Moussieu l'Editeu,
Le temps par ichin est bé et caud dans l'jour, mais dans la niét y fait grand' fraid. Ou trouv'thez drôle que dans les circonstances la Merrienne n'se pliaint pas, mais oulle est rêjouie parsque dans san gardin les tiulipes s'en veinnent, et, comme ou dit, de niét si deux pérsonnes dans l'même liét n'peuvent pas s'gardé cauds ch'est manque d'êprouvé, et, Moussieu, sûs chu point-là, oulle a raison.
Oulle est bein intérêssie chais jours dans chein qu'la gâzette rapport entouôre le Tourisme. Dans s'n'idée les gens à la tête n'savent pas trop bein tchèsqu'y font. Par éxemplye, ou n'approuve pas du tout d'chutte visite en Italie, car ou dit qu'les Italiens n'ont pas valu quatre sous dépis l'temps du fameux César, et qui si l'Comité du Tourisme avait voulu donné une coupe couôtant pûs d'souësante louis, et envié un tchétchiot décoré tchiquebord, ils éthaient deu chouâsi tchique piéche en Anglietèrre.
“Quand nou va à un dîné, ou à autchune assembliée sociale,” ou dit, “nous est sérvis par d's'indîvidus tch'y sont ichin pour chein tch'y peuvent attrapé. Mais nou n'gâgne rain d'êcrithe des lettres à la Post objéctant, car ou s'y'en va étout, notre fameuse gâzétte, et sans doute dans tchiques jours j'éthons d'mérveilleux rapports de chein tchi s'est passé, et d'la grande récéption accordée à tous tch'y v'naient d'Jêrri. Ch'est des sous fliantchis à la mé, man Ph'lip, et tu vêrras que bétot l'île après année. Ch'ne s'sa pas les vîsiteurs d'Italie tch'empliéthont nos hotels et nos boarding-house.”
“Une asséz drôle de chose que j'ai liut dans la gâzette,” ou continuit. “Y pathait qu'en Djérnézi ils ont trouvé une nouvelle maniéthe de happé d's'ormérs. Y sont souos l'iau, et il est dit que l's'Etats de Djérnézi sont hardi concérnés et craignent que si chonna continue, y n'étha bétôt pûs d'ormérs le long d'lûs côtes. Il est même dit que la mâsse d'ormérs tchi veinnent ichin de Djérnézi sont attrapés d'chutte nouvelle mode.”
“J'comprends qu'ch'est vrai,” j'l'y dit, “et si la louai n'est pas changi, je sommes seux d'vais la même chose ichin d'vant long et che s'sa inutile d'allé à l'Eta, à la Grève-de-Lecq ou à La Pulente pour pêchi à la vieille manièthe. Pourtant y sont râres assez les fichus ormérs. La dernié fais qu'j'y fut j'attrapit trais ormérs et yunne des pûs mauvaises suées-d'fraid que j'ai jamais yeu dans ma vie. Si ach'teu y'avait moyen de l's'attrapé souos l'iau, nou pouôrrait abandonné l'affaithe tout-à-fait.”
Ou considéthit pour tchiques instants épis: “Oublions l'Tourisme et l's'ormérs pour le moment,” ou dit. “Tu'as veu, sans doute, que l'Eisteddfod ne prospèthe pas chais jours et tchi y'a même tchéstchon de l'abandonné. J'trouve chonna bein sérieux, mé, car pour des années j'n'ai jamais mantchi d'être là pour la Séthée Jêrriaise.”
“Ni mé ni-n'tout,” j'l'y dit, ach'teu tchi y'avait l'temps pâssé. “mais y faut adméttre, Merrienne, que n'y'a pas l'intéthet. Au qu'mench'ment tout allait bein, mais quand vint un temps ch'tait pûs et pûs d'clâsses pour le piano et pûs et pûs d'clâsses pour la danse. Les gens vintes à s'en lâssé, tout l'monde savait que la fin n'tait pas lien. Et pourtant, dans chu temps là, le Doyen Falle, chu grand homme, 'tait président. Ach'teu, pour agvé tout, y y'a chein qu'nous apélle le T.V., et y'a des chents d'pérsonnes tch'y préféthent être confortablyes et cauds siez-yeux à r'gardé chonna, que d'sorti pour êcouté des mousses de sept à huit ans faisant la mine de jouë l'piano ou des p'tites hardélles faisant la mine de dansé.”
“Tu'as mentionné l'Doyen Falle,” ou s'fit. “Ach'teu, y nos en faut yun. As-tu autchune idée tchèsqu'y s'sa?”
“Oui,” j'l'y dit. “Je peux m'trompé, mais je crais que yun d'nos Récteurs a une bouonne chance. J'en r'pârl'lons la s'maine tchi veint.”
Ph'lip
1959
Viyiz étout: