Les Pages Jèrriaises

Jeux du temps jadis

Abbaye de La Lucerne,
Nouormandie.
Lé 30 septembre, 1967.

Moussieu l'Rédacteu,

Dans des temps j'mé d'mande tch'est qu'les mousses d'à ch't heu font pour lus passer l'temps. Sans doute i' n'faut pon qu'j'oublyie tch'i' y'a des distractions d'nouos jours tch'i' n'y avait pon y'a eune septantaine d'années, et qu'les mousses d'à ch't heu vivent eune vie toute difféthente des cheinnes du temps jadis. Savent-i' seulement tch'est qu'ch'est qu'eune canonniéthe? J'pense bein tch'i' n'en ont janmais ouï pâler. J'en faîthions ieune atout du seu. Quand il 'tait creux nou chèrchait pour un mio d'rond bouais - d'l'orme ou du tchêne s'i' y'en avait d'amain et d'la bouanne grosseu - pour faithe un bouteux. Et pis nou ramâssait des tchênelles pour faithe sèrvi d'meunition. Nou m'ttait justément l'but du bouteux dans l'but d'la canonniéthe, et pis la tchênelle dans l'aut' but, et quand l'bouteux 'tait poussé d'dans dêliêment la compression d'l'air dédans tithait la tchênelle. V'la tchi faîsait un coup comme quand nou dêbouche eune boutelle dé cidre ou dg'ieau d'vie, et nou pranait san pliaisi à tither l's uns sus l's autres! Dans la maîson ou dans l'bel nou-s amathait un bouchon d'liège à la canonniéthe, et nou pouvait tither l'bouchon houors du but sans aver à l'ramâsser toutes les fais. Amathé à la canonniéthe i' n'pouvait pon êt' tithé pus liain qu'la londgieu du but d'ficelle tchi lé t'nait!

À ch't heut qu'les mousses vont à l'êcole par beusse ou tch'il' y sont portés en moto, i' n'ont pon à trouver tchiquechose à faithe en marchant à l'êcole. Quand j'tais mousse i' fallait marchi des Landes au Haut du Mathais, et la route éthait pathue longue si nou n'avait pon trouvé tchique distraction en c'mîn. L'êlîngue 'tait populaithe. Nou pouvait mither et tither sus autcheune chose. Eune pièrre dans la route, offûche - y'en avait tréjous l'long des fossés - eune boutelle viède sus l'fossé, un ouaîsé, ou des nids dans les bouais, y'en avait d'toutes les sortes qué nou pouvait mither d'ssus. Quand j'y ai pensé d'pis, j'ai tréjous ieu dêpié d'aver janmais tithé sus un nid ou un ouaîsé. Heutheusement, nou n'adèrchait pon souvent bein assez pour lus faithe grand ma!

Un objet tch'était populaithe pour tither d'ssus 'tait un êpeûthas! Un aut' 'tait un gabé! Mais y'avait téjous dangi dé s'trouver en embarras - car êpeûthas et gabés 'taient l'pus souvent dans des gardîns et nou pouvait tchiquefais les mantchi et taper dans eune ôzainne dé f'nêtre! J'y pensais l'aut' jour quand j'viyais un êpeûthas dans un gardîn ou clios l'long d'la route (j'crai qu'chest la Route Militaithe) à St. Jean, dé tchi qu'nou n'vait pon souvent à ch't heu!

Pour faithe eune êlîngue, nou chèrchait pour eune branque dé bouais tch'avait un bouan fourtchet auve les deux bords êgaux d'londgieu, et bein formé comme la lettre V, et pis nou-s y'amathait deux buts d'lèstiques dé trais ou quat' pouces dé long. À l'aut' but des lèstiques nou y'amathait un mio d'fîn tchui pour pînchi la p'tite pièrre qué nou tithait atout. Nou pouvait généralement acater l'lèstique à la boutique. Un huit dé pouce carré 'tait eune bouanne grosseu. Ch'tait r'mèrquabl'ye tch'i' n'y avait pon pus d'fénêtres cassées atout ches êlîngues-là!

En saîson nou jouait atout des châtaines à j'va. Nou ramâssait toutes les grosses qué nou pouvait et pis nou les pèrchait atout eune pétite brédâle ou un cliou pour y passer un but d'ficelle, et nou faîsait un noeud au but d'la ficelle pour empêchi la châtaine dé s'êcapper. Iun t'nait sa ficelle à but d'bras atout la châtaine pendue à bein près dgix à douze pouces dé la main. Lé jeu 'tait d'aver un advèrsaithe, atout sa châtaine pendante étout, la chôlier et taper la vôtre tchi pendait sans bouogi. Châtcheun tapait l'aut' châtaine à san tou, et ieune des deux 'tait cèrtaine dé d'pichi à forche d'êt' tapée. Lé gangnant 'tait l'chein tchi finnissait atout sa châtaine entchiéthe. Y'en avait tchi m'ttaient lus châtaines dans l'fou criyant qu'la chaleu l'endueurchithait, mais jé n'sai pon si v'la tchi faîsait grand' difféthence. V'la tchi les faîsait un mio liégeuthes et i' duthaient p't êt' pus longtemps d'mème.

Tout chennechîn s'faîsait en marchant à l'êcole. Comme j'vouos l'ai p't êt' raconté d'vant, étout, nou boulait des cèrcl'yes en c'mîn. Nou poussait l'cèrcl'ye atout un cro - un but d'rond fé tch'avait un cro au but pour crocheter l'cèrcl'ye et l'faithe rouôler à côté d'sé en draite lîngne. V'la tchi nouos faîsait couorre pour lé garder en allant, et nou-s arriait à l'êcole êssoûffliés et en sueu. Ch'est r'mèrquabl'ye qué nou n'attrapait pon un mauvais fraid! Man p'pèe et man papa avaient tréjous d'ches cèrcl'yes-là à r'graie ou à soder dans la forge. Ch'tait eune embête pour ieux, mais i' n'faîsaient pon les mousses payi pour!

Les pus p'tits jouaient ès j'vaux en c'mîn étout. Iun liet l'aut' pour êt' san j'va, et i' faîsait sèrvi l'fouet pour lé faithe aller pus vite! Mais chu jeu-là n'tait pon populaithe parmi les grands, car pèrsonne né voulait êt' lé j'va! Enfîn, tout chennechîn faîsait la route dé l'êcole pathaître pus courte, et la marche et l'exèrcice endueurchissaient les mousses!

George d'La Forge

 

Viyiz étout:

 

Les Pages Jèrriaises