Lé solé ou la leune?

Pis n'en v'chîn ieune qu'ou n'avez p'têt' pas ouï d'vant. Un cèrtain “moussieu” r'vénait d'eune séthée, dé bouon matîn au cliai d'la leune. Il en avait “assez à porter” comme nou dit, et ch'tait avec d'la peine qu'i' s'en allait hanpchinnant lé long du rélié. Quand s'vînt un temps i' rencontrit un autre “moussieu” et l'achitrit en toute hardgièche.

“Peux-tu m'dithe,” i' lî dit, “tch'est qu'est ch'la là-haut - lé solé ou la leune: fait-i' niet ou est-i' jour?”

L'autre, tch'était d'èrtou d'eune séthée étou, li, et qui 'tait acouo pus bragi qu'l'autre - i' 'tait justément l'bouon gas à tchi d'mander pathelle tchestion!

Enfîn, tréjous, ch'î-chîn lî dit qu'i' n'en'était cèrtainement pas trop seux li-même et qu'i' n'pouvait pon lî rêpondre au juste. Nus des deux n'savaient s'il 'tait tard au sé ou heuse au matîn! Dans l'entrétemps un traîsième îndividu geuthit au liain, et nous deux “trop-plieins” décidîtent qué ch'tî-chîn s'sait seux d'saver. Mais li, neumétho trais, quand nou lî pôsit la tchestion - sav'ous tch'est qu'i' rêponnit?

“Mêssieurs,” i' dit, “ous allez m'extchuser, car dame jé n'peux pas vouos aidgi; ou viyiz, jé n'sis pas d'chutte partie du pays et jé n'connais pas!”