San Antonio, Texas, U.S.A.
Lé 14 dé Févri, 1976
Moussieu l'Rédacteu,
Quand chutte lettre ichîn arrivetha en Jèrri, jé s'sai en Califournie – en visite siez eune bouanne St. Ouënaise et Jèrriaise, Madanme Sydney Triggs, née Eva Mauger Carré. Ch'est vrai qu'ou d'meuthe un but d'ichîn, eune affaithe dé quatorze chents milles, mais quand des Jèrriais d'meuthent à l'êtrangi et tchi veulent sé vaie, les distances né content pon. Et quand des gris-ventres s'entre rencontrent n'împorte ioù, ch'n'est pon d'l'Anglaîchin'nie tchi pâlent, et ch'est seux qué l'Jèrriais d'St. Ou s'en va adouochi l's ouïes des gens d'Califournie pour tchiques sémaines.
Dans ma dreine lettre j'vouos disais qué j'n'avais pon 'couo veu l'rêsultat d's êlections du mais d'dézembre pour Députés. Eh bein, chutte fais j'ai ieu la chance. La gâzette du 18 dé dézembre est v'nue. J'tais si prêssi d'vaie les rêsultats qué j'l'ai quâsi trilyie en l'ouvrant ! V'la tchi m'a donné eune grande satisfaction d'vaie qué l's êlecteurs ont ieu l'avis dé voter comme i' faut, chein tchi montre ès cheins tchi veulent boulevèrser tout qué les Jèrriais ont acouo assez d'paids dans lus manches pour continnuer à supporter la sorte d'gouvèrnement tch'a asseûthé la prospéthité tch'a tenté tant d'Angliais et d'êtrangièrs à faithe lus d'meuthe en Jèrri.
En mème temps, j'ai grand r'gret d'vaie qué l'Sieur Ernie Gaudin n'a pon 'té ré-êlu. Nou sait bein, sans doute, tch'i' faut tch'i' y'ait des gângnants et des pèrdants dans toutes êlections, mais l'Sieur Gaudin a fait d'si bouan travas dans L's Êtats pour vîngt-sept ans d'temps qué j'ai 'té êtonné qu'les St. Cliémentais l'ont si mal rêcompensé. J'ai tréjous ieu du pliaîsi en liêsant ses discours, car i' n'avait pon d'peux d'dithe chein tch'i' pensait. Eune vraie réchinne d'îndépendance Jèrriaise, ch'tî-là, et i' faut qu'les Jèrriais lus buttent sus lus pids d'driéthe s'i' veulent consèrver l'îndépendance dé l'Île dans ches temps 'chîn.
P'tit à p'tits les bouans vièrs noms Jèrriais dispathaîssent. En liêsant les noms des Députés d'la ville tch'ont 'té êlus, j'vai tch'i' n'y'en a qué quatre sus les dgix tch'ont des vrais noms Jèrriais. J'sis bein content qué l'Sieur John de Carteret a 'té êlus à St. Louothains. Ch'est seux tch'i' y'avait ieu des d'Carterets dans L's Êtats pour des chents ans, et il est grand temps d'y'en r'mettre.
Les accidents d'moto continnue à faithe du travas pour l's entrépranneurs d'entèrrements. Trais morts dans la mème sémaine – iun dans la gâzette du 11 dé Dézembre et deux dans la cheinne du 18. Ch'est seux que la vitesse a ieu hardi à y faithe dans bein des cas des pèrsonnes tuées dans l'année tchi veint dé s'pâsser. La vitesse et la bouaisson sont les grandes causes d'accidents mortelles. La preuve en est qué dépis qué nouot' Président ichîn en Améthique nouos a fait réduithe la vitesse en auto à 55 milles à l'heuthe à la pliaiche dé 70, y'a ieu un tchièr dé mains d'pèrsonnes tuées dans les routes.
I' faut donner tout l'crédit tchi li'est deu au sŷndicat des travailleurs "Transport and General Workers Union" pour aver présenté eune machinne dé ressucitâtion "cardiaque" à l'Hôpita. Un magnifique présent. J'tais content d'vaie l'portrait du Sieur Liron à la cérémonie d'présentâtion, et comme j'l'ai mentionné d'vant, i' pathaît bein mus sans san chapé jutchi sus l'haut d'sa tête. Et ch'est mangnifique dé vaie, étout, qué les membres du sŷndicat avaient ieu si bouan tchoeu tch'il avaient donné assez d'sou pour faithe des présents ès aveugl'yes et ès êfants tchi ouaient haut.
J'ai r'gret d'liéthe dans la gâzette qu'eune aut' églyise, "St. James", s'en va êt', nou peut dithe, freunmée, viyant qu'ou s'en va êt' sans Vitchaithe. Auve St. Simon à l'abandon étout, né v'la deux belles églyises à bein près freunmées. Ch'est tragique. L's aubèrges prospéthent dé pus en pus, l's officièrs et clèrcots du gouvèrnément grandissent en nombre et couôtent pus à m'suthe qué l'temps s'pâsse, mais l's églyises - maîsons du Bouan Dgieu sus la tèrre, tch'I' nouos accorde touos nouos bein-faits - dînminnuent. Tchi pataflias, mes frères !
George d'La Forge
Viyiz étout: