Pouor mé, Wimbledon et l'jeu d'paûme sont eune partie hardi împortante dé l'êté, et châque année j'attends fête dé ches deux s'maines.
Quand ma fanmil'ye èrmuit à Londres, jé d'meuthions à Wimbledon, à un fi près des fanmeux bels dé paûme. En ches jours là les compétiteurs n'taient pas professionnels et i' n'y'avait pon l'même brouhaha qu'au jour d'aniet. Auprès chîntch' heuthes d'l'arlévée, lé couôtage d'entrée 'tait seulement dgiêx ch'lîns. Dédans, m's anmîns et mé, jé soulions attendre en d'houors du Bel du Mitan et les gens tchittant lus sièges et èrgângnant siez ieux, nos donnaient lus titchets.
Duthant ma dreine année à l'êcole, auprès qué j'finnissînmes nos examens, un anmîn vînt rester siez mé et j' passînmes deux jours entchièrs ilà. Un jour j'vînmes touos nos héros jouer, Maureen Connolly, Lew Hoad et Ken Rosewall et d's autres. Malheutheusement l'lendemain, i' tchiyait d'la plyie toute la journée et j'avions du crève-tchoeu.
En chu temps là, jé n'faîthions pas d'brit coumme au jour d'aniet et l'mont à Henman n'existait pas. Les danmes portaient des hardi belles robes, toutes en blianche, et nulles portaient des courtes braies. Les gammes 'taient pus lentes, mais p't-être mains êmuantes qu'i' sont au jour d'aniet.
A ch't heu j'vai les gammes dé paûme à Wimbledon à la télévision et quand i' fait bieau temps j'ai à chouaîsi entre la grève et les gammes.
Anne Herrod
Viyiz étout: