Le Ménage ès Feuvres,
St. Ouën.
Lé 16 juîn, 1973
Moussieu l'Rédacteu,
Comme j'vouos l'disais la s'maine pâssée, dépis m'n arrivée en Jèrri y'a eune tchînzaine, j'ai ieu l'pliaîsi d'passer man temps à liéthe les gâzettes du mai d'mai. Nou n'créthait janmais l'temps tch'i' faut à en liéthe eune trentaine à ch't heu tch'il' ont entre vîngt et vîngt-chîn pages. Quand j'tais mousse i' n'en avaient qu'quatre!
En liêsant l'mangnifique accompte du Sieur Leslie Sinel des cérémonies au Châté Élizabé quand i' fut transféthé ès Êtats par la Couronne lé 21 dé mai, 1922, j'mé sis rappelé d'eune pathelle occâsion lé 28 dé juîn, 1907, quand l'Châté Mont Orgueil fut transféthé ès Êtats d'chu temps-là. Chutte fais-là j'avais pédalé sus ma machinne dé La Mouaie d'St. Brélade à Gouôrray en temps pour vaie la cérémonie. Ch'tait un bieau jour, et à ch't' êpoque-là nou n'tait pon trop pièrcheurs pour pédaler d'longues distances. Eune chose tchi m'veint à l'idée, dgia, est qu'nou-s-avait souvent vent contraîthe en sortant d'siez-sé, et nou s'contentait auve l'idée qu'nou-s-éthait vent drièthe en r'vénant et pis quant nou r'vénait un p'tit pus tard nou trouvait qué l'fichu vent avait vithé d'bord et fallait r'pédaler contre acouo eune fais!
Dans l'portrait dans la gâzette tchi montre la cérémonie au Châté Élizabé, j'ai r'connu Moussieu l'Bailli Vèrnon et l'Dénonciateu Joshua Alexandre Balleine, mais j'n'y vai pon l'Vicomte Edmund Toulmin Nicolle. I' m'sembl'ye aver veu san portrait dans l'Musée d'La Sociêté Jersiaise en Ville, atout un bieau rouoge couossi avec des cliés d'ssus. I' m'veint à l'idée qu'ch'est p't êt' les cliés du Châté tchi lî fûdrent probaliément données en garde par Moussieu Vèrnon à ch't' occâsion-là.
Ch'est vrai tch'i' y'a ieu bein des changements dans l'Île ches dreines années, mais l'affaithe est-alle aussi boulevèrsée comme nouos l'dit l'maître d'êcole Peter Gem, Maître ès Arts, d'Oswestry, dans sa lettre du 16 mai, publyiyée dans la gâzette du 21 dé mai, 1973? Quant à mé, j'trouve mén île natale acouo pliaîsante assez pour èrvénîn la r'vaie touos l's ans et y passer la grand' partie d'l'êté. Sans doute, j'ai l'avantage dé mé r'narder ès Landes à St. Ouën, ieune des contrées d'l'Île tchi n'est pon 'couo envahie par lé conmèrce, la batithie d'maîsons et l'tourisme, ouaithe tch'il a fallu combattre l's amateurs dé têrrains d'golf et d'aut' projets tch'amènent du tîntamarre et des motos en as-tu en veurs-tu pour empouaîsonner l'air et disteurber la trantchilité du vaîsinné.
Jé n'peux pon sénon aver r'gret d'vaie l'estatue d'la bouanne vielle Reine Victoria entouothée d'motos et salie par les pigeons ou mauves sus la cauchie où'est qu'oulle est à ch't heu. Heutheusement, ou règne auve dîngnité sus les motos comme ou l'fît sus l'gardîn et les flieurs pour eune huiptantaine d'années (sa cérémonie d'ouvèrtuthe ayant eut lieu l'trais d'septembre, 1890) dévant aver à s'soumett' à l'exigeance du transport dé la vie modèrne dépis qu'les d'scendants d'ses sujets ont pèrdu l'habitude dé marchi et d'aller à j'va. Nou peut dithe qu'oulle a maintînt sén air sérein tout l'temps d'san dêpliaichement et d'pis, mais ch'est seux qu'ou n'en pense pon mains. Où'est qu'oulle îtha quand l's autorités prendront l'temps d's'en d'menter? Deux-s'trais pliaiches ont 'té suggéthées par vouos lecteurs. Quant à mé, j'espéthe qu'ou sé r'trouvetha en pliaiche parmi des flieurs et au natuthé. D'en par ichîn, i' m'sembl'ye qué la miyeuthe suggestion est d'la mettre dans l'par Howard Davis, et acouo mus dans l'par tch'était la Haute Mielle dans l'temps jadis, appelé lé "People's Park" à ch't heu, ou à la tête dé l'Avenue Victoria à côté.
Comme j'l'ai mentionné d'vant, j'sis désolé d'vaie l'églyise dé St. Simon quâsi abandonnée. Jé n'sai combein tch'i' y'a d'pèrsonnes tchi savent tch'est tchi pôsit sa preunmié pièrre? Eh bein, ch'tait un Êvêque tchi fut né en Jèrri - lé Docteu Francis Jeune, Êvêque dé Peterborough, lé 27 juilet, 1865.
Cèrtains Conmités d'nouos Êtats veulent engaûmer quat' million et d'mi d'livres sterling ouaithe qué d'aut' côté cèrtains mêssieux prêchent un arrêt sus les dêpenses! Ch'est trop complyitchi pour un pouorre vièr Landîn à comprendre. I' faudra qu'jé d'mande à Madanme dû Banc d'm'explyitchi ch'là! J'pense bein qu'les mêssieux tchi gouvèrnent dans L's Êtats m'dithaient qué jé n'peux pon vaie pus liain qué l'but d'man nez quand j'tchestchionne la sagesse dé lus décisions; ch'est en tchi j'm'en vais m'contenter dé l's êcouter et d'êprouver à les digéther et les comprendre. Dans touos les cas, j'admets bein qué j'pâsse trop d'temps à l'êtrangi pour aver eune bouanne idée dé chein tchi s'pâsse dans l'Île. La fîn du temps f'tha tout vaie, comme nouos l'dit un vièr diton, et j'né s'sai pon là quand ou veindra et y'en a un tas dans l'chînmtchiéthe tchi n'la vèrront pon n'tout! En attendant, nou n'gangne rein d'sé gêner trop dans la vie, et i' faut s'contenter d'faithe lé mus qu'nou peut dans l'êtat "ou il plaira à Dieu de nous appeler" - comme nouos l'dit l'Caticème dans la Litourgie.
George d'La Forge
Viyiz étout: