À Portinfé
St. Ou.
Moussieu l'Editeu,
J'si ocquo dans la bliâse concernant les Sénateurs. V'nez donc à m'n aide si y'a autchun moyen.
Au grand “show” d'betes en Ville, j'espéthais dé trouver des campagnards tchi pouôrraient m'donner des nouvelles, mais après en aver tchestchionné pûs d'une douzaine, je n'tais pas un mio pûs savant. Quand je d'mandais tchèsque était les quatre tchi veindraient d'dans, j'avais toutes sortes d'opinions, et ch'tait ocquo pièthe quand j'voulais saver tchèsqu'i' veindrait l'preunmi.
Y'avait un Trin'tais tchi 'tait seux qué l'Sieur Krichefski battrait tout l'restant, un autre de la même pâraisse tchi criyait tch'il éthait une djobbe à y v'nin du tout, et un traisième tchi 'tait convaîntchu tch'i' n'avait autchune chance d'embréchi les nouvelles-mathiées l'année tchi veint. Prèsque tous s'attendaient que l'Député John Lé Mèrquand s'trouv'thait dans les deux preunmiers, et que l'Bill Perchard et l'Hedley Maillard éthaient étout assez d'vouaix pour réussi. Un mio pûs tard j'rencontris un individu tchi supportait lé Sieur Farley.
À ch'teu, Moussieu, dans les circonstances ou pouôrrez comprendre que dans mes caltchuls j'n si pas pûs avanchi que je n'tais la s'maine passee mais dans l'entretemps j'ai yeu l'temps de réfléchi et de former tchiques opinions: j'si v'nu à la conclûsion que des huit candidats, y'en a six qu'ont une chance de tchique sorte. Dans l'cas de trais ou quatre, la chance est bouonne, et dans l'cas d's autres - ch'n'est qu'une chance.
Je peux m'tromper hardi, mais par chein qu'j'en vais, la campagne s'en va supporter l'Sieur Norman, John Lé Mèrquand, Bill Perchard et Hedley Maillard. Ch'n'est pas pour dithe que chais quatre mêssieux y veindront, car je crains que hardi des electeurs ne prendront pas la peine de voter, et pis nou n'sait pas tchèsqu'i' s'arriv'tha en Ville, ouèsque le Sieur Krichefski pouôrrait surprendre tout l'monde par sa mâjorité.
Peter Crill a yeu deux assembliées, mais à chatchune y'avait bein p'tit d'monde. J'n'crais pas que chonna l'a dêcouothagi, et i' 'tait tout souôriant quand je l'vis à Springfield.
Dans yunne des pûs droles d'êlections que j'ai veu dans l'couothant d'une longue vie, nou-s-a ocquo l'idée que rein n'est certain et que l'onze du préchain mais pouorrait produithe de grandes surprînses.
Ocquo une autre chose, Moussieu. I' pathait, par chein qué j'ai liut dans la “Post” que notre “J.J.” n'a pas ocquo dit définitivement s'i' prend ou s'i' prend ou s'i'n'prend pas. Au moment il est en Angliétêrre à êtudier pour Avocat, et la gâzette dit tch'il a 'té impôssiblye de dêcouvri s'n adresse pour li êcrithe ou li téléfôner. J'si prèsque persuadé tch'i ditha nennîn mais ch'est un drôle dé gamîn, et il est capablye d'arrêter jusqu'a la dernié minute quand ch'né s'sait qué pour embêter l's autres. Si, par chance, i' r'venait et annoncait une réunion pour huit heuthes, j'prendrais bouon soin d'n'être pas là d'vant huit heuthes et d'mie, et je s'ais ocquo là d'vant li. Y'a bein d's années, quand l'Pasteur Godel 'tait à Saint Piêrre, i' 'tait tréjous dans la tchaise à la minute et j'l'ai ouï dithe qu'avec li la ponctualité 'tait un vice. Si notre “J.J.” s'était mînt prédicateur local, les bouonnes gens d'la congrégâtion n'éthaient pas yeu à être dans lûs bancs d'vant onze heuthes du matin au lieu de djais heuthes et d'mie, et l'diné n'éthait pas 'te sûs la tablye d'vant deux heuthes car si l' “J.J.” avait qu'menchi tard, il éthait 'te longtemps étout d'vant arriver à la Bénédiction.
À ch'teu, deus-trais mots pour lé “show”. Le temps n'avait pas bouonne mine quand vînt l'heuthe pour sorti, et j'prins ma grand câsaque et man muffleur, mais j'eûmes la chance, car sinon pour un mio d'brousse par bordée, le temps s'comportit assez bein, et j'r'vins siez-nous sans être trop mouollyi, et sobre comme un Juge. Même la Merrienne fut forchie d'admettre que j'm'étais comporté comme un Principâ d'Pâraisse dait faithe, et ou m'embréchit quand j'li dit que san couôsin Richardson avait print l'preunmi prix dans une bouonne clâsse de g'niches r'nouv'llées. Ou vos r'souveindrez, Moussieu, qu'à Saint Sauveux oulle avait 'té battue par yunne de la même êtablye mais chutte fais ou vint preunmièthe sans autchune diffitchulté, tandis qu'l'autre ne fut pas r'gardée. Nou n'peut pas sinon craithe qu'à “Fairview” le “referee” n'y viyait pas trop cliait!
La clâsse pour les “senior yearlings” tait yunne des miyeuthes que j'aie jamais veu, et y'avait hardi à admither étout dans les pûs jeunes. Y'avait étout une assez forte clâsse de jeunes boeux et l'Edgar Mouothant en avait yun là tchi fut bein près de v'nin rêserve pour lé championnat contre yun tch'était dans les pûs vièrs. Le sien à Edgar, que nou r'vêrra l'année tchi veint éthait voulut être un mio rustique, mais i' n'ôsait pas, car ch'tait l'Chantgnyi tchi le m'né, et i' n'éthait pas voulu être mint en cage pour aver rompu la paix publique.
Dans les jeunes vaques, le Fraînque Avri vînt preunmyi, et pûs tard vînt rêserve pour lé championnat. La p'tite vaque à Garnet Rom'thi que j'avais tant admithé au “show” des Trais Pâraîsses, ne pliut pas pûs qu'chonna ès Juges, et je n'sais pas pourtchi. Dans les vielles vaques, Eric Vibert, dé Saint Louothains, s'trouvit contre la seinne à Jack Rondé et ch'tait l'”referee” tchi décidit l'affaithe. La sienne à Jack avait l'miyeu piéchot, mais i' n'y a jamais yeu moyen d'li donner chein qu'en angliais nou-s-appèle lé “bloom”.
Ph'lip
Viyiz étout: