Mousieu, - S'ous avez du run d'êpaingne dans la Chronique, vouos pllaira-t-i' y couler la ptite arimèe que j'm'en vais vouos conter.
Je n'sis pon comme un bouet bouteux, qui n'dit ni bouf ni baf: s'lon l'humeur qui m'prend, je dis ma faichon d'penser, et que les cheins qui sont piquis lus grattent.
J'aime hardi le Jerriais, mais ch'est grand domage que les cheins qui se dmentent de rimer, l'estropient comme nou l'veit dans la Chronique du 13 Avril. Sinon que jy sis accouotumè j'airais ieu d'la peine à d'viner que “tchesus” voulait dire querue. Nou devrait pusaco s'êcanter à l'raffiner un mio, à seule fin d'encouoragïr les gens à l'lliere; car à quest que v'la qui sert de rimer, si l'monde est dêgouôtè d'la lecture par la peine qu'i trouve à dêchiffrer.
J'sais bein que tous n'pâlent pas d'une sorte, et que d'll'iaue dans l'Vouest est d'll'iauue dans l'Est: que du maqueré est maquethé à une plleche et maquesé à une autre: que nou prononce à sa mangniere, mais êcrivons iaue et maqueré, et chacun pouorra s'y r'connaître.
Nou n'happe pas les môques atou d'l'aigre, et ch'n'est pas en machacrant l'Jerriais qu'nou f'ra l'monde lliere des rimes sans orthographe et sans granmaire.
Vot' serviteu,
Un Vier Jerriais
Chronique de Jersey
20/4/1881
Viyiz étout: