Abbaye dé la Lucerne
Nouormandie
Lé 9 d'Août, 1975

Moussieu l'Rédacteu,

M'èrvélà dans l'air paîsibl'ye dé l'Abbaye dé la Lucerne, en Nouormandie. Ch'est, comme si j'tais dans un aut' monde-lé monde du temps pâssé où'est qu'la trantchilité 'tait eune affaithe dé touos les jours. Nou peut dithe qu'ichîn rein n'a changi d'pis les dêgâts occâsionnés par les dgèrres dé la Révolution tchi détruisidrent partie d'l'abbaye, sénon qué les travaux d' restaurâtion, ouaithe qué r'tèrgies par lé couôtement d' matériel et d'la main d'œuvre, c'menchent à li r'donner s'n appathence d'aut' fais. Et pis, ch'n'est pon seulement l'abbaye tch'avait bésoin d'restaurâtion: Lé colombyi, par exempl'ye, cèrtainement iun des pus bieaux colombièrs dé Nouormandie a 'te restauré, et ch'est l'intention d'l'Abbé actuel d'en faithe chapelle pour l'ûsage des prêtres Anglyicans tchi veulent dithe lus Mêsses en pâssant quand i' sont en viage. L's anciens abbés dé La Lucerne 'taient seigneurs dé cèrtains fieurs en Jèrri, il' avaient l'drouait d'aver un colombyi. Et pour lé moment, l'êtang d'l'abbaye est en train d'èrpathâtion. Ou-s-allez mé d'mander s' i' y'a telle chose comme d'èrpather un êtang? Eh bein, ch'ti-chîn est hardi grand et profond à des bords. Il a 'té viédgi, et les machons sont à bâti des fortes muthâles tout l'tou pour empêchi l's êcrouôlements des bords viyant tch'il' avaient c'menchi à donner. Y'a eune grand êtendue dg'ieau, et comme lé colombyi, tch'était l'habitant d'un tas d'pigeons pour fourni d'tchi nouôrri l's habitants d'l'abbaye, l'étang fournissait du paîsson pour la même raison.

Ieune des choses que l'pâssage du temps n'a pon changi est lé langage des sèrvices dans l'églyise dé l'abbaye - le latîn. Et la vouaix d'ses clioches, restaurées à lus pliaiche dans l'cliochi, n'a pon changi n'tout. Nou la ouait trais fais par jour annoncer l'Angélus à toute la contrée à l'entou. Ch'est l'appel à la priéthe, et ch'est eune mûsique tch'est bein pus belle qué l'son du “Klaxon” des motos et du tîntamarre dé tambours, dgitâres et mandolinnes qué les jannes appellent d'la mûsique dé nouos jours. Et l'chant Grégorien, majestueux et “cadence”, des “Matines”, des “Laudes” et des “Vèpres”, est comme si ch'tait eune priéthe sanctifiée qué nou ouait dans la distance, trantchil'ye et persistante dans sa mission d'chanter les louanges dé Ses fidèles au Bouan Dgieu.

Et l'combl'ye d'l'adorâtion du Père Céleste fait s'n appathence dans la célébrâtion d'La Sainte Cène quand célébrants et fidèles, rêunis dans San sanctuaithe tèrrestre, lus vouaix sé joignent auve les cheinnes des Anges Archanges, pathents et anmîns décédés, et dé toute la compangnie des êlus au Ciel, en chantant l'Sanctus”- “Saint, Saint, Saint, Seigneur Dieu des armées, les cieux et la terre sont remplis de Ta gloire: à Toi soit gloire, O Dieu très- haut. Amen.”

Ch'est r'mèrquabl'ye comme nou s'accouôteunme vite à tout. Ichîn dans la trantchilité auve les bouais tout alentou, la veue des bestchieaux à paître dans les prés, lus bûlement à peine ouït dans la distance à l'accompangnement du chant des ouaîsieaux dans les bouais, nou-s-oublyie tch'i y'a d's êvénements heutheurs ou tragiques, tchi s'pâssent dans l'monde en d'houors du son des clioches dé l'Angélus.

Si j'avais 'té en Jèrri mêcrédi pâssé, par exempl'ye, j'éthais 'té întérêssi d'saver l'rêsultat d'l'êlection pour Sénateu dans L's Êtats, mais ichîn ch't êlection-là avait pèrdu s'n importance dans m'n idée. J'pense bein, tout d'même, qué man vièr Mènage est acouo à m'attendre à sa pliaiche dans La Route des Landes, salué deux fais par jour par les belles vaques à Moussieu Percy L'Masuthi en c'mîn pour lus pâtuthe, et protégi par “Micki”, san p'tit nièr gardgien fidèle, lé tchian à Mdme Chapman tchi géthe sa chèrge d' gardgien à haute vouaix quand tchitch'un entre dans l'bel. Et qu'La Bèrgéthie, seule èrprésentante d'eune îndustrie longuement dispathue en Jèrri, est acouo là, sans doute appathentée au Ménage ès Feuvres par lé pâssage des siècl'yes tch'ont veu lus naîssances dans l'tout vièr temps jadis.

Et j'pense bein qu'l'estatue d'la Reine Victoria est acouo sus la cauchie à faithe sèrvi d'pliaiche d'arrêt et d'convénience pour mauves et pigeons, car La Bâtale dé Flieurs pathaîssait pus importante pour l'ûsage dé la main d'œuvre disponibl'ye ès autorités qué les travaux nécessaithes pour la mett' dans san nouvel empliaichement!

Mais quand j'èrveindrai en Jèrri la s'maine tchi veint, j'vèrrai toutes les nouvelles dans vouot' supèrbe gâzette, Moussieu l'Rédacteu. Et j'éthai à oublier la trantchilité d'l'Abbaye d'La Lucerne et mé raccouôteunmer à m'dêcârrer dêliêment et m'fouôrrer dans l'fossé quand les motos m'pâssont à quarante milles à l'heuthe dans les p'tites routes. Et à mett' ma pacienche dans ma pouchette quand j'èprouvethaî à marchi vite dans les rues d'la ville. Enfin, l'pliaîsi d'èrvaie Jèrri et touos mes bouans anmîns es'sa ma récompense!

George d'la Forge