V'là oquo un autre Eisteddfod de passé et comme d'habitude, la Séthée d'Jerriais eut un grand succès.
La Caouain félicite sincéthement touos les siens qu'i' prinrent part, surtout les siens qui gagnithent des prix et des certificats.
Véthitablyement, une grande partie des interprétations des difféthentes piéches étaient à peu près parfaites et j'espéthe que nou les r'rouitha ch't hivé à tchiqu'uns des concerts dans les pâraisses de campagne.
Es compétiteurs qui n'eurent pas justement le succès à tchi qu'i' s'attendaient, je dit “Ne perdez pas couothage, profitez de l'exemplye qui vos a 'té donné par les gagnants et tâchez de l's imiter, vot'e tou vaindra.
Si ch'est qu'ou voulez vos perfectionner d'mandez à tchiqu'un des contchuthents des pus réussis, quand ous aithez vos piéches pour l'année tchi vaint, qu'i' vos donnent un avis ou deux. Ch'est tous des gens des pus aimablyes qui, je sis seux se f'thaient un pliaisi de vos assister.
J'avions ch'tte année deux nouviaux adjudicateurs et i' faut dithe qu'i' lus sont atchittés de lus tâche difficule d'une manièthe admithablye et sans perdre trop d'temps, une chose bain nécessaithe avec un si long programme. Dans certaines classes ch'tait une affaithe bain appréchie entre tchiqu'uns des competiteurs, raique une merque ou deux de difféthence... Dans un cas ou deux le deuxième ou traisième aithait tout aussi bain avé 'té mins prumi sans que personne aithait ieu rain à dithe.
Ch'est justement une affaithe d'opinion et souvent i' peut y aver des p'tits d'fauts ichin et là qui n'sont pas r'mertchis par l'assistance mais qui sont condamnés par l'adjudicateur qui reduis les points accordamment.
Le public qui fréquente ches séthées-là est généralement souos l'impression qu'un adjudicateur dait être infailliblye, alors i' faut qu'i' r'garde bain à li quand il est sus la strade à faithe ses observations, de n'se tromper pas sus autchun p'tit détail ni d'faithe le moindre p'tit faux pas ou bain ses auditeurs en r'tithent un divers amusement.
Ch'est pour chenna que l'aut'e sé ch'tait avec la pus grande satisfaction que je pûmes rithe un mio en ouiyant Moussieu Crill dithe qu'il avait pendu une “poupette” au pid d'san lièt, quand il aithait deu aver dit une “cauche.”
Mais ch'n'est pas tout chenna!
Il est grand temps qu'i' y ait une amélioration dans l'organisation de la Séthée d'Jerriais et que l'programme sait considéthablyement raccourchi.
Ch'est trop longtemps de faithe duther la séance dépis sept heuthes jusqu'à onze heuthes et d'mie. Les gens c'menchent à ennier de chu système-là et hardi d'entre ieux finithont par ne y aller pas du tout si chenna continue. I'faut que l'Comité faiche tchiquechose.
Che s'sait damage de supprimer iune ou deux des classes pour les êfants, car chenna se f'thait d'les dêcouothagi.
Un bouan plian essait d'les faithe donner une représentation preliminaithe dans l'arlevée du même jour et que l'adjudicateur en sercliethait une proportion des pus faillis et en gardethai que quatre ou chinq des milieurs de dans châque classe pour la séthée. Le rêsultat en s'sait l'même quant aux prix et au mains la représentation du sé es'sait d'une duthée pus dans les limites de la raison.
Et pis i' y a une aut'e chose.
Il est temps qu'i' y ait pus d'variêté dans les piéches souminses à l'appréciation des adjudicateurs.
V'là bain d's années que l'Eisteddfod est êtablyi et toutes les oeuvres des auteurs Jerriais ont té produites et réproduites si souvent que l'public les sait quâsiment par tchoeu, don, i'faut pour maint'nin l'intethêt, tâchi de présenter tchiquechose de nouvé.
Malheutheusement Sir Robert Pipon Mathèt, J. P., Ch'la s'peut, l'Amin Philippe, Elie et d'autres auteurs de r'nommée ont dispathu et ne peuvent pas y contribuer.
I' n'nos reste acheteu que l'pouore G. W. de C. et i' n'faut pas compter d'sus pour bain longtemps, i' c'menche à châtchi au manche, et l'temps vaindra qu'i' n'restetha pus personne pour fabritchi des dialogues et des poësies dans not'e vier patouais, si nou n'y apporte pas r'miède.
Absolûment, i' dait y en aver des douzaines parmi vous, tout-à-fait capablyes de continuer le travas des siens qui sont hors, si seulement ou vouliez vos y mettre.
Pour encouothagi la chose et faithe êcliater vos capacités poëtiques je voudrais suggéther au Comité de l'Eisteddfod d'offri des prix pour les miyeurs poësies en Jerriais. Comme chenna i' s'en trouvethai un grand nombre d'un style varié, qui donnerait une chance au Comité de chouaisi touos l's ans tchiquechose de nouvé.
Tâchez don mes chiers amins de donner suite à ma suggestion car autrement ou verrez votre Séthée d'Jerriais s'en aller en déclyin et finalement dispathaître tout-à-fait.
Caouain
1930
Viyiz étout: