Les Pages Jèrriaises

L'Jèrriais - ma langue

J'fut né en dgiex neuf chents trente trais à La Chasse, Ste Mathie, man péthe et ma méthe 'taient touos les deux des Jèrriais et pâlaient l'Jèrriais entre ieux et naturellement ma preunmié langue 'tait l'Jèrriais.

Mes pathents étant fermièrs empliyaient des Angliais dans l'temps et plusieurs dé ieux voulaient m'pâler et comme i'n savaient pas pâler l'Jèrriais ni l'Français i'm pâlaient en Angliais et comme ch'na j'vins a pâler l'Angliais d'vant aller a l'ecole.

Malheutheusement mon péthe mouothi en dgieux neuf chents trente neuf justement au c'menchement de la deuxième dgerre quand j'avais qué siez ans.

Ma preunmiéthe école 'tait siez la demouaîselle Nan Le Ruez, eune Jèrriaise q'avait eune êcole au Homestead à St Pierre, auprès ch'na a l'êcole élémentaire de Ste Mathie et là j'taîmes découothagis d'pâler l'Jèrriais surtout auprès qué j'avais dit à ma maitrêsse que j'n'pouvais pas pâler l'français, eune grande erreur de ma part car ou'me donnit chînquante lîngnes à écrithe comme punnition (j'peux pâler l'français) j'n'fis pas chutte méprinse la eune deuxième fais.

J'fini mon êcolage au College Victoria. Quand tchittit l'école, j'restit sus la ferme a aîdgi à ma méthe couôrre la ferme.

Dans chu temps la j'avaimes des vaques, des géniches, des vieaux, des couochons et eun j'va j'craisaimer des patates dé l'avaine et des rachinnes pour les betes en hivé.

Comme récréation, jé joignis lé 'Young Farmers' Club' et j'prîns part dans les concerts et sustout dans les farces en Jèrriais qu'taient tréjous amusantes. Au jour d'anniet j'sis bein content que j'ai acouo des vaîsins qui pâlent la langue et j'sis content d'avait eut l'opportunité quand j'tais dans les Etats de supporter l'éducation d'Jèrriais dans les écoles primaires, l'n'faut pas perdre nouotre ancienne langue.

P't-être qu'a l'av'nin les assembliées des Etats s'sont tenues en Jèrriais - 'Nou peut q'rever !'

Ch'est incriyabl'ye quand j'pense comment que mon vaisinnage a changit dans les dernier chinquante ans presque toutes les maisons avaient eun p'tit betchet d'terre et presqué touos les vaisins faisaient eun mio d'tchultivâtion et presque tous pâlaient l'Jèrriais ch'tait la couôteunme du temps.

Au jour d'anniet l'n'y'a presque pas d'fermiers dé restant ni d'Jèrriais. I's'sa intéréssant d'saver tchi changements qui y'etha dans les préchaines chînquantaines d'années.

 

Edwin Le Gresley Godel

 

Viyiz étout:

 

Les Pages Jèrriaises