Moussieu l'Editeu,
Le Ph'lip est hors de la vaie, car j'veinds d'lenvié au liet et j'm'en vais prendre l'opportunitié d'vos d'mandé votre avis. Y print fraid à un entêrrement mêcrédi et y n'a fait qu'd'êtérnué tout l'jour. J'y'ai donné un vêrre caud et j'y'ai mint à ses pids eune brique que j'avais caûffe en'v'loppée dans eune blanket. Ach'teu j'm'en vais vos pôsé eune tchéstchon.
J'avais liu dans votre gâzette qu'une femme dans l's Etats s'sait eune bouonne chose. Y pathait qu'ous en approuvez. Eh ben, j'ai réfliéchi là-d'sûs, et j's'y v'nue à pensé que chen tchi lûs faut ch'est eune femme comme mé.
Sans doute, ou voudrez savé pourtchi. Ecoutez, et j'm'en vais vos dithe.
A qu'menchi, si j'tais dans la Chambre ou sûs tchique comité, j'lûs montrethais qu'une bouone Saint-Ouennaise n'a peux d'personne. J'n'ai jamais ocquo veu l'individu tch'y pouvait m'faithe m'assièthe quand j'voulais mét'nin d'but, et l'homme tch'y peut m'faithe taithe ma béque quand j'veur la gardé ovérte n'est pas ocquo né.
Le Ph'lip y'a êprouvé ben des fais, mais jamais n'a peut réussi. Et n'y'a personne dans la pâraisse tch'y n'sait pon que quand la Merrienne a tchique-chose dans la tête ou tcheint jusqu'à but. Y m'semblye que ch'est des gens d'même tchi lûs faut dans l's'Etats.
Nos membres d'campagne laissent ches villais-là faithe comme y veulent, et il est temps d'arrêté chonna ou ben notre p'tit Jêrri s'en itha ès tchians. Quand je s'sait membre, et qu'y'un d'ches balloques-là s'lév'tha pour propôsé des dêpenses, j'me lév'thai étout mé - pour l'vé la Cliâmeur de Hâro. Je n'me fiche pas mal d'autchune personne. Je f'thait man d'vé comme un bouonne Jèrriaise.
Ma bouonnehomme dit que j's'y têtoigne comme eune mule, mais n'êtes-ous pas d'avis qu'si y'avait yeu pûs d'têtoignes dans l's'Etats d'pis la libéthâtion, nou n'éthait pas veu tant d'bêtises et tant d'folies? Y'a trop d'membres au jour d'anniet tch'ont peux d'dithe chen tch'y pensent et d'voté comme y dév'thaient. J'vos dis tch'il est temps d'crié halte.
Il est vrai qu'si fallait pâslé en angliais j'me trouv'thais ben embêtée, mais heutheusement n'y'a autchune louë tchi vos empêche d'adréssé la Chambre en Jêrriais. Le Ph'lip dit qu'nous s'fich'cha d'mé, mais j'vos garantis que l'preumyi tch'y y'êprouv'tha s'en r'pentitha ben vite. Man vier parapluie est ocquo solide, et eune bouonne woppe à travers la tête le f'tha s'comporté. Ben seûx tch'y ne d'man'da pas pour eune deuxième.
Je n'sait pon trop ben si j'dév'thais prendre pour Sénateur ou pour Député. quand je d'mande au Ph'lip y m'dis d'allé m'couochi, mais les vaisins m'disent tous tch'y vot'tont pour mé, quand même je prendrais pour Juré Justicier. Et j'êthais tout plien d'support à Saint-Louothains, ouêsque j'ai de couôsins, comme ou l'savez, et à la Trin'té, ouêsque j'ai un n'veu par mathiage tch'a r'fûsé trais chents louis pour une g'niche r'nouv'lée, et tch'a bétôt une douzaine de mousses. Ecrivez-mé, si vos pliait et dites-mé, tchêsque j'dév'thais faithe.
Viyiz étout: