Y faut que j'vos raconte une game de football qui n'a pas était minse sus les gazettes mais qui aurait attiré touote la paraisse de St. Ou si nous l'avait advertiser.
Ch'tait l'jour de la batterie à la machine à Morville, l'autre Mercredi.
L'jour de d'vant le nouviau fermi de la Robeline, avec ses deux bérisses alli cherchi la machine à Bill du bord de Mon Plaisir, en la pus p'tite paraisse de Jerri et oulle s'en vint buan train à Morville car les carcans étaient bein animés et rouolles bein huilées.
Le lendemain matin, dès sept heures, Willo, qu'à chèrge de l'engin avait l'steam à haut et Bill était là avec ses hommes pouor être seur que touot était prêt et l'engin bein huilé.
By Gad ly, était dans l'clios à mettre ses gens en pliache et un p'tit après un coup de sufflié apprins que la batterie allait couomenchi.
D'vèr neuf heuthes nous d'mandi au boss d'vès tchille heuthe y fallait aver l'fricot prèt. Couomme s'fit l'boss: What? Ma pouore fille je ne peux pon te le dithe car j'avons hardi de travas à faithe et l'année passée y fallut des lanternes pouor en finir. Tchès que vous en pensez, qui s'fit, en d'mandant l'avis des siens qu'étaient oprès de ly. Y li rèpondites que d'vèr chinq heuthes et demie, n'vla qui s'rait assez tôt.
D'vèr dièz heuthes, le tas de froment était fini et nous arrèti l'travas pouor mangi la bouochie. Oprès ch'tait l'tas d'avoine et à une heuthe ch'fut le coup de sufflié pour dithe que ch'tait le lunch. Et tchi lunch, garçons! Assez pour en buster.
By Gad était content couomment que l'affaithe allait. Y s'fit: Garçons vous allez trop raide et j's'rons finis pour 4 heuthes si l'affaithe continue d'mène et mé qui lus ai dit d'aver l'dinèth prêt pour chinq heuthes.
Jacke de la Cache ly dit qu'à s'n'avis touot s'rait hors d'vant quatre heuthes.
Oh! mais dit By Gad, j'en avons pus de la maintchi de passé. Ergardez iou qu'est l'tas acheteu By Gad, si ch'est d'mène y faudra avèr une game de football d'vant dîner.
D'vant quatre heuthes, Willo donnit le coup de sufflié pouor annoncer que l'tas était fini et un quart d'heure oprès touot était patchi.
L'buanhomme Bill avait bein surveilli son monde, Ollivier avait engraîné magnifiquement, Clary et Hyacinthe avaient fait d'lus mus avec lus vieille pihane et touot l'monde était content et l'travas fait.
Couomme il avait été décidé à l'heuthe du lunch, nos gens se rendithe dans l'clios pouor aver une game de football. Nous tossi pouor choisir son bord.
By Gad était goalie d'un bord et l'buanhomme Bill de l'autre. Couomme back ch'était Gaspard, un homme de paids pouor seur, l's'autres étaient chacun d'lus bord et la game couomenchi, l'Jack de la Cache étant Referee d'pis qui n'fit que r'garder les joueurs.
L'père Noué était linesman et avait une job à watchi que nous n'dépasse pon la ligne qui d'vait être bein crotchue à en jugi par la manièthe qu'il l'a suivait en zig-zag.
Il arrivi que les gaolies s'trompites de bord, qu'au lieu de coudepisser la football ch'tait un lopin de terre mais enfin l'affaithe alli de charme et jamais nou n'vit dithèt game même pon à Westmount, fouai de Marie Hibou!
Et quand vint la fin, l's'honneurs étaient d'visées, trais contre trais.
Oprès une game couomme chuna, nos gens fites honneur au fricot. Et tchi fricot, garçons. Une rouelle qui pesait quasiment quarante livres, deux picots, un jambon assez gros pouor nourrir touote une squad de soudards, d'la gache et touotes les sortes, des puddings et du bèthe tant qu'nous en voulait.
Enfin, il y eut oprès, une game de nap mais nos gens étaient un miot fatigués et il y ieut des méprinses de faites par ceux qui prenaient l'jack pour l'rouai ou l'carreau pouor l'tchoerr.
D'vant d'lus en aller sièz ieux, nos gens prites la précaution d'avèr un buan "night cap" pouor lus garder caud.
L'autre Samedi, j'tais jutchie sus un grand orme qui crai sus la ferme à maître Peter, dans la paraisse au Buan Bergi, quand j'entendis une drole de ronronnerie qui pouor seur n'tait pon la sienne des fontaines du vaisiné.
J'criyais quassiment que ch'tait l'wireless main nennin ch'tait l'fils à Charles et s'n'amin Bill qui étaient à éprouver une motorbike.
Artchi était r'v'nu d'la ville sus chutte motor-bike et avait donné l'cheva à cachi à sa mémée.
D'un autre bord j'aperchu Herbert, Dol et Jack qu'éthaient à d'viser et j'oui ieun d'eux qui s'faisait qu'avec touote des machines là y s'ront obligis d'agrandir les routes et que l'rat s'ra hauchi pouor touos ces cacheurs de motor-bikes et de motos.
Jack réponnit qu'avec d'la poudre de mine il aurait tot fait de soufflier fossés et muthailles à bas et qu'il n'en coûterait pon fort à la paraisse.
J'espèthe que les siens du Comité des Grandes Routes prendront l'avis de Jack!
Il y en qui s'font que Marie Hibou n'sait pon la maintchi de chein qui s'passe dans les paraisses. Eh, bein, pouor vos dithe la vérithèt, chutte pouorre créathuthe de Marie Hibou en sait la maintchi pus qu'ouolle voudrait mettre sus la gazette ayant encouore assez d'avis pouor taithe sa becque car s'il est buan d'avèr une bordée d'fun, tchique fais l'affaithe est poussée trop loin et touorne...... malpropre!
Vèr, j'sais bein chein qui s'passi la séthée du carnava dans la paraisse à mon biau cliochi mais à m'a'avis il aurait été mus d'faithe couomme l'buan rouai Dagobert qu'avait sa tchulotte à l'envers. Et je dirai que les siens qui fites chutte farce d'vraient avèr honte d'ieux même, fouai de Marie Hibou. Oprès touot ils auraient du avèr pu d'avis car dithèt farce est d'la saloperie, respect de vous.
J'pouorrais p't'être bein éttouot vos dithe pouortchi qu'un motor s'n'alli dans les bouais à Rockmount iou que ch'tait mouins pliaisant qu'au jardin d'Olivet et j'pouorrais en raconter un p'tit but à l'entouor d'la motor-bike à Joe ou encouore chein qui s'passi.....
Nennin, touote bête que j'sis par respect pouor mé même j'aime mus taithe ma becque car à dithe la vérithèt touot chunna s'rait d'la triste ridelée et j'ai grand r'gret d'vais qu'il y en a qui n'peuvent pon lus amuser sans faithe une bête d'ieux par chein qu'ils craient être des tricks bein joués.
D'ichin deux ou trais s'maines y s'en va avèr du nouvé dans une paraisse iou qui pourrait bein y avèr une élection d'vant celle pouor Député.
Ch'n'est pon des oui dithes mais la pure vérithèt. N'en v'la assez de dit pouor annièth.
Je reste ès écoutes et quand l'temps s'ra v'nu j'en aurai un p'tit pus long à vos dithe à ce sujet.
Caouain
31/10/1925
Viyiz étout: