Lé rugby est eune gamme dé balle înventée, s'lon la légende, en 1823 à l'êcole dé Rugby en Angliétèrre quand William Webb Ellis gaffit la balle duthant eune gamme dé balle et couothit auve lyi. Ch'est en tchi ch'fut ieune des manniéthes dé gamme tchi fut formalîsée atout des règl'yes au 19e siècl'ye pouor dév'nîn un sport.
Un clobe dé football (s'lon les règl'yes dé Rugby) fut fondé à l'Hôpita à Guy à Londres en 1843 et des associâtions d'même fûtent êtablyies à seule fîn d'èrgraie des gammes entré l's êtchipes dans d's unnivèrsités et des villes. Des soudards Britanniques întroduîsîtent la gamme au Cannada et d's êtudgiants ès unnivèrsités du Cannada et d's Êtats Unnis d'Améthique atchilyîtent chu nouvieau ji. La vèrsion d'la gamme tchi dêv'loppit en Améthique du Nord duthant l's années 1870 d'vînt l'football Amétchitchain.
En 1870, y'avait eune septantaine dé clobes tchi souôt'naient d's êtchipes tchi jouaient s'lon lus règl'yes à ieux. L's êtchipes avaient à accorder tchi règl'yes qu'i' lus en allaient siéthe d'vant stèrter châque gamme. Lé 26 d'Janvyi 1871, 21 clobes Angliais fondîtent lé Rugby Football Union pouor standardîser la gamme - et dans d'aut's pays nou fondit d's associâtions d'même pouor accorder les règl'yes. Mais y'avait acouo des difféthents avis entré les pays. À la siette dé tchique hèrtchin entré l's Angliais et l's Êcossais, nou fondit un Conmité Întèrnâtionna du Rugby (International Rugby Football Board) en 1886 pouor décider les règl'yes pouor les êtchipes Britanniques. D'pis 1930 chu conmité fait les règl'yes pouor toutes les gammes dé rugby à l'unnion.
Mais la tchestchion des règl'yes n'était pon la seule trébule, car y'avait étout du hèrtchîn entré l's ouvrièrs dans les villes îndustrielles du Nord d'l'Angliétèrre tch'èrchévaient des sou pouor jouer et les hoummes dé bein des grandes êcoles et d's unnivèrsités du Sud tchi lus mêfiaient d'la paiethie des joueurs. V'là tchi m'nit en 1895 à la s'pathâtion d'eune vîngtaine dé clobes dans l'Nord tchi fondîtent eune Ligue dé rugby.
Auve des changements d'règl'yes dans les deux associâtions, nou-s'a deux manniéthes dé rugby dé jouées:
En 1995 l'Conmité Întèrnâtionna du Rugby r'nonchit l'amateurisme oblyigatouaithe et d'pis chu temps-là les joueurs peuvent êprouver les deux manniéthes ou changi d'êtchipe.
| lé rugby à tchînze |
rugby union |
| lé rugby à treize |
rugby league |
| la gamme |
the game, match |
| la balle |
the ball |
| l'êtchipe |
the team |
| un joueux |
a player (m) |
| eune jouêrêsse |
a player (f) |
| lé tèrrain |
the pitch, ground |
| lé preunmié co |
kick-off |
| codpîser |
to kick |
| pâsser |
to pass |
| happer |
to catch |
| couôrre |
to run |
| un croch'teux |
a hooker (m) |
| eune croch'térêsse |
a hooker (f) |
| un avant |
a forward |
| un toteux |
a prop (m) |
| eune tot'rêsse |
a prop (f) |
| un d'mi d'mêlée |
a scrum-half (m) |
| eune démie d'mêlée |
a scrum-half (f) |
| eune êprouvâle |
a try |
| mèrtchi eune êprouvâle |
to score a try |
| convèrti eune êprouvâle |
to convert a try |
| eune mêlée |
a scrum |
| eune freûlée |
a ruck |
| eune èrlîngnie |
a line-out |
| eune gaffée |
a tackle |
| un juge / eune juge |
a referee (m/f) |
| un co en dro |
a drop-kick |
| codpîser en dro |
to drop-kick |
| un co en pliaiche |
a place-kick |
| codpîser en pliaiche |
to place-kick |
| codpîsé hors en touche |
kicked into touch |
| hors dé lague |
offside |
Viyiz étout: