Les Jerriais sont tous d'un bâté,
Et devraient aimer lus râté;
Car il est vraiment respectablle,
Fort ancien et fort vénérablle;
Sans aver le même paler,
Je pouvons fort bein deviser
Entre nous sus aucune affaire,
Et d'une faichon assez cllaire.

Les gens de l'Est ont un accent
Du chein du Vouest bein différent;
Dans le Vouest nous frume la bouoche
Et la voix semblle être pus douoche;
Dans l'Est i'montrent pus les dents,
Et autrement sont différents;
Ch'est au point que j'avons ouï dire,
Mais j'pensons que ch'tait pour rire,
Qu'un marchi n'pouvait s'faire aut'fais
D'St. Ouennais a St. Martinais;
S'il êtait question de mariage,
Fille et garçons s'entendraient j'gage;
Es cheins qui voudraient en douter,
Je lus requemande d'êprouver.

A St. Martin i'dizent veze.
Faisant d'l' r un z comme en peze,
Nouz y leve les pids en haaut,
Et nous y bet daut'chose que d'll'iaaue;
Les autres paraisses vaisines
De chu pàler là sont couosines;
l' vont à la pêque eu batquaaux,
Et à terre cachent des chvaaux;
Mais ous puorrez mus le comprendre
En allant sus les llieux l'entendre.
Les St. Ouennais vont au Puléc
Ramasser des trainées de vréc,
Et aussi bein à Ste Marie
Nouz en fait autant je parie.

L'St. Breladais pâle d'la Touo,
Atou du geon cauffe le fouo,
Appele les vlicots des coques
Est tout environné de roques.

A St. Louthains et à St. Pierre
Nou prend d'temps en temps un ptit vèrre
Nouz y pale le jerriais pliat
Et nou dit Coin Vathin, vethe-guia
L'r entre voyelles se change
En th, est che pon étrange ?
D'autre côté a St. Martin
Ch'est un z que nou l'fait devnin
Nouz y touanne à la grande quethue
Nouz y fait servir tour et cue,
Dans qui nou met le cidre doux,
Dont nous peut bere sans ête souls,
Mais nou n'en est pas pus à s'n aise,
Car i' donne la guernesiaise ,
Je n'cherche pas à faire affront,
J'espere que tous le creront.

Che n'est pas là toute l'histouaire
Du Jerriais, comme ou pouvez craire;
Je n'ai que touchi le sujet,
Qui sans doute sera l'objet
D'une etude de main de maître,
Et n'tergera pas à paraitre.

P.L.