Le Caouain oui une bain interêssante distchussion l'aut'e jour entre deux hommes qu'étaient assis sus iun des bancs dans l'Vier Marchi.
J'étais jutchi dans iun des châtaigniers justement en d'sus d'lus tête et je pus oui tout ch-qu'i disaient.
Iun d'ieux était un villais bain connu qu'a tréjous 'té interêssi dans le “Jersey Swimming Club” et qu'était lui même bouan nageur quand il' tait jeune.
L'autre avait fait sa fortune comme aubergiste et vivait d'ses rentes, tout en s'passant l'temps a gagi sus des ch'vaux et sus les rêsultats des “Football Matches” en Anglieterre.
I' c'menchi à explitchi à s'n amin que certain ch'va qu'i' nommi devait gâgni une course chu jour là à Newmarket, car i' d'vait porter treis livres de mains quela dernié feis qu'i' couothi à Liverpool et comme ch'était un difféthent jockey qui l'montait et que le'ch'va avait 'té traîné par une certaine êtablye, i' n'pouvait pas sinon v'nin prumi. Il avait même erchu un télégramme d'un amin qui connaissait un mousse qui travaillait dans ch't êtablye-là et qui ly disait de mettre tout ch'qu'i pouvait d'sus, car ch'était un “dead cert” et ainsi d'suite.
L'autre ritonnait d'entendre tout ch'la et dit:
“Man pouore garçon, j'ai oui ches histouaithes tant d'feis que je n'y fait autchune attention. Che n'est que des imbéciles qui mettent lus sous à gagi sus des ch'vaux!”
Opprès chenna la conversation touâni sus le jeu de football.
L'aubergiste évidemment, connaissait touos les “clubs” de l'Anglieterre et les noms de la pus grande partie des joueurs.
Selon li, les “Puddleton Rovers” s'en allaient gâgni la Coupe ch'tte année, car Bill Smith avait 'té acaté par le Club et comme il 'tait le miyeu “full-back” qu'avait jamais 'téconnu, et comme ils avaient retenu ettou les services de Tom Slippy comme “centre-forward” i' n'y avait pas une autre êtchipe qui pouvaient lus faithe la barbe.
Opprès chenna i' s'mins à pâler des clubs d'ichin, de la Premié Tour, Le Y.M.C.A., les Mechanics, les Wanderers et tch'est qui s'en allait gâgni la “Muratti.”
Quand vint un temps l'autre perdit patienche et li dit, “Je n'sis pas interêssi dans tout chenna, Jamais je n'ai peu comprendre tchi pliaisi qu'i' peut y aver à vaie vingt-deux hommes à chasser un morcé d'tchui alentou d'un clios pour deux heuthes de temps suivis par un autre avec un sûfflièt. Ni pourtchi que les gâzettes consacrent des colonnes enthièthes à en donner un acconte en crititchant les uns et l'sautres qui y ont prins part.
Nou comprend bain chenna pour les mousses qui vont à l'êcole ou qui vont jouer sus la grève quand ils ont un “half-holiday,” mais pour des gens qu'ont atteint un âge de discrétion et qui devthaient saver mus, la chose est tout-à-fait incomprehensiblye.
Pourtchi qu'i' n'y a que pour le maudit jeu d'football que l'public affole comme chenna.
Ergardez tch'est qui s'arrivit l'autre jour.
Un homme du nom de Watts s'en fu à Londres avec deux jeunes garçons qu'il avait perfectionné dans l'art dé pliongi, un art qui dans m'n opinion, demande une autre sorte de couothage et d'adresse que d'colpiêter une balle.
Eh bain, il entri avec ses deux êlèves pour la “Westminster Cup” donnée à la miyeuthe êtchipe du Royaume-Uni.
I' rencontrirent une forte contchurrence mais malgré ch'la, réussite admithablye et d'une si haute importance que la maintchi d'la population de l'Ile aithait deu avé 'té sus la cauchie pour lus donner une reception digne d'un si grand triomphe.
Tch'est qu'nous en a fait? Rain du tout!
Un p'tit paragraphe dans les gazettes, et pis v'la tout!
Ch'est absolûment dêgouôthant!
Si ch'avait 'té une douzaine de Pontac Wanderers, ou tchique autre djaingue de chasseurs de tchui qu'aithaient 'té en Dgernesi et qu'aithaient 'té en Dgernesi et qu'aithaient rapporté un pot en blianc-fé i'y aithait ieu des mille personnes sus la cauchie décorées avec des ribans de toutes les couleurs et à hurler commes des sauvages, et nous aithait promené pour une arlevée de temps, l'êtchipe victorieuse à travers de la ville dans des charabancs, avec l'accompagnement d'une son'nie d'clioches et un vacarne êpouvantablye.
Et v'la justement la difféthance!
Vraiment ch'est une chose inexplicablye que la mentalité du public!
Caouain
Les Chroniques de Jersey 25/9/1926
Viyiz étout: