Les Pages Jèrriaises

Eune Supposition

 

L'Houmme dans la Leune

Les êtres humains n'împorte iou
En tout âge et généthâtion,
Ont admithé la Leune au liain -
Dépis lé temps d'la Créâtion.
D'Adam jusqu'à chu jour ichîn,
Sa lumiéthe les a êcliaithis
Sus la tèrre et la mé, sans r'lâche -
Avau l's années sus l'c'mîn d'la Vie.

Les poètes, auv' lus don spécial,
Ont louangi sans cêsse sa bieauté
Atout des vèrsets à s'n égard,
L'app'lant souvent “Reine dé la niet”;
Reine oulle est étout ès auteurs,
Qu'ont raconté dans tant d'lus chants
Lé mystéthe qui l'a entourée -
Suspendue là pour des mille ans.

Toutes les crianches entouorre la Leune
Qui nos sont v'nus dé péthe en fis,
Ont couomme l'histouaithe dé san pouver
Lus originne dans l'temps jadis.
Dé vaie l'craissant l' travèrs d'eune f'nêtre
Amène la mauvaise chance, nou dit.
Coumme fait étout sa réfléction
Dans l'ieau dé canné ou vivyi.

Il est counnu qué cèrtaines gens
A la plieine leune ont dêrangi,
Étout qué l'pouver des chorchièrs
A chu temps-là est renforchi.
Mais mauvaise chance et chorchell'lie,
Sont bein liain d'être dans les pensées
Des amouotheurs tchi lus promènent
Au cliai d'ses rayons argentés.

Mais les crianches au temps à v'nin
Né s'sont pon counnues par les gens,
A cause des êvénements d' ch't' année,
Quand d's hoummes d'un esprit tchestchionnant
Eûtent lé couothage d'aller pour vaie
S'oulle 'tait vraiement faite dé fromage,
Ou s'i' trouv'thaient l'houmme dans la Leune
A l's attendre à la fin d'lus viage!

Ches deux-s-trais jours-là en juillet -
Toutes les nàtions 'taient à l'attente
Dé chu moment-là historique,
Quand lus machinne f'thait la descente,
Et qu'l'houmme pour la toute preunmié fais
Sus chut autre monde mettrait san pid,
S'exposant pour l'amour d'la scienche
A i' n' savait dgéthe tchi dangi.

Mais les millions d'gens qu'attendaient
La nouvelle dé lus aventuthes,
Pensant qu'i' trouv'thaient singne dé vie,
Ou p'têtre tchique genre dé créatuthe -
Fûtent-t'i' déchus d'saver qu'la Leune
N'tait rein d' pus qu'un énorme d'sèrt,
Et qu's'i' y' a vie à part d'ichin
Qu'ou s'trouve ailleurs dans l'Unnivèrs?

Tch'est qu'ch'est qu' il' espéthaient trouver
Là dans les Cieux si liain dé nous,
Qu'éthait changi la vie qu'nou mène,
Ôté l'fardé' qu'nou porte tous?
Car i' y'a bein raison à craithe,
Qu'au jour d'aniet un tas d'gens pensent
Qu' i' n'reste rein dans chu Monde-chîn
Pour justifier lus existence!

Et, tch'est qui sait ? S'peut qu' y'ait tchique bord
Dans l'înmensité d'l'Unnivèrs,
P't-être eune aut' civilisâtion
Auve la rêponse qué tout l'monde chèrchent;
Et, l'ayant trouvée, ou pouôrrait
Être la cause d'unni les nâtions,
Pour qué paix et bouanne volanté
Es'saient auve nou Ichîn tréjous !

 

ALP

1969

 

Viyiz étout:

 

Les Pages Jèrriaises