Je m'tais pliaint au Chef que je n'pouvais pas trouver d'copie pour chute semaine car je n'pouvais pas penser à autchun sujet qui pouvait interîssi mes lecteurs.
“Va au Pavilion vaie les boxeurs!” qu'i' m'dit, “et pis tu pouorras êcrithe un articl'ye là-dessus.”
Et don j'y fus. Le Boss me bailli un billet et j'tais bain content me, mais je fûmes obligis de prendre mille précautions pour que Marie Hibou n'en sûsse rain, car ou m'avait d'fendu d'y r'aller.
La dernié feis j'en fus si excité que je rêvi tout chenna dans la nièt et je m'viyais dans l' “ring” à m'battre avec des colosses qu'étaient djaix feis pus grands qu'mé. Je m'butti dans l'lièt et j'étais à bâilli des achies d'coups d'poing ès ouothilliers.
Marie attrapi une ouape ou deux qui la fit se rêvillyi en sursaut et ou voli hors de dans l'liet et s'en fut se jutchi sus l' “wash-stand” en criyant “Au s'cours!”
Dans man rêve je prins ses cris pour les brèts d'la populace et je capuchais oquo pus du.
Un nègre m'assiévi une tournewallipe sus l'haut d'la nuque, qui m'fit vaie des mille ètelles et qui m'ètendi sus l'plianchais. Je ouï bain la vouaix à George Quoyard qi compti jusqu'à djix et j'avais une certaine connaissance que deux hommes vinrent souolever ma carcasse et la traînithent à travers de l'arène et m'dêposithent dans une tchaithe et justement comme i' s'n allaient me scrobber la fache avec une êponge, --- je m'rêvillyi.
Je puthais d'sueu et j'étais oquo tout êmotionné, quand tout-d'un-coup je mantchi Marie.
Quand j'l'avisi jutchi là ouest qu'oulle t'ait, ou pouvez bain craithe que j'fus surprins. Ou se t'nait la tête a deux mains et plieuthait à fraides lermes. Oulle avait un yi tout nai et la fache toute enfliée. Je li d'mandi, “Tch'est qu'tu ès à faithe ilo? As-tu ma às dents? Si tu savais tchi terriblye rêve que je vains d'aver!”
Et pis dame! Ch'est là qu'la musique quemenchi!
Ou m'en chanti par exemplye! Je fus traite de “bête brute,” de “monstre” de “meurtryi,” enfin ou m'blaguèrdi pour pus d'deux heuthes de temps, si bain que j'aimethais mus me battre avec chinquante nègres que d'aver à enduther une autre bordée comme chenna.
Souos les circonstances il est facile à comprendre que chute feis, je n'pouvais pas li dithe iou que je m'en allais. Et heutheusement, je n'r'eu pas d'rêves dans la nièt.
Eh bain pour vos dithe, le Pavilion comme d'habitude étiait remplyi. Et pis i'y avait des gens distindgis sapresti. Le Gouverneux et san sécrétaithe, des Juges, des Membres d's Etats, des Chant'niers. Et pis don i' y avait mé. Chein qui vos prouve que les concours de boxe sont bain veus parmi l'aristocracie et ne sont pas simpliément organisés et souotints par la basse classe comme hardi d'gens voudraient craithe.
Le bisnesse quémenchi tchiques minutes opprès huit heuthes et tout s'passi d'une maniéthe admithablye. Le “referee,” qu'était v'nu d'Angliétèrre n'eut pas grand chose à faithe, une preuve que nos garçons savent les règlyes et les observent comme i' faut.
Les luttes les pus importantes étaient les siennes entre Laïesse Le Monier et Charles Duncombe, un nègre d'Dgernesi et entre Ralph, le champion de Jerri et Gent de Dgernesi.
Le nègre est un biau garçon, bain adrouait et chein qu'nous appelle en Angliais, un “clean fighter.” Mais il est un mio lîngard et est bain liain d'aver la forche d'Laïesse. Nou s'aperchu bain dans les dernié rondes qu'il avait trouvé san maître et i' faut dithe que Laïesse fit preuve d'un “sportsmanship” admithablye. Il avait s'n homme compliètement vaintchu, et malgré les hurlements d'une certaine section d'imbeciles qu'aithaient voulu qu'il l'aithait ebaubi tout-à fait, i' s'abstint de commettre patheille brutalité.
Laïesse, man garçon, le Caouain t'admithe et t'felicite. Ch'est d's hommes comme te qui gardent le “sport” de la boxe sus un pid respectablye et qui l'empêchent d'être terni par la brutalité.
Quant à la bataille du sieur Gent, ou prouvi oquo une feis que j'n'avons pas in homme ichin capablye d'baîlli une chanieûthe à chu mâtin-là. Du comme du fé et fort comme un boeu, les ouapes de ses adversaithes ne pathaissent pas li faithe pus d'impression qu'un brin d'plyie sus une fielle de “corrugated” mais dame, quand i' tappe, li, ch'est comme des coups d'maillot.
A la boutique, je sommes à êprouver à arrangi pour mettre le Chef contre li la préchaine feis. Che s'sait un pliaisi pour nous de l'vaie (le Chef) soubattu un mio, et quant à mé, je s'sais tout-à-fait prêt d'aller le s'conder, li torchi l'musé avec une êponge opprès châque ronde, et l'êventer avec une serviette.
Lé Caouain
Les Chroniques de Jersey 25/2/1922
Viyiz étout: