à Portinfer
Saint Ou.
Moussieu l'Editeu,
Chutte semaine la Merrienne a fait d'san mûs pour comprendre chein tchi s'est pâssé dans l's Etats, mais hier au sé ou m'dit qu'ou 'tait aussi savante, après aver tâchi d'saver tchesque touos chais chiffres dans la gâzette voulaient dithe. “Yunne des choses que j'trouve drôle, et pûs qu'drôle,” ou s'fit, “ch'est qu'la 'Post' avait rapporté que j'tiomes presque un million du bouon bord, épis avait ajouôté que, si tout chein que l's Etats avaient sanctionné et dêpensé était additionné, ch'tait, au contraithe, une raide balanche du mauvais bord. Peux-tu m'explitchi chonna, té, Ph'lip, tchi s'conte bein pûs savant qu'mé?”
“J'm'en vais tâchi.” j'li dis, “Ch'est chein qu'nous appèle d'la haute finance, que des gens communs comme nous n'ont autchune espéthance de comprendre. Ch'est tout bein bouon pour les Etats, mais pas pour les partitchuliers, car si tour l'monde faisaient les mêmes catchuls,y'en éthait bétôt hardi dans la minsèthe. Y'a la difféthance que l's Etats font des bêtises et trouvent que n'y'a pas assez d'sous dans l'côffrefort pour peyi lus dettes, tout ch'qu'ils ont à faithe ch'est d'êtablyi d'nouvelles taxes. En un mot, l's Etats n'peuvent pas faithe banq'route, tandis qu'un homme comme mé peut s'trouver dans l'pité. J'n'ai pas r'oublié la bordée quand, après la saîson, je m'contais riche, car j'avais bétôt chent louis à la banque, mais bein vite j'vint à vais que je d'vais bein pûs qu'chonna, et si ch'n'avait pas 'té pour l'aide que je r'chut de certains bouons amins, j'ethais, sans autchune doute, tchique biau matin, trouver Joe Balleine et sa cigare dans man bel pour faithe arrêt, et y'en éthait bein d'autres dans le même triste position.”
“Nou r'oublié pas patheilles choses” ou dit, “J'ai une bouonne mémouaithe étout. Mais j'ai veu dans chais longs rapports que certains travaux tch'avaient 'té sanctionnés s'en vont être abandonnés pour le moment, la nouvelle route du Bel Royal à La Haule, par exemplye, et autres choses. Ch'est un bouon signe.”
“Sûs un sens, vethe,” j'li dis, “mais n't'y fie pas trop. Nous en r'ouitha pasler pûs tard, car je n'crais pas que l's Etats ont ocquo apprint lus leçon. Enfin, nou vêrra d'vant la fin d'l'année. A ch'teu, Merrienne, as-tu considéthé tchesqu'i' s'est arriver à Saint Louothains?”
“Bein seux,” ou raiponnit. “Nou peut vais , à ch'teu, que si l'John Baudains n'disait rein, i' pensait hardi. Ch'est un homme r'merquablye, car i' reste Connêtablye, mais étout il a fait des conditions et l'assembliée l's a acceptées. I' m'semblye tch'i' s'est cliergi de hardi d'ses responsabilités, et l's a minses sûs d'autres épaules.”
“Vethe,” j'm'accordis. “I' ne s'sa pas embêter à ch'teu par le téléphone, ou par des gens tchi v'naient tapper à sa porte à toutes les heuthes du jour, car le secrétaithe se trouv'tha à la Salle Pârouaissiale deux fais la s'maine, et les pâraissiens éthont à aller là, au lieu de siez l'Connêtablye. Mais ch'est l's Inspecteurs des Ch'mins tch'éthont à s'gratter la tête à l'avnin, car si y'a trop d'sous d'dêpensés, ou pas assez de travas d'fait, ch'est yeux tchi s'sont bliaumés, et pas Connêtablye.”
“Il est bétôt temps que y'aie un change,” ou dit, “mais à ch'teu, Ph'lip, y s'en va aver une êlection pour Chantgni. Tchesqu'i s'en va y v'nin? J'ai ouï paslé d'un Sieur Cooper, mais i' m'semblye que ch'est un drôle de nom pour un Chantgni dans la Campagne.”
“J'n'ai pas l'honneur de l'connaître,” j'le dis, “mais j'ai ouï que ch'est un homme bein capablye. Mais ch'est pour les êlecteurs à décider. Écoute à ch'teu que j'te raconte la triste histouaithe de certains bouons Jérriais tch'avaient décidé d'aller ensemblye en France, pour une semaine ou d'même, après la saison. A ch'teu ils ont 'te forchis de rester siez-yeux.”
“J'pense bein,” ou s'fit, “tch'i' sont v'nus à vais que tout est trop chi en France chais jours.”
“Nouffé,” j'li dis, “ch'est qu'lûs femmes insistent tch'ils ithont ov yeux.”
“Et pourtchi pas?”
Moussieu, je qu'menchit à m'exciter. “Pourtchi pas!” J'm'écriyis, “pourtchi pas! Mais ch'est d'même à ch'teu. Tout a changi, et rein pûs qu'les femmes. Aut'fais quand un homme voulait aller en France pour tchiques jours pour sa santé, i' fouôrrait des sous dans sa pouchette, disait à-bétôt à la bouonnefemme, et r'venait quand sa pouchette 'tait viède, mais à ch'teu i' n'est pas maître d'aller en France tout-seu. Hélas! Les bouons viers temps.”
La bouonnefemme se mârrit “Dans chein qu't'appele les bouons viers temps,” ou s'fit à haute vouaix,” la femme 'tait une escliave, et n'avais pas un mot à dithe, mais ch'n'est pas d'même à ch'teu.”
“Comme si je n'le savais pas,” j'li dis, “après tant ans d'mathiage. Le temps veindra qu'un homme restetha dans la maison à faithe le lavage et soigni les mousses tandis qu'sa femme itha s'prom'ner.”
“Et à tchi la faute si y'a des mousses à soigni?” ou d'mandit.
“ Moussieu, j'eus à souosrithe, et ma mârrisson dispathut. “Ma vielle,” j'li dis, “je n'peux pas raipondre chutte tchestchion-là d'vant en avé pasler au Recteu. À ch'teu, sans doute, Merrienne, tu voudras savé tchesqu'i s'pâsse à Saint Piêrre.”
“Vethe,” ou dit, “le gros nuage est-i' ocquo là, et tchesqu'en est pour le secrétaithe de la pâraisse? Tu m'avais dit que y'éthait une assembliée pour décidé l'affaithe.”
“Et y'en etha yunne, et d'vant long,” j'li dis, “mais plusieurs des gens întérrêssis ont 'tait embarrassés avec les schédules chais jours, et l'assembliée n'a pas ocquo 'té convotchie. Dans l'entre-temps, y'a du travas d'fait d'un but d'la pâraisse a l'autre. Ne t'gêne pas, ch'n'est pas fini.”
“Oh bein,” ou s'fit, “i' faut arrêter, mais j'ai 'té bein intérrêssie par l'appel d'vant la Cour Royale de chais deux jeunes individus tch'avaient 'té enviés en prison pour un mais pour avé voler un mio d'fruit d'une boutique, et j'ai 'te contente de vais qu'la Cour a jugi que l'Juge Vouaisin n'éthait pas deu lûs donner d'la prison. I m'semblye que y'en a hardi d'chais appels à la Cour Royale des jugements d'la P'tite Cour.”
“Y'en a pas mal,” j'li dis, “et sans doute nous en vêrra d'autres, mais n't'imagines pas que chonna s'en va gêner le Juge Vouaisin. I' fait chein tch'i considéthe san d'vé, et pour li ch'est assez. Quant es appels, ch'est l's avocats qu'en profitent, et comme chonna tout l'monde sont satisfaits.”
Et, Moussieu, y faut que j'vos diche que ma bouonnefemme et mé je sommes bein d's'appointés que chutte fichue “holiday camp” à Pliémont ne s'en va pas dispathaitre, mais continuetha souos un autre nom. Saint Ou pouôrrait s'pâsser d'chonna.
Ph'lip
1961
Viyiz étout: