Trenton,
Michigan,
USA.
Lé 8 d'avri, 1978
Moussieu l'Rédacteu,
Ayant tchitté les pays cauds, m'èrvélà où' est tch'i' fait fraid. Sanm'di pâssé j'vouos êcrivais dé Mexico. A ch't heu j'sis à un coupl'ye d'mille milles d'Ensenada en Basse Californie où' est qué j'tais y'a eune sémaine. Il y faîsait caud, et i' fait fraid ichîn ouaithe qué l'solé est dêhalé. Mais j'sis accouôteunmé au changement d' pâtuthe et m'n appétit n'en souffre pon fort. Un viage dé trais heuthes et d'mie en avion dé Los Angeles à Detroit m' apportis ichîn, et ch'tait mangnifique dé vaie l'souôri sus les faches dé mes fréthes Fraînque et Jim tchi m'attendaient à l'aéroport dé Detroit où' est qu' j'ai trais d'mes fréthes dans l's alentours. Iun d'ches jours i' faudra qu' j'âge vaie m'n aut' fréthe (Sydney) et ma soeu Emily à Ottawa, la belle capitale du Canada, à 500 milles d'ichîn. J'sis tréjous content quand l' èrnouvé appreche. V'la tchi veurt dithe qué j' m'appreche dé Jèrri étout!
Ieune des preunmié choses qué j'fais en arrivant 'chîn est d'èrgarder les gâzettes dé Jèrri atchumulées dreinement en attendant m'n arrivée au Michigan. J'vai les décès d'vièrs anmîns. Malheutheusement, y'en a tréjous. Eva Le Mèrquand d'Gros Nez 'tait la dreine dé sa race. Ch'tait tréjous un pliaîsi d'li pâler en Jèrriais quand j'pâssais par là. Ou n'a pon vêtchu longtemps auprès l'décès d'san fréthe Fraînque. J'n'aime pon vaie ches vièrs Jèrriais-là lus en aller d'même, mais ch'est la vie. I' faut êt' èrconnaîssants d' pouver acouo gabather eune fais pâssés la huiptantaine. Quand j'tais mousses nou criyait qu'eune pèrsonne dé souoxante ans 'tait vielle, et d'aller à sepetante 'tait quâsi un mithacl'ye!
Et né v'la Harold Stephens décédé. Un vièr anmîns tréjous av'nant. Un anmîn à touos l's annimaux. Lecteu à l'églyise pour bein d's années. Un homme doué sus bein des sens. Et l'Chent'nyi Henri L'Feuvre dé St. Louothains, vièrs Jèrriais dans l'âme. Né v'la eune êpitafl'ye tchi vaut la peine d'êt' mînse sus un tombé! Mais l'chein qué j'm'en vais mantchi tout partitchuliéthement en Jèrri ch't été est l'Sieur Alfred Le Gros, aut'fais Enregistreux en ville, tchi mouothit subitement dans l'mais d'octobre pâssé. Tréjous embarrassé dans san travas, mais tréjous riant et charmant, hospitalyi, génétheux. Autcheune êpitafl'ye sus san tombé n'pouôrrait janmais li faithe justice car il avait touos les bouans traits d'caractéthe tchi sont nécessaithes pour faithe un moussieu. Et eune séthée pâssée auve li et sa charmante danme et sa chiéthe fille Ethelwyn 'tait ieune des fetes tchui faîsait man viage en Jèrri un pliaîsi touos l's ans!
Mais y'a d'aut' choses qué des décès dans les gâzettes tchi m' intérêssent. J'vai par exempl'ye qué L's Etats ont approuvé la “convention” de la “European court of Human Rights” pour aboli la badgette comme peunnition. Liêsant les mêfaits d'la jannèche en Jèrri dans les gâzettes mé fait craithe qué j'avons bésoin d'faithe sèrvi chutte badgette. Eune chose qué tout l'monde pathaît oublier est qué les victînmes des malfaiteurs ont étout, des “Humain Right”, et tch'il ont l'drouait d'vaie lus malfaiteurs peunnis assez pour les empêchi d'continnuer lus mêfaits. A m'n idée, la badgette lus apprendrait eune bein miyeu léçon qu' un p'tit séjour dans eune prison modèrne et confortabl'ye où' est qu'les travaux forchis n'existent pus et où' est tch'i' mangent probabliément mus qu' siez ieux!
J'tais întérêssi d'vaie tch'i' y'a tchestchion dé légaliser la gag'gie sus la “Crown and Anchor Board”. Né v'la un ji qu' j'ai connu duthant la dgèrre dé 1914-18, car touos les soudards sus l'camp d'batâle y jouaient eune fais en souô-disant r'pos en arriéthe des tranchies. Mais i' n'y'a pon d'doute qué quand nou met des sou là d'ssus ch'est la même chose comme si nous-en m'ttait sus les j'vaux.
En pâlant d' gag'gie, j'sis êtonne d'vaie tch'i y'a vîngt-huit êtablyissements officiels de gag'gie en Jèrri, et qué Dgèrnésy s'contente auve sept. Appathemment, Dgèrnésy a pus d'avis qu' nous! I' n'y'a pon d'doute qué ch'est rare dé vaie un gageux s' enrichi et que ch'la mène à rein d'bouan à mains, comme nouos l'dit l'vièr diton, qué ch'fûsse “Comme Jean Laverty tchi gageait au chein tch'en f'thait l'mains!”
Ichîn en Améthique, ouaithe qué ch'fûsse contre la louai l's autorités n'ont janmais poursuivi l's églyises (généralement Catholique Romaines) tchi font un tas d'sou auve lé ji appelé “Bingo”. Et ch'est seux qué v'la tchi rapporte bein car les “Chevaliers de Colomb” dans eune ville pas liain d'ichîn ont bâti lus “templ'ye” atout l' profit d'chu jeu-là! Mais ch'est en même temps bouanne preuve qué ch'n'est pon l' gageux tch'en gângne!
George d'la Forge
Viyiz étout: