à Portinfé, Saint Ou.
Moussieu l'Editeu,
La Merrienne ne s'trouve pas trop bein chais jours, car oulle a attrapé une raide suée d'fraid, et ou dit que ch'est d'sa faute, car, même dans la grande chaleu de la s'maine passée, ou n'éthait pas deu s'défaithe de yun de ses cotillons. An moment oulle en a au mains quatre et p't'être même chînq, mais ou gronne lé long des jours, et n'me donne donne pas d'paix. San doute, le Bon Dieu avait dans l'idée quand I' donnit une femme au pouôre Adam qu'I faisait une bouanne chose, mais ou qu'menchit par l'ruiner et li faithe la vie mînséthablye. Parmi les d'scendants du couplye, y'a yeu des hardelles tchi n'valaient pas mus, mème s'i' mettatent des cotillons au lieu de cheinn qu'Eve considéthait nécessaithe. Enfin, Moussieu, avec chonna nou n'voudrait pas s'en passer car i' peuvent tchiquefais vos donner hardi d'pliaîsi.
Hier au sé sé trouvant un mio mûs après san tais, ou s'mint a pâsler d's Etats, et ou me d'mandit si j'criyais que tout îthait bein à ch'teu parmi les membres tch'avaient yeu chutte grande dispute la s'maine pàssée car, oulle ajouôtit la Post pathait aver ocquo des doutanches."
Et j'li dis avec raison, car quant à mé jamais je n'craithai que l'Cyril Le Merquand et l'Sénateur Krichefski r'veindront bouons amîns après chien tchi s'est pâssé. Le gros Sénateur est bein lien d'être satisfait d'la décision la s'maine pàssée, et i' n'est pas un homme pour oublier autchune personne tchi ly'a fait fort.
Mais ou s'fit, j'ai tâchi d'comprendre tchèsqu'en fut la fin de chutte longue distchussion mais j'n'y comprends rein. Peux-tu m'en dithe pûs long, Ph'lip?
Pas hardi, j'li raîponnis, mais i' pathaît qu'les Sénateurs Cyril Le Merquand et Rumfitt fîtent une manièthe d'apologie, et qu'à la fin de l'arlévée rein n'fut changi. Mais si je n'me trompe pas, la fanmeuse députâtion tchi 'tait pour aller à Londres n'existe pûs et tout ch'qui résulte dé tout chu train ch'est que deux membres tch'avaient 'té grands amîns pour des années sont à ch'teu comme cat et tchan et nou crains pour de bon.
Mais ou dit, lé Cyril garde san poste comme Président des Finances?
Véthe, j'li dis, car autrement i' n'y a autchune doute que l'Senateur Krichefski l'éthait rempliéchi, et j'si pérsuadé que la mâjorité des membres n'voulaient pas chonna.
Nan, ou s'accordit, mais à ch'teu Ph'lip, i' pathaît que j'allons bétôt perdre notre présent Bailli. Tchèsqu'i' s'en va l'rempliéchi?
Sans autchune doute, j'li dis, si l'Sieur Harrison ne peut pas, j'èthons lé Sieur L'Mâsuthi avec le Sieur Ereaut comme Prochuleux et p't'etre le Peter Crill Avocat Generai s'i' veur la djobbe.
Ch'est à li d'saver, ou dit, mais il est tempts d'dithe un mot ou deux au sujet dé chein tchi s'est arrivé sus les cauchies. Si les fichus dockeurs n'veulent pas mettre les tomates à bord i' pouôrrithant sûs les pliantes. Ch'est honteux, tu sais, Ph'lip. Est-che qué n'y a rein à faithe?
Oui Marrienne, j'li dis, si j'en avais l'pouvé comme j'en ai la volonté y'a un certain individu tchi s'trouv'thait bétôt au fond d'la cauchie avec une bouonne grôsse pierre autou du co. Quant ès hommes, i' sont comme un fliantchet d'brebis. Nou dev'thait les envier an Russie, un pays tchi sait tchi faithe avec des hommes tchi n'veulent pas travaillyi. I' n'y a pas strikes là pour une bouonne raison.
Pâlant dl'a Russie ou dit, "crais-tu que j'sommes en dangi d'une autre grande dguerre? J'ai d'la peine à dormi quand j'y pense, car chutte fais nou n'éthait pas l'temps d'dithe ses prièthes, ou même de s'habillyi dans san dinmanche si yunne de chein bombes tchiyait sus l'Ile. Nou pâsle tchiquefais d'la fin du monde, mais oulle est p't'être pûs près que nou n'crais.
Nennin, Marrienne, j'li dis, je n'crais pas que y'etha d'la d'guêrre, car les grôsses têtes d'la Russie savent bein tchèsqu'i' lûs arriv'thait, épis bein vite, s'ou laîssait couôre la preumié bombe. Si l'Sieur Kruschev était seux d'gagni il éthait qu'menchi y'a longtemps car si Hitler n'avait pas hardi d'respect pour la vie humaine, ch't'ichin en a ocquo mains. Heutheusement lé Ouest est prépathé chutte fais, pas comme en quatorae et en trente-neuf quand, pour un temps l'Angliétêrre n'avait autchun aide. I' n'faut pas s'gêner, Merienne, car la Providence nos supportétha comme oulle a fait dans l'pâsse.
Ch'est un grand confort de saver chonna, ou dit, A ch'teu j'pouôrrai m'endormi sans crainte.
La préchaine chose que la bouonnefemme voulit distchuter ch'tait chein qu'la Post dit au sujet d'l'êlection dans p'tit d'temps pour Connêtablye d'la Ville. I' pathaît, ou s'fit, que nou pouôrrait vais quatre candidats. Et tchèsqu'i' nos a dit que l'Sieur Pôdétre ne r'prendra pas?
Quant à li, Merrienne, j'li dis, je n'sais pas, mais quant au restant i' pouôrrait y'aver deux candidats ou même trais. Lé John Richardson, lé Sieur Ryan , et l'Député Bathette étaient tout du support, mais je n'peux pas craithe que l'ex-Député Cronshaw est serieux. Ch'est un charmant corps mais i' m'semblye tch'il a assez à faithe chais jours sans s'mêler dans la politique.
Et des autres, ou d'mandit, tchesqu'a la miyeu chance à t'n idée?
J'n'ai pas d'vouaix en Ville, j'li dis et j'n'ai pour dithe autchune connaissance de chein tchi s'pâsse là chais jours. Au samedi tchiquefais j'rencontre des gens tchi d'meuthent dans la pâraisse et j'espethe que la s'maine tchi veint je s'sais pus à même de former une opinion. Si j'tais forchi d'chouaisi à ch'teu j'métt'rais mes sous sûs l'John Richardson mais sans m'faithe trop seux que je m'en allais pas être hors dé pouchette. A ch'teu, Merrienne, j'en avons dit présque assez pour chutte sémaine. Nou pouôrrait mangi une bouochie épis au liet.
Et Moussieu, en soupant, j'pâslimes pour tchiques minutes de chais fermiers tchi vendent bestiaux et s'mettent à craître des tomates et des brécolis. Le grand avantage, i' m'semblye, est qu'au dinmanche nou peut se r'pôser mais avec chonna j'si comme bein d'autres tchi maintchennent qu'unne ferme sans bestiaux n'est pas une ferme du tout. Tchèsqu'ous en dites. Moussieu: les brécolis et les tomates sus une ferme, valent-i mûs qu'les vaques tchi fournissent lé lait?
Ph'lip
Viyiz étout: