En liaisant l'Evening Post l'aut'e sé, je vis qu'les messieux et dames qu'étaient interêssis dans l' "Eisteddfodd" que nou t'nait ichin annuellement devant la djerre, avaient ieu un grand "meetin" et avaient décidé de réorganiser la même sorte de fête l'hivé tchi vaint.
En arrangeant lus programme, i' fut tchestion du Jerriais, et certains individus y minrent de l'opposition, et n'aithaient pas voulu que l'Comité s'en otchupisse du tout.
V'là qu'aithait 'té bon si les siens qu'objectaient avaient avanchi autchunes raisons vâlablyes, mais nennin! L'opposition v'nait d'la part de deux ouaîsiaux de race britannique, qui n'en comprennent presque pas un mot.
Iun d'ieux, qui n'tait même pas présent, avait envié un message par son confrère disant que selon li, le Jerriais était un langage grôssi ("coarse") et n'dév'thait pas être toléré sus l'syllabus.
Ah ça! ou pouvez bain penser si ch'est qu'les pliumes du Caouain li dréchirent sus l'dos en liaisant ditèt.
Je prins chenna comme une insulte, mé!
Mé, qui passe une partie d'mes nyits à composer et à êcrithe des articlyes pour l'édification de vingt-chinq mille lecteurs et lectrices qu'aiment, je suppose, le patois de lus île natale, un patois qu'a 'té immortalisé par des hommes comme Sir Robert Pipon Mathèt, le Juge Augustus A. Le Gros, Ph'lippe Asplet, le Juge Messervy et not'e petit amnin ergretté, Jock Luce, sans pâler d'bain d'autres, dont les noms né me vainnent pas à l'idée pour le moment; et pis d'vaie un espèce d'êtrangi s'en v'nin nouos dithe que ch'est un langage coarse!
Comment qu'il arrive à d'patheilles conclusions, li qui n'peut ni l'liaithe ni l'êcrithe et qui n'en comprend pas un mot?
Est-che qu'i' y avait autchune chose de grôssi dans les pièches que l'comité chouaîsit pour les compétitions l'année d'vant la djerre?
Y avait i' rain d'offensif dans les récitations pour les êfants, au Oddfellow's Hall?
Y avait-i' autchune pathole de malsonnante dans "La Picagneresse" à Sir Robert Mathèt qu'eut un 'té succès au concert à Westmount.
Et s'i' faut en v'nin jusque là, est-che que l'poure Caouain, qu'est pourtant un ouaisé bain mal-êlevé, peut être atchusé de lanchi, touos les tchinze jours, des grossiéthetés à la tête de ses lecteurs.
Je n'crai réellement pas que nou peut li r'prochi une patheille chose.
Si ch'tait d'même, nos directeurs, des messieux qui sont tout ch'qu'y a de pus comme-i'-faut, criethaient bétôt, "Halte-là, Caouain!"
Nennin, mes chiers amins, je n'pouvons pas permettre de patheilles diffamations de not'e vier patois, et je sis convaintchu qu'ous êtes tous avec mé dans mes protestations.
Mais dites-don, tch'est qu'ous en criyiez, comment que v'là qui f'thait de li pitchi une rémontrance?
Caouain
Les Chroniques de Jersey 19/2/1921
Viyiz étout: