San Antonio,
Lé 24 dé févri, 1979.
Texas, USA.
J'ai r'chu la gâzette du 28 dé dézembre tchi nouos donne les noms des nouvieaux présidents des Conmités d's Etats. Jé n'sis pon assez à même dé la politique ni des capacités et pèrsonnalités des membres d'la Chambre pour saver si les chouaix sont les miyeurs. J'sis eclyîn d'penser qu'ouï, car j'sis impressionné par la r'mèrque du Sénateu Ralph Vibert qué les membres êlithent les présidents d'conmités en prenant en considéthâtion lé travas tch'i' font en conmité et dans la Chambre même. V'la tchi m'pathaît raisonnabl'ye et d'bouan sens. Lé fait qu'eune pèrsonne ait ieu la màjorité des vouaix du peupl'ye dans eune élection né veurt pon dithe qu' oulle est la pèrsonne la pus qualifiée pour prendre la responsabilité d'présider cèrtains conmités.
Nou comprend bein, sans doute, qué les cheins tch'ont 'té à la tète d'un conmité, comme lé Député Farley tch'était en chèrge du Départément d's Egouts dépis 1955, daivent aver chose d'èt' rempliaichis, mais ch'est à la chance dans la politique, et comme nouos l'dit l'vièr diton: "Tchi sèrt lé publyi sèrt un îngrat!"
Y'en a d'toutes les sortes, dans la gâzette du 28 dé dézembre. Y'a, pour sauter du coq a l'âne, l'annonce qué iun sus châque êfant né dans l'Île est né en bâtardise. Si nouos vièrs pouvaient r'vénin ci vaie d'ité il' éthaient d'la péine à l'craithe. Mais s'i' viyaient les noms des naîssances dans la gâzette, i' dithaient sans doute: "Ch'n'est pas des Jèrriais tchi naissent en Jèrri - èrgardez-mé ches noms ètrangièrs-là!" Ch'est bein vrai.
Sus treize naîssànces dans la gâzette, i' n'y'en a qu' deux tch'ont des vrais noms Jèrriais. et y'en avait rein qu' quatre sus eune douzaine dans la cheinne du 14 dé dézembre. Malheutheusement, nou-s-en vait pus dans les décès. I' n'y'a pon d'doute qué la race Jèrriaise dispathaît à grands pas en Jèrri, et oulle est sans doute mêlée auve d'aut' races à l'êtrangi.
J'tais bein content d'vaie l'portrait d'man vièr anmîn Laïesse Balleine et sa danme à l'occàsion d'lus neuches d'or, et j'lus souhaite acouo bein d's années d'santé et d'bonheu. Laïesse èrsembl'ye à san p'pée comme deux d'goûts dg'ieau. Ch'est r'mèrquabl'ye qué La Chasse a 'té dans sa fanmil'ye pour trais chents ans, lé même nombre d'siècl'yes comme Le Ménage ès Feuvres a 'té dans la meinne. Né v'la chein qu'nou peut dithe du vrais tèrryi Jèrriais.
Eune articl'ye tchi m'amuse dans la gâzette est la cheinne tchi nouos dit qué 1978 est l'année qué les fèrmièrs tchi craîssent des patates ont dêcouvert tch'i' n'peuvent pon tréjous faithe un gros profit. Sàbre dé bouais et pistolet d'pânnais! I' savaient bein ch'là quand j'tais mousse y'a pus d'huiptante ans! Man Papa L'Feuvre, tch'était forgeux, l'savait bein étout - à sa pèrte. Dans chu temps-là les fèrmièrs payaient lus comptes à la forge eune fais par an, auprès la saîson d'patates. S'il' avaient eune mauvaise saison, sans pâler d'faithe du profit, i' n'pouvaient pon payi. Papa, tch'étàit la bonté même, n'éthait janmais pensé d'lus env'yer bille ou d'lus faithe d'embarras, ch'est en tchi lus pèrte était la sienne étout, et i' mouothit pauvre. S'il avait peu r'chéver les sou tchi lî'étaient deus il éthàit 'té riche. Les pouôrres dgiâtre d'fèrmièrs né sont même pon seux d'faithe assez pour couvri lus frais, sans pâler d'profit. Et, i' n'peuvent pon s'mett' en grève ni r'fûser un hauchissement d'gages dé 11.6 pour chent comme les empliyés d's Etats, tchi sont dêjà bein payis en mauvais temps comme au solé.
Eune articl'ye tchi m'fait pliaîsi est la cheinne tchi nouos dit qué l'Assembliée tch'accorde des licences ès aubèrges en a r'fûsé ieune à eune nouvelle aubèrge à Longueville. Ch'la s'comprend qu'les brach'chies veulent tréjous vendre pus d'biéthe, mais y'a' dêjà bein trop d'aubèrges en Jèrri pour lé bein du publyi et pour les jannes prîncipalement. Et j'vai qué l'prix du whisky et d'la biéthe s'en va hauchi. Les brach'chies n'font janmais banqueroute, mais hardi d'femmes dé mênage sont à court dé sou viyant qu' lus hommes dêpensent eune trop grande partie d'lus gages à goudaller d'la biéthe.
Lé portrait d'l'entèrrement d'nouot' fanmeuse Lillie Langtry est bein cliai dans la gâzette du 28 dé dézembre. J'l'ai montré à plusieurs pèrsonnes ichîn et v'la tchi l's întérêssait hardi. Un tas d'ieux criyaient, sans doute, qu'oulle avait 'té née à New Jersey.
Et l'portrait d'l'artiste dans la Chambre d's Etats, tchi nouos dit qué ieune des raîsons pour tchi tch'i chouaîsit un cèrtain coin dans la Chambre pour peindre lé portrait d'la Reine est viyant qu' nou vait la "Jersey Flag", est acouo eune raison d'pus pour adopter les trais léopards pour la couleu d'Jèrri. Jé n'peux pon m'înmaginner eune couleu pus belle et pus apte qué chette-là!
Viyiz étout: