Le Ménage ès Feuvres,
Lé 4'd'août, 1979.
St. Ouën.
'Nou mé d'mande souvent si je f'thais la même chose comme j'ai fait dans chutte vie si j'avais l'pouver et la chance d'en aver eune deuxième. Eh bein, si ch'tait à condition dé r'faithe la même chose qué la deuxième vie m'fûsse accordée, j'dithais "oui," sans doute, car prannant l'bouan auve lé mauvais, y'a ieu pus d'bouan qué d'mauvais. Ch'n'a pon 'té tout roses, mais y'a ieu pus d'roses que d'êpingnes, et ch'est à bein près tout chein qu' nou peut s'attendre dans la vie, et, Dgieu mèrci, pour mé ch'à 'té eune bouanne vie.
Mais si j'avais l'chouaix et les mouoyens - comme les jannes ont au jour d'aniet, grâce à l'îndustrie, lé fort travas et la vertu d'couoyi d'lus pathents et anchètres - jé c'mench'chais par aver eune raide bouanne êducâtion auve l'ambition d'êt' un "astronaute" et d'mett' lé pid sus la leune, comme lé fidrent les Améthitchains Armstrong et Aldrin lé 20 d'juilet, 1969. Lé temps s' pàsse si vite tch'i' y'a quàsi d'la peine à craithe qué y'a déjà dgiex ans d'pis chu grand êvènement.
A tchi qu' ch'la sèrt, d'aller à la leune, ous-allez m'dithe. Eh bein, ou-s-avez p't-êt' raîson, et j'mé d'mande si j'éthais rêellement l'couothage tch'i' faut pour chu mêtchi-là. Nou pâle dé prendre san couothage à deux rnains et cachi dans la dgeule des loups, comme disaient l's anciens, mais il en fallait, du couothage, pour entréprendre un viage dé même.
Ches Améthitchains-là sont d'braves gens. Lé viage à la leune 'tait pliein d'aventuthe et d'dangi, et j'ai souvent éprouvé à m'înmaginner lus pensées au moment d'tchitter la terre, soûffliés en l'air dans eune manniéthe dé grosse boutelle par eune explosion en dssous d'ieux, pour faithe un viage tch'éthait peu êt' sans r'tou envèrs la tèrre et lus fanmil'yes.
Chutte soûffliéthie en l'air 'tait en lyi-même eune grande êpreuve. Nou n'eut presque pon rêaliser l'isolement absolu d'l'astronaute couochi sus l'dos dans l'nez d'chutte vaituthe "spatiale" lanchie dans l'espace , et l'condithe dans trais jours à travers des deux chent quarante mille milles à la leune. I' sont couochis sus l'dos à r'garder un tas dé p'tites veues et d'boutons tchi lus disent si tout est bein et va bein. Il' ont déjà 'té couochis d'même eune heuthe et d'mîe, et ont à attendre acouo eune demi-heuthe dévant êt' soûffliés en l'air quandi tch'i' sont à remplyi l'engîn en d'mus d'ieux et faithe les dreines prépathâtions pour l'explosion.
Ch'est seuz qué l'temps s'pâssait douochement, minnute par minnute. Les dreines chinq arrivent et l's astronautes daivent penser à lus femmes et fanmil'yes. I' n'saithont pon d'vant tch'i' r'veingent si l'Bouan Dgieu s'en va les prèserver duthant l'aventuthe tch'i' s'en vont entréprendre, mais.la femme dé l'astronaute Armstrong a la fouai, et en tchittant ou li'a 'mins eune pétite carte dans la main sus tchi qu' oulle avait écrit des mots du huitième vèrset du Sieaume 139: "Si j'monte jusqué dans les Cieux, Tu'es là! " I' r'garde la carte (i' l'a cliutée sus la pliaque des instrûments) et v'la tchi lî donne du couothage. I' liêsait même les mots pour la chentième fais quand la vaituthe spatiale, poüssée rapidement en l'air par l'explosion en d'ssous, lî pathaîssait monter tout alentou d'li et l'enfonçait dans san mo liet d' "caoutchouc" jusqu'à tchi lî sembliait tch'il avait un paids ecrâsant sus l'corps. Mais la sensâtion s'pâssit à m'suthe qué la vaituthe montait dans l'viède dé l'espace, et i' n'avait pon du tout d'paids et i' fallut s'accouôteunmer à bouogi sans l'paids même d'eune plieunme dé poule à lî garder la tête en haut et les pids en bas!
Quâsi trais jours pus tard les Sieurs Armstrong et Aldrin mettaient l'pid sus la leune et s'trouvaient êmèrvilyis par le speclacl'ye d'vant ieux - montangnes, vallées, crévasses, rotchièrs, "cratères " - eune désolâtion tèrribl'ye dans sa noblièche "topographique".
Les preunmiéthes heuthes fûdrent sans ennion. Lé temps s'pâssit vite en ramâssant les mios d'grès et d'rotchi pour les rapporter à tèrre pour les analyses scientifiques, et en prannant des portraits dé tout ch'tch'i' viyaient.
Mais i' fallait acouo du couothage dé lus part. L'engîn d'lus p'tite vaituthe leunaithe allait-i' c'menchi pour ieux à sauter hors dé d'ssus la leune et r'joindre la vaituthe spatiale "Apollo 11" tch'avait 'té à faithe lé tou d'la leune souos l'commandement d'l'astronaute Collins quandi tch'il-taient d'ssus. Heutheusement qu' tout allit bein et, à la jouaie dé Collins, tchi s'était trouvé hardi seul dans l'entrétemps, les deux vaituthes sé joingnidrent sans accident en d'ssus d'la leune et les trais întrépides èrvîndrent à tèrre en Améthique sains et saufs.
Viyiz étout: