V'là les fêtes paroissiales à peu près toutes finies et i'faut dithe que, sans exception illes ont toutes bain réussi. L'organisation a 'té parfaite et les êfants aussi bein comme lus pathents ont ieu bain du pliaisi.
Une innovation qui s'est introduite et qu'a immédiatement gagnie une immense popularité, a 'té les "Tug of-War" entre les vingtaines des difféthentes pâraisses, surtout parce que les femme lus en sont mêlêes ettou et prouvé qu'i' peuvent raidi d'autres cordes que lus cordes-à-linge.
Je crai que ch'tait la pâraisse de St.-Martin qui fu la prumièthe à introduithe chenna ch'est pourtchi ch'est lyi qu'en méthite toute la glouaithe et ou dait aver êprouvé une certaine satisfaction de vaie qu'les autres paraisses ont suivi s'en exemple.
Mais ch'est raique le c'menchement chennechin. Nous est dêjà à faithe des arrangements et à chouaisi des "team" pour l'année tchi vaint, en prenant toutes les m'suthes pour s'asseuther que châque femme qui s'sa chouaisie de mettra entchièthement à la disposition du Comité et es'sa en êtat d'haller.
Ches précautions-là ont 'té prinses pour tâchi d'êviter une répétition du contretemps qui s'arrivi l'aut'e jour dans une des pâraisses d'amont. Un "team" avait 'té entré pour erpresenter une certaine vingtaine, et les organisateurs lus fiaient que la femme à Ph'lippe Hallecorde, qui pèse deux chents livres et qu'est forte comme deux hommes, s'en allait lus baîlli un coup-d'main, mais quand deustrais dames furent li en pâler, ou lus dit qu'i n'fallait pas y penser pour un instant. Ou lus donni à comprendre que, pour certaines raisons, ch'ne s'sait pas prudent pour lyi de ristchi d'entreprendre de patheil tours-de-forche.
Les dames du Comité furent diversement désappointées, sinon iune, qui dit qu'ou s'en doutait dépis tchique temps, et i' s'en furent, en bloc, trouver l'pouore Ph'lippe, et li en chanter de toutes les sortes, li disant qu'il aithait deu aver pus d'avis, etc.
Pour s'en dêbarrasser, le pouore djâblye fut obligi d'lus promettre qu'i' tâch'chait d'faithe en sorte qu'ou pouorrait haller l'année tchi vaint.
Illes ont une liste de neuf ou djaix noms et vont à châque maison êprouver à imposer lus conditions et à airaichi des promesses, mais à des bords i' n'sont pas trop bain erchues. Ch'est l's hommes qui sont les pus difficiles à persuader. Comme iun d'ieux disait l'aut'e jour "Le sport est bouan à sa pliaiche, mais ch'n'est pas la peine d'amener la discorde dans les familles pour l'amour d'un malheutheux "tug of war.""
Et ch'est bain vrai, ettou!
En pâlant d'chonna, tch'est qu'i' fait que l'aut'e jour ès régates de La Rocque, le "team" de St.-Martin batti les Grouvillais si aisiement? A ouï Jack pâler, i' sembliait qu'i' n'y avait pas une aut'e pâraisse qui pouvait mettre huit hommes sus une corde pour lever les siens qu'i' chouaisithait dans le vaisiné, et il avait calangi les garçons d'St.-Martin de s'y êprouver s'ils en avaient l'couothage. cheux-chin n'se tirent pas prier deux fais et don i' fut arrangi qu'la grand' bataille se don'nait à La Rocque la séthée des régates.
I'y avait ieu tant de d'vis par sus ch'tte affaithe-là que presque toute l'île y était interêssie et don, nou s'rendit sus l'champ d'bataille pour vaie les colosses de Grouville s'envoler avec les St-Martinais.
Dans un temps i' sembliait que l'affaithe s'en allait faithe feu par la tchulasse car i' ny avait autchun signe des combattants, et les spectateurs c'menchaient à lus ennier d'attendre.
Quand nou cherchait des renseignements, nou vos disait que y avait deux hommes qui mantchaient du "team" de St.-Martin. D'autres disaient que les Rotchais qu'avaient prins part ès Régates, v'naient justement de ramather lus batcheaux et 'taient hors à baithe du thée.
Enfin tréjous, opprès une heuthe de passée à distchutter les prélimmaithes, etc., v'là les gladiateurs rangis le long d'la corde, huit de chaque bord. I'y avait presqu'autant de tout-se-mêles comme de halleurs, et un chatchun avait des plians et d's instructions à donner d'un bord et d'l'autre, mais à la fin, un homme qui pathaissait être en autorité et qu'était vêtu comme un amiral amathi un rouoge riban au mitan d'la corde et criyi "Heave!"
Les y v'là tous à pliain collyi! Emile, li qu'était au but d'la corde du côté d'St.-Martin se pitchi à ventrillons comme un crapaud et grattait la terre des pids et des mains comme une tortue qu'êprouve à sorti de dans un bourbyi.
Mais les supporteurs de Grouville trouvaient que che n'tait pas "fair" et i' furent ramasser l'amiral pour qu'i' li ordonnisse de se l'ver sus ses pids comme les autres.
Le "strain" était trop fort pour les gros lurons de Grouville et i' c'menchirent à soufflier comme des pourpais. Lus gens avaient biau lus crier heave, heave, le riban gagnait tréjous du bord de St.-Martin et dans p'tit temps il avait passé la merque, St.-Martin avait gagni le prumi "pull."
I' fallait changi d'bord acheteu, et une squad de Chant'niers, d'officiers de police et d'membres d'Comité furent lus pliaichi [en]ttouo d'Emile pour vaie qu'i' n'se r'minsse pas oquo à grapins, mais chenna n'chan[g]i pas l'rêsultat, ches garçons-là d'St. Martin ont du ner, sapresti! i' hallaient à r'tchulons sus chute corde-là justement comme des viaux qui cherchent à s'êtranglyi, les Grouvillais changeaient d'couleur visiblyement, lus rêsistance diminuait à chaque instant et pour la deuxième feis i' furent traînées pas sus la merque!
Ch'tait là qu'i' y en eut des hourras!
Le pouore Jack eut à en êcouter de toutes les sortes. ch'tait pus qu'i' n'pouvait enduther alors i' s'en fu l'lendemain à Portbas pour êprouver à oublier sa dêfaite.
Si ou n'voulez pas l'faithe mârri, n'li pâlez pas de "Tug of-War" par exemplye!
Caouain
30/8/1919
Viyiz étout: