Fort Lauderdale, Florida,
USA.
Lé 5 dé mar, 1977.
Moussieu l'Rédacteu,
Les nouvelles dans la preunmié page dé la gâzette du 20 d'janvyi, tchi veint d'arriver, m'font penser qué les touristes s'en vont aver à payi pus chi dans l's hôtels en Jèrri ch't êté. Comme j'l'ai mentionné d'vant, j'aime hardi r'garder les portraits d'dans, et j'ai r'mèrtchi qué l'Sieur Liron pathait mârri sus l'sien et i' nouos dit tch'i' pouorrait y'aver eune grève des travailleurs dans l's hôtels en temps et lieu d'lus chouaix! V'la tchi veurt tréjous dithe qué ch'est quand l's hôtels es'sont l'pus înc'modées. Et v'la tchi finnit tréjous par un haûchissement d'gages - et ch'est l'client tchi paye.
Jé d'mandis au propriêtaithe d'un restaurant eune fais pourtchi tch'il empliyait tréjous des garçons d'pays êtrangièrs à la pliaiche dé garçons Angliais, et tch'i' faisaient la mème chose dans l's hôtels. Eh bein, i' m'dit, ch'est bein simpl'ye - l's Angliais n'font pon d'bouans domestiques ou sèrviteurs. I' sont trop îndépendents d'natuthe, et il' ont 'té gâtés et poulotés par les sŷndicats et l'travas lus fait peux. Et d'habitude i' n'savent pon autcheune aut' langue qué l'Angliais. Par contre les Espangnos, Portûndgais, Allemands, Italiens, etc. sont accouôteunmés à travailli. I' n'ont pon peux d'lus peine et peuvent pâler trais ou quat' langues!
I' faut admettre qué les tchiques milles dé ches bouannes gens-là tchi sont en Jèrri à ch't heu méthitent d'êt' payis comme dé juste pour lus sèrvices, êt i' y'a toute raison d'penser tch'il' y sont, mais la tentâtion sŷndicale dé l's attither dans la souô-disante protection d'san sanctuaithe est forte, et la m'niche dé grève est s'n êvangile.
J'viyais dans la gâzette qu' un tas d'chambres dans l's hôtels s'en vont êt' réduites en nombres pour ajouôter des salles dé bain ou des douches ès cheinnes tchi restent, et qué sus sept chambres dans la neuve hôtel à La Grève dé Lecq y'en étha six tch'éthont lus salle dé bain. Sans doute j'dév'thais admither tout chenna. V'la tch'encouothage la propriété et l'hygiène dé la vie généralement et rappréche l'île du système Améthitchain d'pus en pus. Mais v'la tchi s'en va haûchi l'couôtement d'vivre en hôtel étout. Et tch'il êffet sus l'ûsage dg'ieau ch't êté tchi veint s'i' y'a eune s'créche comme j'eûnmes en Jèrri l'êté pâssé?
L's hôtels s'en vont en faithe sèrvi acouo pus qu' janmais et v'la tchi donn'na acouo pus d'ameunition pour aîdgi ès cheins tchi sont détèrminnés dé dêtruithe la bieauté dé la supèrbe vallée mênommée Queen's Valley.
En pâlant d'mênoms, j'vai qu' la gâzette continnue à mentionner Goose Green Marsh, St. Ouen's Pond, Five Mile Road, et bein d'autres, comme Five Oaks pour La Crouaix d'Bouais, et L'Etacq Hill tchi peut être Lé Mont Piné, Lé Mont Hueûlin ou L'Mont du Vallet. J'pense bein qu' la seule manniéthe dé l'arrêter es'sait d'nommer tchitch'uns tch'ont pus d'couothage et d'manque dé peux qué nou n'trouve d'habitude dans l's êtres humains ordinnaithes (j'en ai deux dans l'idée - Mêssieux Ph'lippe de Veulle et Ernest Gaudin) et l's installer comme Censeurs dans l'împrînmethie d'la gâzette et l'empêchi d'en sorti auve ches mênoms d'dans. Mais j'crai bein tchi n'voudraient pon la tâche. Ch'est danmage tch'il' ont d'l'âge tchi l's empêchent (par la souô-disante réforme) d'êt' rêcompensés pour lus sèrvices honorifiques à l'île auve un siège sus l'Banc d'Justice, car s'i' y'en a deux tchi f'thaient honneu au vièr titre Jèrriais dé Juré Justicier ch'est ches deux mêssieux-là.
Et en pâlant du système honorifique, ch'est mangnifique dé vaie qu' un janne homme dé dgiex-huit ans, l'Offici d'Connêtabl'ye Kenny Rondé, est prêt à donner ses sèrvices à un âge qu' un tas d'jannes dé nouos jours sont à couorre les c'mîns et pèrdre lus temps. I' méthite d'êt' félicité. J'pense bein qu'san vrais nom est "Kenneth". J'voudrais qu'les rapporteurs prandraient la peine d'êcrithe les noms correctément. Par exempl'ye, lé nom du Mâjeur Arthur Maitland Le Feuvre, dé l'Armée du Salut, tchi s'est distindgi, auve l'sèrvice dé s'n Armée Salutiste en Afrique, est mentionné comme Major Alan Le Feuvre dans la gâzette du 20 d'janvyi. I' n'y'a pon d'estchûse pour des erreurs dé mème, sustout comme lé Mâjeur est bein connu dans s'n Île natale, étant fis du défunt Juge Francis Vibert Le Feuvre, dé mémouaithe respectée, et fréthe dé Mdlle ex-Député Enid Le Feuvre.
Finnalement, i' faut r'mèrcier l'Sieur Richard Mayne pour sa lettre tchi nouos ramémouaithe qué l's Allemands avaient bombardé l's Îles et tué des Jèrriais et des Dgèrnésiais dévant qu' lus Lieut'nant Kern, li-mème abattu à san tou pus tard dans l'Mouoyen Orient, fîsse la souô-disante contchête dé Jèrri.
George d'La Forge
Viyiz étout: