Les Pages Jèrriaises

L'Homme dé d'dans la Leune


 

L'Houmme dans la Leune

L'Homme dé d'dans la Leune dait beîn s'pliaithe là-haut
Si liain des bûsards, des achocres et des fos,
Et sans aver jamais dé femme à l'badrer
Ou d'racachie d'mousses à v'nin l'êlourder !

L'Homme dé d'dans la Leune fait bein d'y rester
Pustôt qu'd'être ichîn à prendre du fraid,
Ou p't'être à s'engouer auve un gros mio d'gras lard,
Ou à s'empouaisonner auve dé mauvais hommard !

L'Homme dé d'dans la Leune peut rester au liet,
Ou sé l'ver d'bouanne heuthe, ch'est tout à san gré.
I' n'a pon pèrsonne à l'étibotchi,
Et comme i' n'y'a pas d' "train" i' n'dait pas l'mantchi!

L'Homme dé d'dans la Leune sé fiche bein du temps :
Ni la plyie ni la grille né l'cachent par-dédans,
Et jamais né r'garde ioù qu'i' s'en va piler,
Car là-haut n'y'a pon ni routes ni pité !

L'Homme dé d'dans la Leune a la vie bein belle :
Chaque sé, faithe l'amour à toutes les ételles
Sans bésoin dé craindre la botte à tchique péthe,
Ou la langue bein affilée d'eune fichue belle-méthe !

L'Homme dé d'dans la Leune, s'i' s'en va s'proum'ner,
N'est pon oblyigi dé s'mettre à s'laver :
Et quant à la barbe, comme i' n'en n'a pon,
Jamais en s'râsant n'sé cop'sa l'moton !

L'Homme dé d'dans la Leune s'i' s'en va pour eune trotte
N'a jamais bésoin d'bliatchinner ses bottes,
Et jamais chabots ni trop p'tits souliers
Né li mettent dé poulettes sus autchun d's'ortés !

L'Homme dé d'dans la Leune, n'ayant pon d'dgéthets,
N'a jamais la peine dé brîngi ses braies,
Et, en compangnie, jamais n's'est trouvé
Auve san bouton d'bradgette déboutonné!

"Élie"

 

Viyiz étout:

 

Les Pages Jèrriaises