The Pains at Olympia
D'pis l'temps qu'je dmeuthons en ville, pépée, s'fit Lonôre l'aut' matin en èspinotchant les hétheques d'un caplan rôti, j'n'avons pon oquo vaie autchun skating-rink, et coumme nou pâle de cheunna ès 'at homes' ou ès qué j'vais, tu n'voudrais pon qu'ta fille fut béganne la d'sus. Et pis, y'a cheun'chin, s'fait Laizé. J'ai oui qu'y'a a bon d'jeunnes hoummes qui 'skatent,' et mème des officiers du fort. Nou m'a dit qu'les siens qui 'skatent' s'ent' dounnent la main, s'ent' tchennent la tâle. Pense a ta fille, Piteur! Si par chance un offici s'n'allait s'ammouthachi d'lyi en la viyant drissé sus des rouôlettes?
J'y r'pens'sai, qué j'fis: et après avé lu un Chapitre coumme d'amor, j'm'en fut a l'Office vaie tchès que l'Bos en dithait. L'Bos fut d'avis qu'Laizé raisounnait bin, et m'dit qu'tant qu'a faithe j'fthaimes bin, mé, Laizé, et Lonôre d'apprendre la gamme dé skaté au pus tôt. Les temps vindront, qui dit, qué toutes les grandes routes s'ont pavées en chiment, et qu'nou' pouorra skaté l'Ile en long et en travérs. Y faudra qu'ou sachiez skaté pour allé en campanne tcheûté des nouvelles pour la gazette.
Hon, hon, qué j'fis: si ch'est d'mème y faut don vaie a s'moustré d'apprendre a marchi ov des rouelles souos ses bottes. Et tant qu'a faithe, qué Laizé et Lonore apprennent étou. J'îthons pus tard, touôs les très, bras d'sus bras d'sous, sus rouôlettes, d'ichin l'Estat en passant opar la Mathe pour r'véné par le Mont Mado et d'sendre en ville par les Hautes Crouèx, l'bétchét Vinchent, et l'aubèrge a Dan Sélous. Et y'iou qu'j'ithaîmes bin pour apprendre a rouôlé bin? qué j'dis au Bos. La d'sus y s'mint a san desk et m'èscrivit eunne lettre pour la pliéche sus l'Esplianade.
Dear Mr. Marks,
This is our prize duffer. Pray teach him and his womenfolk to skate - if you can. Expenses, if any to account of Morning News,
Halkett Place,
November 27th 1911.
|
La, qui m'dit; ou n'avez qu'a dounné chutte lettre la ov mes compiéments a Moussieu Marks; y soign'nont d'vous, et n'y'étha rin a payi. Ou dithez qu'ous ètes du "Morning News" et tout l'monde sé car'ra.
Coumme y s'adounnait qué j'passais par la hier l'arlevée - j'm'en allais vaie tchès-qui-fait qu'y'a y'un des gas de l'av'nue qui reste allumé d'jour - j'entri a l'Olympia pour m'arrangi ov yeux quand tchi qué je s'sai l'pus c'mode pour qué j'vindraîmes apprendre a skaté. J'dounni la lettre du Bos a Moussieu Marks. sitot qui l'eu lue, y châtchi d'main ov mé, m'em'ni dans l'Hotel, criyi a sa femme et a touôs les ouaiteurs, et lus r'lut la lettre. Tout l'monde châtchi d'main ov mé, les servantes voulîtes a toutes forches m'embréchi, ch'tait Misteur Pain par chin, Misteur Pain par la, et coum-est-qu'est Lonore, et Missis Pain s'piait ti en ville, et combin d'loppins d'chucre qu'ou mettez? en m'montrant l'tumbleur.
Ch'est tout d'mème de bin naice gens, les siens d'l'Olympia; et y s'en vont tous s'entre aidji a nos montré a skaté. Les ouaiteurs prendront tous Lonore châtchun san tou ché s'sa l'manédjeur li mTme qui s'otchuptha d'Laizé: et quant a vous Misteur Pain, qui dit, rin qu'a vos r'gardé marchi, j'vé bin qu'ou pouôrrez vos graie tout seu; la skat'tie vint d'natuthe ès forgeurs. Et - s'fit y en m'pâslant a l'ouothélle - pour les femmes, les deus-très preumié faies, ou m'comprenez? eunne couoche ou deux d'ouadinne sus les hanques et d'même; ou comprennez? offuche eunne tchulbutte! mais ch'n'est rin! nou s'y'accouotume! et en y frottant d'la tormontinne d'vant s'couochi!
Right you are! qué j'fis en clyiantant par sus l'bord dé man tumbleur: Lonore est pus ou mains ouadinnée d'sa natuthe ès parties sus tchi qu'nou tchet bas; et pour ch'qu'en est d'Laizé - oquo deux d'gouts s'y'en cas d'vent s'nallé - quand ben mème ou s'éstrueûllait deus très fais, n'vos génez pon! Ch'n'est pon mé qu'éthait ma, et j'e'n vos f'thait pon d'r'proches.
Piteur Pain
Morning News 1/12/1911
Viyiz étout: