'întéthet dans l'Êgypte, j'veurs dithe lé pays Afritchain, auprès les dêcouvèrtes du c'menchement du dgiêx-neuvième siècl'ye. La maîson tch'a nom "Egyptian Lodge" à la carre d'la Rue du Va et la Rue Midvale mouontre l'înfluence d'l'architectuthe Êgyptienne dans l's années 1830s. Mais la pus grande înfluence sus l's êtudes Êgyptiennes 'tait la dêcouvèrte épis la dêchiffréthie d'la Pièrre dé Rosette. Ch'fut l'Coronel Hilgrove Turner (d'la fanmil'ye Hilgrove dé Jèrri) tchi prînt chèrge d'la pièrre stchulptée pouor l'accompangni à Londres sus l'navithe prîns ès Français lé "NSM Egyptienne". S'lon chein qu'i' dit, ch'fut li tch'avait gaffé la Pièrre pouor c'menchi, tout coumme i' 'tait antitchaithe et ardguit qu'les antitchaithes dé Londres dévthaient aver l'opporteunité d'l'êtudier d'vant qu'ou fûsse transféthée au Musée Britannique. Messire Tomkyns Hilgrove Turner d'vînt Lieut'nant-Gouvèrneux d'Jèrri 1814-1816.

J'ai dit qué j'sommes à court dé pithamides en Jèrri, mais j'avons au mains ieune et ch'est la cheinne dans l'Vièr Marchi. Quand la statue du Rouai George II fut pliaichie là en 1751, lé piédestal 'tait pithamida, ch'est à dithe en forme d'eune pithamide. La statue don 'tait mênommée "La Pithamide", et même auprès l'rempliaichement du piédestal en 1819, chu mênom-là enduthait. S'lon un diton, nou dit "haut coumme la Pithamide du Vièr Marchi" - bein haut.

Geraint Jennings

 

Viyiz étout:

 

Les Pages Jèrriaises