Maît'e Cliément d'Caen n'avait jamais 'té à un Football Match.
Mais i' fut Jeudi l'arlevée sus l'Mont-es-Pendus vaie l'Muratti.
V'chin comment qu'l'affaithe se fît.
Il 'tait pour houetter dans ses patates chu jour-là mais la grande achie d'plyie qui tchi dans la matinée mins la terre si à pité qu'i li fut impossiblye d'y touchi et l'bouonhomme passi sa matinée dans san prinseu à entertaîner deustrais jeunes garçons du vaîsinné et à grommachi sus l'mauvais temps et sus ses patates, qui n'avaient pas la mine de craître du tout.
Les jeunes gens naturellement se minrent à pâler d'football et i' d'mandithent à Maît'e Cliém si chest qu'i' s'en allait vaie l'Muratti.
“Tchi djante est chenna?” se fit l'bouonhomme.
“Oh ch'est un matche entre Jèrri et Dgernsi pour une belle coupe et j'vos asseuthe que v'là tchi vaut la peine de vaie. Si ch'est qu'ou voulez y v'nin avec nous ch'tte arlevé je vos y portethai dans man side-car.”
Opprès bain d'la distchussion Maît'e Cliém se laissi persuader et opprès dîner les v'là en route pour Westmount.
Jamais l'bouonhomme ne s'était trouvé dans une telle crowd comme i'y avait dans la route à attendre pour entrer dans l'clios!
Fallait payi un chelin par tête pour l'admission et le bouonhomme.comme de raison, payi pour san compagnon, viyant qu'i' y avait bailli une ride jusque là et qu'i comptait oquo sus li pour le remporter siez-li.
Maît'e Cliém fut quasiment êgliami en passant à travers des heches et quand i'vint sus l'terrain i' se fiait qu'i s'en allait pouver s'assiéthe dans une tchaithe pour se r'poser, mais l'clios était remplyi d'une foule de monde, touos les sieges étaient otchupés et i'y en avait des chents qu'étaient mâtés d'but tout attous du clios.
Mess de Caen est bain liain d'aver siex pids d'haut et il avait biau êprouver à êpier par dessus les têtes des gens qu'étaient d'but en d'vant d'li i' n'viyait rain du tout. I's'mins à r'prochi san vaisin pour aver fait une bête de li, en l'amenant là souos d'patheilles conditions.
I' fallit changi d'pliaiche et à la fin Maît'e Cliém se trouvi justement driéthe des gens d'une hauteur ordinaithe et il adonni à s'mettre début sus une taupiniéthe chein qui li permins de vaie un p'tit mio chein qui s'passait. Mais i' n'y comprenait pas grand' chose, i' viyait la balle colpiêtée d'un bord et d'l'autre dans l'mitan du clios, dans des temps ou s'trouvait parmi la foule et pis par dessus les bouais dans une cliôsée d'patates. Une feis ou râsi la tête au bouonhomme et tchi parmi les gâches et les boutelles de limonade souos la tente à Mess Benest.
Quand oulle appréchait du dranet les gens faisaient des heurles comme des bêtes féroces et d'un côté du bouonhomme un mousse avait une clioche à la main qu'i' sonait continuellement tandis qu'à sa drouaite un grand individu perchait les ouotheilles à Maît'e Cliém avec une trompette qui cornait à chaque instant sans autchun motif appathent.
Quand vint un temps le pouore bouonhomme ne pouvait pus enduther chenna et i' lus dit: “Portez-nous r'pos don, tas d'imbéciles qu'ous êtes! Ou m'tendez la tête avec tout vot'e sabbat!”
Comme ch'était des villais qui n'comprenaient pas l'Jerriais, i' n'savaient pas tch'estque l'bouanhomme avait dit mais i' viyaient bain qu'il 'tait futhieux, et i' r'quémenchirent comme de pus bé.
Maît'e Cliém levi san bâton et s'en allait justement assommer l'individu avec la trompette mais san compagnon l'arrêti justement en temps et li dit qu'i' n'fallait pas s'emporter d'même ou bain qu'i' sortithait du terrain les pids l'avant.
Ou viyiz, Mess de Caen, ch'est la couôtume de faite tout chu tintamarre là et i' vaut bain mus pour vous n'y faithe autchune attention.
Tchiques minutes opprès chenna, deux hommes dans l's envithons, qu'avaient châtchun un grand vert riban à lus boutonniéthe et qui v'naient évidemment de Dgernési, se minrent à faithe des r'merques sus les Jerriais et Maît'e Cliém, entendit le mot “crapauds.” Ch'en fut assez.
Il vint comme un démon et s'mins à dithe “que les crapauds valaient bain les ânes de Dgernési” et qu'si ch'est qu'ils 'taient d's hommes i' s'en allait lus montrer li, tout vi qu'il 'tait, etc.” Un policemainne s'en mêli et conseillit au jeune homme qu'était avec Maît'e Cliem, d'emmener le bouanhomme de d'sus l'terrain pour éviter du troublye.
Ils eurent bain d'la peine à l'faithe s'en aller tranchillement, et châque individu qu'i' rencontraient qu'avait un vert riban à sa boutonnièthe, le bouanhomme grinchait les dents et happait san bâton par le p'tit but et voulait capuchi d'sus.
Opprès bain d'l'embarras Maîte Cliém fut rembertchi dans la side car et remporté siez-li.
I' dit à san vaisin qué ch'tait la prumié feis qu'il allait à un “Football Match,” mais que ch'tait bain seux la dernièthe éttou!
Et je vos asseuthe que ch'tis-chin li de san côté, est bain dêterminé de jamais n'li r'démander.
Caouain
Les Chroniques de Jersey 29/4/1922
Viyiz étout: