Les Pages Jèrriaises

À l'Êcole du Dînmanche


 

L'églyise dé St. George

L'églyise dé St. George

Un maître d'êcole du dimanche v'nait dé d'mander eune tchestion à la classe. Ch'tait acouo du temps qu'les léçons 'taient acouo en français, mais n'y'a tout d'même pas bein d's années. Acheteu sans doute, ch'est tout en angliais. J'pense qué la dreine êcole du Dimanche ouêque nou-s-avait les léçons en français 'tait à St Ou, à la p'tite égise dé St. Georges, et dé ch'la y'a dans les chînq ou siex ans seulement. J'ai dit “j'pense" car j'n'en sis pas positive, mais i' s'sait bein întérêssant dé saver s'i' y'a eune êcole du dimanche tch'a ieu les léçons en français d'enpis.

Mais nouos v'là bein édgithés du sujet ; èrvénons à nouos moutons. Un maître v'nait dé d'mander eune tchestion à la classe - "Garçons, quelles sont les bonnes oeuvres?

Y'eut un silence pour tchiques ségondes pis tout à co un babouîn d'eune dgiexaine d'années s'buttit et annoncit d'un air rêvilli - “ch'est les grainues, moussieu, car manman nouos en fricache tchiquefais!”

Eune aut' fais, en d'mandant lé caticème ès êcolièrs, lé maitre fut surprîns et chotchi par chu même avé tchi donnit pourtant eune rêponse tout à fait naturelle.

"Quel est votre prochain?” - était la tchestion.

I' n'fallait pon grand caltchul pour chette-chîn et l'mousse né donnit dgéthe la chance ès autres dé rêpondre. “Lé couôsîn Bliampid à travèrs les clios, moussieu," s'fit-i' tout fyi d'pouver apprendre tchique pétite affaithe à san maître!

Dé-vrai, l'êfant n'avait pon donné les rêponses voulues mais i' faut dithe tch'i' n'tait pon borné d'întelligence car il avait au mains montré tch'i' possédait eune bouonne mémouaithe!

 

FLM
1937

 

Viyiz étout:

 

Les Pages Jèrriaises