Lé Menage ès Feuvres,
St. Ouën.

Lé 21 juilet, 1973.

Moussieu l'Rédacteu,

Quand j'viyais, dans la gâzette du dgiex-neuf du mais, qué deux mille, neu chent vîngt-sept pèrsonnes avaient 'té présentées d'vant La P'tite Cour dans l'couothant d'l'année pâssée pour toutes sortes d'contraventions, et pus d'trais mille l'année dé d'vant, v'la tchi m'ramémouaithait du temps qué j'tais Commis-Vicomte quand i' n'y en avait qu'ieune ou deux par jour. Dans des temps i' n'y en avait pon du tout. Y'a dêjà 59 ans dépis chu temps-là, et ch'tait l'Juge John Vaudîn tchi siégeait sus l'Banc d'Justice et l'Sieur George de Gruchy Ahier tch'était Commis-Greffier.

Ch'est âffreux d'vaie qué 375 cas fûdrent présentés pour offenses contre l'ûsage des drogues, et qu' sus chu nombre-là i' n'y en avait qu'treize tch'avaient pus d'vîngt-chînq ans, et mème qu'eune vîngtaine allaient acouo à l'êcole! Et acouo nou vait des lettres dans la gâzette êcrites par des gens tchi craient qué l'ûsage dé cannabis dév'thait êt' pèrmîns viyant qu'v'là tch'est supposé ravigoter l's esprits. Lé fait qu' ches gens-là sont pus bêtes qué poule n'empêche pon qué des lettres dé mème pouorraient encouothagi la jannèche à en faithe sèrvi. En Améthique, l's autorités poursuivent eune dgèrre continnuelle contre lé traffic et l'ûsage des drogues dé toutes les sortes, car ch'est bein r'connu qué chu conmèrce-là est ieune des tragédies d'la vie modèrne, prîncipalement parmi les jeunes, et nou vait souvent, dans les gâzettes, des suicides dé jannes gens tchi d'veinnent êchèrvellés au point tch'i' craient qu'la mort s'en va les sauver des ponserêsses tchi les cachementent la tête. Heûtheusement qu'l'affaithe n'est pon 'couo dév'nue si mal en Jèrri, mais ou veindrait bein vite dé mal en piéthe si l's autorités et la police n'y m'ttaient pon la main.

Ch'est damage tch'i' s'en va faller dêtruithe la maîntchi des bieaux gros pigeons tchi donnent tant d'pliaisi ès mousses tchi lus amènent à mangi dans l'Vièr Marchi. Nou comprend bein, sans doute, qué les pigeons font aut' chose qué d'mangi et tch'i' l'font dé là où'est tch'i' sont jutchis sus bâtisses ou bouais, et tch'i' sont absolûment neûtres au sujet d'objets en d'ssous d'ieux, qué ché s'sait hommes ou femmes nueue-têtes ou couvèrtes dé j'veux ou d'chapieaux, ou en habits d'travas ou fas du Dînmanche, ou barbus ou frais râsés, et qu'les cheins tchi r'chevent les présents tchi tch'aient d'en haut sont dispos à les calomnier ouaithe tchi les trouvaient si bieaux quand il' 'taient à pid dans l'Marchi!

Et les pigeons n'ont pon pus d'respé pour l'estatue du Rouai George qué pour lé pus humbl'ye des piêtons tchi marchent en d'ssous d'ieux quand i' sont en vol. Et dans touos les cas nou peut dithe qué n'împorte chein tch'i' font, n'étant rein qu'des ouaîsieaux i' n'savent pon mus, et tch'i' l'font sans malice ni mauvaise întention, et qué si les gens craient tch'il' avraûnent lé d'vant d'la Cour Rouoyale et l'Vièr Marchi ch'n'est rein à compather à chein tch'i' font à l'estatue d'la Reine Victoria sus la cauchie. Et i' faut avouer, en lus faveur, qué Madanme du Dû Banc né s'est janmais pliainte dé lus activités duthant ses entréveues auve l'homme dé d'dans l'Vièr Marchi quand i' lus sont assis sus iun des bancs tchi l'ornent.

Eh bein, bouannes gens, j'n'aime pon vaie autcheune criatuthe tuée, qué ché s'sait annima ou ouaîsé, et né v'là man plaidoyer (comme nou dit dans les milieux juridiques) en faveur des pigeons. J'crai bein qué v'la tchi n's'en va pon lus sauver la vie, mais j'ai fait d'man mus pour mett' lus cause en bouanne veue dévant vouos lecteurs, et j'espéthe tch'i' y'a eune manniéthe dé l's env'yer au Paradis des Ouaîsieaux, si ch'est nécessaithe dé l'faithe, sans les faithe souffri.

En pâlant d'tueûthie d'annimaux, peut-i' y'aver rein d'pus horribl'ye dans l'monde qué la tueûthie d'soudards et d'aut' pèrsonnes tchi s'fait en Irlande? Et au nom d'la réligion! Faut-i' tch'il' aient eune drôle dé mentalité, l's Irlandais? Comment qu'un homme peut vivre auve li-mème sans r'mords dé conscienche auprès aver délibéthêment mithé s'n arme sus un homme et l'aver tué - ouaithe tch'i' n'li'avait janmais fait ni ma ombrage? Quand nou pense à ch'là et au martythe des Juis par les Allemands d'Hitler dans l'temps d'là dreine grand' dgèrre, nou sé d'mande si la civilisâtion a fait grand progrès dans la condite du genre humain.

J'viyais bein, en pâssant par la Route des Mielles et l'Mont à La Brune l'aut' jour qué l's autorités pour empêchi les motoristes d'avraûner les mielles, n'ont ieu autcheun êffet. Comme jé l'disais dans ma lettre du neuf de juîn, ch'est inutile, à m'n idée, d'espether un r'miède volontaithe dé lus part. J'sis d'idée qu'la seule chose à faithe est d'les forbanni compliètement et officiellement.

George d'La Forge
 

Viyiz étout: