Y'avait tchiq' temps qu'man bieau-frèthe m'èslourdait pour allé joué eunne gamme de 'Bowls' sur l'Green qu'a 'té si bin arrangi souos l'Pliateau Falle au Mont-ès-Pendus. J'counaissais lus “Green”: J'avais deja pus d'eunne fais ramonté jusque là pour les r'gardé joué. Ch'est un bieau “green,” bin vert, bin entouré d'bieaux bouais sous tchi y'a d'l'ombre quand l'Solet cauffe trop. Et pis, ils ont drenment bâti un bieau p'tit Pavillon ov un long portico souos tchi nou peut s'assiethe a s'n'aise, les gambes allouognies, pour d'visé ov les femmes des joueurs, qui vinnent tchiq fais jusque là r'gardé lus hoummes joué tout en faisant du crochet ou d'itelles busoq'thies.
Eh don! j'ramonti jusque là haut, l'arlevée d'Lundi passé, coumme il avait 'té convnu. Man bieau-frèthe 'tait deja là, en manches de c'minze, les braies r'troussées, ses gélesses avaut l'dos, et les pids dans des chavettes de rubber. Il 'tait a joué eunne gamme ov un autre houmme; et ch'attendant qu'ils eussent fini, j'm'assievi souos l'portico a d'visé ov des persounnes qu'etaient a r'gardé faithe les douze ou tchinze autres qu'etaient bin embarassés a rouolé les balles d'un but a l'autre du 'green.'
Betot - quand man bieau-fréthe eut perdu sa gamme - le v'la qui s'en vint a mé, m'dithe qu'il 'tait prêt a m'dounné ma preumié leçon. Ne v'la l'gardien qu'apporte des balles, et eunne pathe de chavettes en rubber qui met a mes pids: j'ote ma casaque, j'escoppis dans mes mains, et jé c'menchons. Douard rue eunne petite balle blianche qu'nous appele un jack. a l'aut' bu du 'green,' et - fire away! ov les grosses balles. Ch'tait ma preumié fais a joué, coumme j'vos disais; et faut créthe que j'dounni trop d'ière a ma balle! car ou s'n'alli capuchi la barrièthe, d'pichi eune madelle, et rouôlé avaud la banque. J'perdi un point pour cheunna! et douze sous pour r'graie la madelle. “N'joue pon si du, s'fit Douard. Dounne li du biais; et tache de met' ta balle aussi près qu'possibye du Jack.” Right you are! que j'respounni: et faut créthe que j'lis dounni trop d'biais - ma prechenne balle s'n'alli dounné eunne ouappe dans les gambes d'un moussieu qu'était a joué sus l'préchin 'green.' Les v'la tous a rouablié, et y'eut distchussion si j'perdais un point ou deux pour chu coup la; et tout l'monde s'mint a m'douné d's'avis coumment qu'fallait s'y prendre. La moutarde c'menchait a m'monté au nez, mais je n'dit mot, et nos r'vela d'accord. Betot i' n'me restait pus qu'eunne balle a joué, et toutes les siennes a Douard 'taient a l'entou du Jack - pas moyen d'apprechi!
N'en v'la quatr' ou chinq qui s'mettent a m'douné d's'avis. “Douochment par ichin en biaisant un mio a gauche” s'fit yun. “Tachis d'heurté chette la sus l'coté drouét, et met'-ous a sa plieche” disait l'autre “Rouolez vot' balle entre ches deux chin, tapper chette la, biaisis contre numetho sept, et vot' balle , après avé tappé numetho neuf en passant, r'tchulla en bouonne plieche justement a un pouce du jack” s'fit un trêsiemme!
Et pis! I' fallait s'met un pid sus la natte, n'pon faithe de creux dans l'herbe, rouolé douochment, t'nin sa balle d'même et d'même, prendre san temps pour mithé, et n'pon s'éxité!
On hon! que j'pensi en mé même n'en v'la du d'vis! Ch'est d'même et d'même qui faut joué, estche. Hé bin! J'm'en vais vos montré ma monnièthe, a mé! Ous n'allez vaie tchiq'chose! Et j'mets ma main d'ancien forgeux a l'entou d'chutte balle la. Off she goes! que j'crie - et ou s'en fut! nous ethait dit eunne balle de conon! Quand l'ponsi qu'ou fit fut un mio settlé, i' n'restait pas eunne seule balle sus l'green! Y'avait très messieux qui s'n'allaient hoptchinnant en criant au s'cours: yeunne des tchaieses du portico 'tait a maintchi passée a travers la f'nêtre, l'gardien qui passait avec un serveur plien d'tasses et d'beurées s'n'alli s'est èstrueulé sus les g'nors d'la d'mouêzelle qu'etait a brodé, yun des bouais endret l'Pilion fut rompu net et êsmaglyi eunne bike qu'etait appiée contre l'pignon d'la hutte au gardien avait un creux a y fouorré un fagot d'fain - et la blianche balle a 'té r'trouvée sus l'pont d'un navithe qu'est a dêchergi du tcherbon pour Moussieu l'Hutchet!
Eh bin! Tchès qu'tu'en dit d'chette là? que j'fit a Douard qu'etait a èspinotchi des brins d'herbe hort de l'yi d'Mess Louothins: J'perds ti oquo un point ou ethait y fallu biasi oquo la moindrement pus a gauche? I' n'suffyit mot! et quand je r'garde a touore de mé en boutounnant ma casaque pour demandé si par chance tchiq'un voudrait avé eunne autre gamme persounne ne dit rin. Ils 'taient tous agrouplés driethe un gros tchène, a l'aut' bu du 'green,' aussi ben qu'possibye.
Mais, tout d'même, ch'est eunne bin belle gamme, que Bowls. J'y'ai prins gout! Et si Douard en r'pâsle, j'm'y rèsprouvthai d'vant qui sait long.
Piteur Pain
Morning News 12/9/1913
Viyiz étout: